我的小弟寄一張附兩張相片的電子批予我，主旨是：哥斯達黎加男模 vs 恁的少女時代。

看著彼兩張相片，我哈哈大笑。回批講：阮的烏點（雀斑）無遐爾（hiah-nī，那麼）驚人啦！

彼位查埔model無管是正面抑是偏邊（側面）翕的相片，雀斑攏滿滿是，連耳仔、頷頸都有；予人看著強欲起雞母皮。閣較心適（趣味）的是，正面彼張，伊共一莢（根）弓蕉囥（khǹg，放）佇耳仔邊假做電話咧講；弓蕉真夠分，面頂烏點密密是。偏邊彼張，伊的耳仔夾一蕊斑點蘭花，花瓣的烏點閣較齊勻。

翕相的人真笑詼，用弓蕉和蘭花來對照查埔model規面的雀斑。

小弟提這款相片來vs 阮姊妹的少女時代，是因為自做囡仔的時，阮就為著雀斑誠困擾。大姊二姊面肉光，無雀斑；自我開始到兩个小妹，三姊妹的雀斑就一个比一个發較濟。奇怪的是，紲落（suà--lo̍h，接下來）的小弟，連一粒烏點都無。

論真講起來，生做媠抑bái（醜），囡仔m̄ bat（不懂），也袂去關心雀斑。毋過，阮媽媽真要緊，有當時仔斟酌看阮的面，會講，「生做雞卵面，喙目鼻也袂bái，哪會欲生遮的烏點。」上討厭的是，大人共in（它們）講做「胡蠅屎痣」；明明平平，無噗（phok，凸）起來，哪會是痣？閣是胡蠅屎！白目的囡仔聽著胡蠅屎，會憢疑，「你無洗面喔？」好咧見過世面的大人會講，「誠古錐啊，敢若美國人。」

確實，電影內底的美國囡仔，無管查埔查某，普遍攏有雀斑。

到阮十八九歲當青春的時，媽媽愈要緊，叫阮探聽看有啥物化妝品，抑是藥仔會當共烏點治好。彼陣有一个誠有名的美國明星桃樂思黛，外號叫做「雀斑皇后」；我講若有法度醫，有名閣有錢的明星哪會猶規面烏點？兩个小妹講，「這是阮姊妹的註冊商標，哪會使予伊無去？」屘小妹講人呵咾伊遐爾古錐，就是因為伊的下頦淡薄仔翹，閣有雀斑。

阮也愛佇媽媽面頭前講笑，「有烏點，啥人敢看阮無點！」台語「看人無點」的意思是看無起，無看在眼內。

我比小妹較無自信，出社會揣（tshuē，找）頭路寄相片，我甚至有「欺騙」人的心虛；相片看袂出烏點啊。

後來，毋知經過幾年，阮姊妹發覺家己的雀斑噴噴幾點爾爾；無去注意根本袂看著。後來，甚至袂記得家己的面有過遐爾濟「刪節號」。

這陣，朋友之間講的是漸漸出現的老人斑。一个中學同窗怨嘆伊連手骨（胳臂）都全是老人斑，我哪會無？我講，「我烏斑的額度，可能少年的時陣就用完矣。」

。原載2018.9月號《文訊》雜誌。