蒸籠框和酒瓶

         一位畫圖老師講，「畫矸仔（kan-á，瓶子）抑是罐仔甕仔，若無插物件，著愛有蓋。」

這是啥道理？影響美感？

畫果子抑是花的時，我不時用酒矸仔、甕仔來做伴，in較好畫，嘛免驚畫傷（siunn，過於）久會歹去、蔫（lian，枯萎）去；幾若遍我畫的玻璃矸仔、甕仔的喙空空，看起來媠媠，無感覺有問題啊。

一个愛算命、禁忌袂少的朋友一遍來阮兜（tau，家），看著我幾若个甕仔喙開開，無插花也無插筆，講，「厝內的罐仔甕仔若無插物件，就愛共in倒蓋（kap）。」

倒蓋才歹看！我當時笑伊迷信，無問伊這是啥理由。

伊的迷信和阮一个厝邊有拚；伊愛算命，阮厝邊愛問神問仙姑。有一遍阮兜較無順利，厝邊好心tshuā（帶）阮媽媽和兄嫂去「觀落陰」，就是牽引亡魂出來和在世的人講話。後來聽媽媽講彼个叫啥「姑」的講的話攏袂信得，「伊叫出來彼个人根本毋是阮老母；阮老母叫我毋是戶口簿仔彼个名。」媽媽上不服的是，「伊竟然講有小漢就過身的來討姪仔予伊做囝，拜伊。無影無跡！我一手囡仔攏順序晟（tshiânn，養育）大漢，根本無半个拍損（夭折）！」

阮阿兄閣較趣味，彼个仙姑講毋著，伊就涼涼仔應，「你臆毋著矣，閣再臆，閣再臆。」

聽起來阮媽媽和阿兄較鐵齒，才予仙姑踢著鐵枋。

我也是無啥迷信的人。畫圖，空矸仔、甕仔愛有蓋；厝內罐仔、甕仔無插物件，就愛倒蓋這款話罔聽罔聽就好。我家己臆，是毋是空空無物件，人會散赤（窮）？無蓋，是毋是有啥「歹物仔」會走入去，抑是覕（ bih，藏）佇內底的鬼怪會隨一陣煙飛出來？

烏白想，彼根本毋是阿拉丁的神燈。

2017.5.28《自由時報》副刋