舞

阿雅是雜誌社的編輯，伊講最近予新來的主管修理甲真忝（thiam2，慘重），明明是伊家己下無妥當的標題，講前後矛盾的指示，嘛有法度牽拖別人。「氣起來，寫一篇文章來罵伊。攑筆尾的人，至少有這个本事。」

我講，「你的文章，媒體是會刋啦；毋過，你敢毋驚到時伊告你誹謗，妨害名譽？」

「我莫寫太清楚，伊就對我無辦法啊。」

  「寫無清楚，啥人知影你是咧寫伊？按呢彼篇文章就失去你本來欲愛的效果啦。」

   伊講，「按呢講也對。我猶是共寫予清楚，予伊對號入座，我的同事嘛會歡喜我替逐家出氣。毋過，我會佇文章後面附一个聲明，來閃法律。」

啥聲明？伊講，「本文純然是虛構，和○○○無關係。」

○○○就是彼位主管的名。

愛講笑，按呢寫就會使閃法律？阮兩人攏大聲笑出來。

原載2017.5.29《中華日報》副刋