舊年的二九暝，我的二新婦（媳婦）阿慈轉來的時，我隨看著伊穿的裙；淺豆沙色的角格仔，看起來真青春。伊講，「真合軀（身），真好看，改短才200箍；趕緊穿轉來予媽媽看。」

第二日新正早時，鬥陣出去行春；見面伊閣再比家己的裙，「真好看乎（honnh）？拄好（tú-hó，恰好）配我這領烏色的外套；頭前這个襇（kíng，摺）予烏裙較活潑。」

兩領裙是頂禮拜我提出來的。以前的衫，攏獨一無二；是家己去一間一間布行選料，買予裁縫量身做的。布商剪布的時，一般會加「讓」一屑仔，予人較好做。有的會交代，「你若驚這塊布會勼（kiu，縮）水，就先落過水才提去予人做。」對這種衫，比買便的較有感情。

兩領裙的毛料好，手工幼，型也大方，袂退流行；所以，每遍提出來看看咧，就閣收起來，毋甘送人抑是捐出去。雖然早就穿袂落去矣，當做25吋腰的紀念也好。

彼日提出來，真難得阿慈有佮意（kah-ì，喜歡），講予裁縫改短兩三寸就會穿得。

新正年頭，行佇（tī，在）公園的樹仔跤，伊一身軀的烏真好看。短外套巧氣，配烏裙，咖啡色的靴，閣再圍一條有紅黃色彩花草的絲仔巾，媠閣雅氣，是一个有氣質的career woman。（用英文講較合伊的職業。）

舊衫改新是我的妹妹開始的。

一遍，阮相招去踅（se̍h，逛）百貨公司；見面的時，我予伊穿的深綠色外套驚一趒，想袂到過時的衫變做遮爾（tsiah-nī這麼）時行！

彼是我二十年前愛穿的外套。無領，胸前兩片斜斜相疊，配短裙穿起來真少年；閣縖（hâ，繫）一條紅配綠的四角形圍巾，尤其出色。每一遍我穿出門，攏得著真濟呵咾；和人做伙翕（hip，照）相，也特別影目。

「流年偷換」，我的腰愈來愈大，裙穿袂落去矣；紲落（suà--lo̍h，接下來），闊肩胛頭的衫退流行，外套也囥（khǹg，放）咧閒。後來，妹妹佮意伊，接收去，講若無流行倒轉來，就提去改。等十外年，猶是無人穿彼款闊肩的；舊年，伊佇員林發見一个工夫真好的裁縫，收費也無貴，就提去改，才有這領適合現代潮流的新外套。

彼日佇百貨公司，無買著佮意的衫；隔轉工，我就認真佇厝內「搜古董」。

桌櫃大屜內底上有份量的是四領大衣。一、二十年來，大衣無時行，穿起來也袂扭掠（liú-lia̍h，俐落），所以毋bat（曾）提出來穿。

三領是烏色的；其中一領是半世紀前，佇委託行買的香港貨。伊的頷領 （ām-niá），毋知是啥動物的毛，看起來高貴，價數也真高貴；彼當時，「日本製」和「香港製」較高級。一領是美國的朋友送的，有紅色的領；一領是二十外年前，我佇巴黎旅行的時，予規街路穿直筒式長大衣、披大圍巾的女子迷著；下一站到維也納的時，就去買一領彼款型的大衣和一條毛料長圍巾。轉來台北，我共（kā，跟）朋友講咱鬥陣做巴黎女子的打扮，來去兩排楓仔樹的中山北路散步行路；結果並無執行。

另外一領深紅色，年資上淺的，至少嘛有二十歲矣。穿伊就配一條佇巴黎春天百貨買的仝色花圍巾，感覺家己「風情萬種」。這領是佇忠孝東路「造寸」買的，彼間店的貨色濟閣時行，價數也合理；幾年之間，我佇遐（hiah，那兒）買過大衣、外套和長褲。可惜後來店毋知徙去佗位抑是關起來。

我和妹妹兩人輪流試穿這四領大衣，閣提各色的圍巾來披，感覺真讚，一時敢若變做貴夫人。本來是拍算共in鉸短變做外套穿；毋過，一遍一遍穿，猶是毋甘。彼領深紅的，料較薄一屑仔，妹妹紮（tsah，攜帶）轉去員林，講過年來穿，予逐家目睭瞪大大蕊一下。可惜，這个新正，天氣真好，大衣猶是一个「紀念品」爾爾。

我閣想著一領鳥鼠仔色、半番仔幔（huan-á-mua，斗篷）式的大衣，是佇紐西蘭買的。我的小姑看我試穿，無贊成我買，講，「你佇台北一定毋敢穿！」「哪會毋敢，無算偌怪形啊！純羊毛，價數也無貴。」旅行的時確實較大膽衝碰，轉來台北，莫講無勇氣穿出去；遐爾（hiah-nī，那麼）燒，也無適合台北的天氣。好咧幾年前，大新婦講起關渡寒流來的時足寒，就予伊提去早暗佇厝內穿。

所以，tsit-má（現在），除了坐車去員林彼領，另外三領大衣出來踅踅了後，猶是轉去屜仔內「歇睏」。

不過，這遍搜古董的成績算是真好，我一領烏色外套送去予裁縫共闊肩胛改細，會當穿矣。上重要的是，彼兩領裙新婦改來穿，穿了閣滿意，我尤其特別歡喜。

2018.4月號《文訊》