2017年四月，天元宮前的櫻花

  搪著（tn̄g-tio̍h，遇到）花季，尤其是櫻花季的時，攏有真濟人四界逐花，痟花。有的所在「人比花較濟」，kheh（擠）甲欲翕（hip，照）一張無外人的相片都誠困難，閣免講交通打結，一點鐘的路，可能愛駛兩點鐘以上。

我一个同學，Sinshia，就是標準的「逐花族」，仝所在的花，看幾若遍嘛袂siān（厭倦）；可比武陵農場的櫻花。

今年伊閣欲去，招我鬥陣，我講好啊。國光號台北到武陵的賞櫻直達車，固定時間，固定路線，有一定的品質。往年，伊半暝去車站買票，會當選車幫（班）；這回，伊佇便利商店買，免半暝去排（隊），毋過較好的時間賣完矣，kan-na（只）賰透早四點五十分發的車。

遐爾早！有伴我才敢出門，招妹妹，伊講好。

尾後，妹妹聽著去四點鐘，轉來四點鐘，停留四點鐘，煞躊躇（tiû-tû，猶豫）起來。

「咱毋是無時間的人，去thit-thô（遊玩），上好蹛（tuà，住）一暝，哪著遮爾趕時間！」

按呢講是無錯，毋過有人安排，阮才有出門的動力；這款一日遊是上簡單的。

後來伊知影阮的票是上後面的，驚家己透早出門，精神無好，山路彎彎斡斡，閣坐後壁，無拄好眩（hîn，暈）車，就決定放棄。

我也無愛家己天未光就出門，「武陵賞花」就按呢烏有去囉。橫直，我對花的要求無懸（高），佇阮兜（tau，家）附近兩三欉櫻花樹開的花嘛袂bái（醜）。而且，我捌綴（tuè，跟）Sinshia 去新店陽光運動公園看河津櫻，去淡水天元宮看吉野櫻。當然，也看過陽明山的櫻花。

我無認真遊說妹妹去，講到底，就是因為我對花無迷到無看毋甘願的程度啊。

Sinshia就無仝款，伊台灣頭到台灣尾，各種花展花季差不多攏有踏跤到，世界有名的京都鑄幣廠的櫻花也看過。伊足愛旅行，體力閣誠好，南美、中東、北歐、阿拉斯加攏去過。每遍轉來，傳予我看的風景時常包括奇花異草；亞馬森河的、約旦的、秘魯的，……。以前我講伊頭殼頂有天線，攏會看著別人無看著的花；這陣，伊是頭殼內有花的定位導航系統。

遮爾興（hìng，嗜）看花，實在真奇怪；毋過，我嘛欣羡伊有這款趣味，這款氣力。敢若像有的人逐好食的，有的人痟球類比賽，有的人迷看劇；生活中有目標，有特別的期待，一定過著較快樂。

2017.4.27《聯合報》副刋