少年的時，一陣人去阿瑛大姊兜（tau，家）食飯開講，離開的時，伊攏會叫伊的囡仔陪人客行過小花園仔，送到大門口。逐家無仝時間離開，就一遍一遍相送。

阮歹勢，講免遐爾（hiah-nī，那麼）厚禮數啦，伊堅持，講，「阮兜的規矩，人客走，一定愛相送；大人無坐，囡仔袂使坐落去。」

所以，人客入去的時，坐佇椅仔的囡仔一定會徛（khiā，站）起來。

這陣的人無遐爾講究，有當時仔拄著序細（晚輩）熱情相借問，抑是相送，就誠有感覺。我家己嘛是慣勢送人客到門口－－厝細間，無埕、無花園，kan-na（只）行幾步爾爾的誠意。

對家己的囡仔，我也是按呢做。這是自囡仔細漢送in出門去學校就養成的習慣；講「再會」的時，順紲佇in尻脊骿（kha-tsiah-phiann，背）拍一下，敢若「運功」，共心內的關心和叮嚀送入去。有一遍，讀國中的囡仔參加啥物活動，天未光就出門，竟然誠工夫來共媽媽叫醒，講，「你哪會無起來看我出門？」

2018.2.2《聯副》