面冊（臉書）頂頭，有當時仔會看著面友佇足短的時間內直直共我揤（tshi̍h，按）讚的通知，一篇，一篇，閣一篇。

In（他們）當然無可能佇十幾秒鐘內，讀遐爾（hiah-nī，那麼）濟。可能是新加入的朋友，也可能是久久無踏跤到的舊朋友；既然來矣，禮貌上就共你揤讚，予你知影伊來拜訪過。

這个時陣，我就笑笑仔看，敢若覕（ bih，藏）起來看膨鼠抑是猴山佇兩欉樹仔中間跳過來跳過去，心內想著李白的詩句：兩岸猿聲啼不住，輕舟已過萬重山。

按呢講，完全無共in消遣的意思，當然也無見怪。Bat （曾）看著面友氣這種人無誠意，共伊取消朋友的身份。我袂按呢想，人來揤讚總是好意。

我想著以前佇報社上班的時，有時愛參加編務、社務的會議。有的會議和我的工作範圍無關連，真了時間，我會（能）閃就閃。有一个採訪組的同事講，伊攏會去一時仔，親像「搵（ùn，蘸）」豆油，而且爭取機會先發言，予頂司（上司）看著伊，然後就旋（suan，溜）。我無彼種本事，一旦佇長長的會議桌坐落就歹勢走；想欲走毋敢走，坐甲心狂火著。一日，我的主管講，「有工課愛做，無去開會無要緊；毋過，猶是先去簽一个名較好。」

簽名做表面工夫就離開，敢好？伊講，「按呢至少表示你有尊重會議，予頂司面子。」

所以，tsit-má（現在），佇面冊頂頭，看著「猿聲啼不住」，我會理解，多謝in來相借問。當然，也希望以後閣再來的時，會當親像一條著獎的（華文）手機簡訊寫的：益者三友，有讀，有回，有按讚。

2018.3.6《自由時報》副刋