水彩老師講水彩會當一層一層疊色，毋過，著愛等前一遍畫的色焦（乾）甲一个程度，才會當疊第二層色；按呢才袂去共第一遍的色緻洗掉去，嘛袂兩種色lām（混）做伙，變做無透明、濁濁的色。

  「恁攏傷（過於）急性，才會失敗；畫第一遍了後，行開去泡一杯咖啡來啉，才閣轉來畫，就袂有彼款垃圾（lah-sap，骯髒）色矣。」

  這句話其實伊講幾若擺，逐家敢若攏做袂到。

  坐我邊仔的同學講，「啉咖啡？哪有可能遐爾（hiah-nī，那麼）閒，遐爾優雅？伊若講行開去洗碗抑是摺衫，逐家可能較會記得。」

  有影，來學畫圖的大部份是家庭主婦，厝內的工課永遠做袂完。

我想著兩个囝細漢的時，我捌（bat，曾）寫過一篇文章叫著＜金剛戲院＞；寫的是in「開戲園」表演特技、變魔術予我看的代誌。彼陣，我下班轉去，炒菜，攢（tshuân，張羅）暗頓，食過飯，已經無啥氣力；毋過，囡仔遮爾（tsiah-nī這麼）有創作精神，耍啥攏真心適（趣味），做媽媽的總是愛配合，就照起工（tsiàu-khí-kang，照規矩制度）坐佇椅仔頂認真看in表演。兄弟仔的技術離離落落，等候的時間淡薄仔長，親像in講的，「本戲園的優點，是歇睏（休息）的時間長，觀眾袂傷忝（thiám，累）。」我就是利用休息的時間，離開戲園去洗碗，摺衫。工課做好，才轉去看in變猴弄（耍寶）。

退休、做專職的主婦矣，畫圖中間，毋捌撥工去泡咖啡。看電腦傷久，行開去予目睭休息，嘛是洗米，洗菜，整理報紙等等；較清閒的可能是食果子。講起來，做主婦的人較實際，也較無「氣氛」，心內上要緊的攏是厝內的工課啊。

2017.5.11《聯合報》副刋