做我的手機仔誠寂寞，我罕得用伊來敲電話、聽電話；除了出國，連看line回line都佇電腦面頂。較有用的功能是翕（hip，照）相，伊比相機較方便。

頂日，翕過相矣，點到「相簿」，彼个頁面卻規片烏烏，新的舊的相片攏無看著。點信箱，伊講歹勢，Google停止運作。

我提去手機仔公司「問診」，店員講，需要共所有的資料刣掉，歸零，重灌程式；按呢就若新的。

相片攏有存佇雲頂（雲端），消除無要緊。我心內按呢想，問伊：

費用愛偌濟？

六百箍。

需要偌濟時間？

三點鐘到六點鐘。

遐爾（hiah-nī，那麼）久？

看伊走（跑）了有順序無；有時無成功，著愛重來，閣走一遍。

我對科技產品誠低路（低能），驚機仔走了拍結，內底電話和Line的名單變無去；而且隔兩工，囡仔會轉來，會使予in（他們）看一下，就無共機仔留落來予人修理。

囡仔轉來，聽我講起和店員的對話，講：「錢免予人趁（賺），我共你用。」

經過兩分鐘，我的手機仔就若新的，六百箍省起來矣。

話講倒轉來，若毋是囡仔替我創（tshòng，弄），錢予人趁嘛是無話講；彼是專業服務的價值。我臆，老大人應當是in趁這款錢的主要來源。

「遮爾（tsiah-nī這麼）簡單，伊竟然講愛走三至六點鐘。」我講。

「可能是共等伊有閒修理的時間算在內。而且，時間講較長，人才甘願提錢出來啊；講兩分鐘，啥人感覺彼有六百箍的價值？」

著乎（honnh），聽過一个故事：有人予齒科醫生挽（拔）蛀齒，一時仔就挽落來。彼个人無呵咾醫生技術好，顛倒佮醫生花（耍賴）起來。

「遮爾緊（快），五分鐘你就欲收我幾若百箍，敢有合情理！」

醫生講，「你事先無講，若無我就用半點鐘來共你挽。」

2018.2.26《自由時報》副刋