佇礁溪蹛（tua3，住）一暝，隔轉工早起，去傳統市場行行踅踅（seh8，逛）咧。

我一向對菜市仔有興趣，in（它們）上會當表現一个所在的民情風俗。無論佇台灣的水里抑是意大利的那波里，有去「巡」過菜市仔，彼个所在留佇我頭殻內的畫面就特別深，特別親切。

礁溪的早市真長，街仔的兩爿賣雜貨、魚肉、青菜的，有攤的無攤的，排甲滿滿是。

本底無意向買物件，kan-na（只）像「市場調查」按呢巡；毋過看著一个徛（khia7，站）佇零星幾把菜後壁查某人的笑容，實在無法度假無看著、繼續向前行。

伊的笑容是對心內發出來的，透早來遮賣菜竟然會歡喜甲彼款形，予我真好奇，就共伊買一大把蕹菜（空心菜）。伊講宜蘭粗管的蕹菜「進」好食，欲炒欲煮湯攏袂變烏色。宜蘭人講「真」(tsin)，聲調若「進」(tsin3)，特別有力量，猶閣牽長長，聽起來真心適（趣味）。伊的笑容也tsin3有喜感，問伊哪會賣甲遮爾（這麼）歡喜？伊講免講嘛歡喜，家己種的菜有人買啊。

喔，家己種的。是蹛佇附近？伊比後面，「近近仔，無外huinn7。」遠，阮講hng7，宜蘭腔講huinn7，佮講「卵」、「軟」仝款，攏愛「 扭」一下。我佮羅東的朋友答喙鼓時，攏愛笑伊講話 tsin3古錐， tsin3妖嬌。

賣菜的查某人講，「我賣甲tsin3歡喜，我看你嘛買甲tsin3歡喜啊。」

無錯，我也喙笑面笑。見著這个樸實的田庄人，聽著這款腔，當然歡喜啊。

昨暝佇快炒店食晚頓，頭家娘和伊的囡仔攏用華語講話，我有一點仔意外，共伊講本來我掠做（liah8-tso3，以為）佇遮，台語會比佇台北較普遍。伊無奈講準做（即使）爸母講台語，囡仔嘛慣勢用華語應；kan-na佇阿公阿媽面頭前講一半句。

原來毋是大都市才有這種現象。

莫怪我聽著這个賣菜的人的腔口， tsin3歡喜啊。

2016.12.29《中華日報》副刋