和一位詩人開講，兩人的囡仔有識似，真自然就講起雙方囡仔的狀況。詩人一句話，予我印象真深。伊講，「台灣的媽媽講著家己的囡仔，攏誠謙虛。」

斟酌想，這句話敢若無毋著。聽著人呵咾家己的囡仔，做老母的無管心內偌歡喜、偌贊成，講出喙的，時常是，「無啦，伊較hân-bān（憨笨），是你毋甘嫌啦。」

我就幾若遍聽著阮媽媽按呢講。這時陣，伊的目睭特別光，心內想的可能是，「著啊，我的囡仔就是像你講的。」一半擺擋袂牢，自動欲佇厝邊隔壁面頭前展家己囡仔「光榮事蹟」的時，伊就彎彎斡斡（拐彎抹角），講一寡有的無的；然後，揣（tshuē，找）著「適當的時機」，才假做「雄雄想起來」按呢講出喙。看著媽媽這个時陣的心機，我攏佇邊仔偷笑。

毋過，也有台灣媽媽慣勢先呵咾家己的囡仔啊。我一个朋友，講著伊的囡仔的表現，全是好的、予人欣羨的。考著的學校若毋是伊本來信心十足的，伊就講考著這个學校閣較好，「天註定啦，我囡仔的個性，去讀這个學校顛倒較好。」食頭路矣，總是會得著頭家的重視和欣賞；家己創業，就訂單濟甲做袂去。…..

我有一點仔感慨，共另外一个朋友講，「哪會某乜人的囝、查某囝學業、事業攏遐爾（hiah-nī，那麼）順利，予人真欣羨啊！」伊笑，「伊一向按呢講；有的人顧面子，攏講好聽的。」

後來讀著一篇文章，講念力真重要，爸母對囡仔的態度──包括想法和講法，是一種無形的能量（這兩字這幾年誠流行），肯定的、正面的，對囡仔有幫助、祝福的功能；否定的、負面的（包括憂愁、操煩），會減損囡仔的能量，共囡仔搝（giú，拉）落去。這款講法驚甲我以後為囝、新婦操煩的時，就趕緊越（轉）頭，共家己的想法「撨（tshiâu，挪）」到樂觀積極的方向。

閣有，勸家己佇外人面前講著囡仔，毋免傷過謙虛──講濟可能也會變做念力；而且，嘛有白目的人當做你講的攏是真的啊。

有這个觀念過後無幾工，和後生的兩位厝頭家見面啉茶，聽著in（她們）呵咾後生共in的厝做真有意義的利用、改變這箍圍仔環境的文化氣質的時，我一時歡喜，綴（tuè，跟）咧講兩句好話；我的後生卻佇桌仔跤踢我一下，害我隨時大舌，歹勢起來。

伊的意思應當是：別人客氣講好話，做老母的人哪會當紲落（suà--lo̍h，接下來）鬥講！

確實，佇彼兩位年紀比我較大、有台灣人傳統美德閣有日本式優雅氣質的女士面前，褒家己的囝，有較無適當；我猶是應該講：「無啦，是恁毋甘嫌啦。」

（毋過，彼日，我只是像水內的魚，聽著面頂好聽的聲音，浮出水面「噗」一下爾爾啊。）

。原載2018.8月號《文訊》雜誌。