四妹的孫子自嬰仔時予人剃頭就誠乖，坐恬恬，袂哭，袂失去耐性。

毋過有一點仔堅持，kan-na（只有）肯予仝一間熟似的剃頭店的老板剃；一遍老板無佇咧，別的師傅共（kā）伊剃，伊真難得無變面，過後共阿媽講，「這个師傅的面，親像老板。」

頭剃好，uì 椅仔頂落來，閣一定會講一聲「多謝」。

剃頭店的大細師傅攏呵咾，講毋捌看著遮爾（tsiah-nī，這麼）好剃頭的囡仔。

幾个月前，伊佇員林歇寒，頭毛發甲真長，姑不將（不得已）去無熟似的剃頭店，予一个無熟似的師傅剃。毋知是袂慣勢查某師傅的手勢，抑是伊的技術無好，煞予這个十歲的囡仔起性地，無好聲嗽咧講，「你到底有提著證照無！」

師傅毋知是聽無清楚，抑是假聽無，「啥，你問我有駕駛執照無？」

做阿媽的講伊彼當時足歹勢，行出外口，忍袂牢才笑起來。當然，也是有罵孫仔兩句。

阮姊妹想著這个自細漢就足巧、佇外人面前攏有禮貌、袂起番的囡仔，竟然一時「歹剃頭」起來，對外人講啥物證照，嘛愛笑。台語「歹剃頭」，是講一个人歹做伙、歹侍候；眼前來形容伊，上拄好（ tú-hó，恰當）。

過一時仔，大姊講著感冒予醫生看的經過，我一向足反對感冒揣（tshuē，找）醫生、食藥仔，就對姊妹仔做一个「機會教育」。

我講家己的身體家己上了解，家己愛照顧；身軀痠軟無力的時，就愛想著可能感冒矣，這个時陣煮薑母湯來啉上有效，「薑母煮烏糖遮爾簡單，恁敢袂曉！若siunn（太）慢啉，無共感冒硩（teh，壓）落去，嗽起來，就啉檸檬泡蜂蜜，抑是檸檬紅茶；一杯一杯紲（suà，續）咧啉，一遍一遍去便所，感冒就好矣。二十外年來我毋捌為著感冒食藥仔，閣免講予醫生看。」

愈講愈聳勢（sáng-sè，神氣），「我本來真嚴重的焦目（乾眼）症，嘛是靠家己做目睭的運動，這兩年才無閣發作。連彼年，…..」

我本來紲落去欲講我逃過手術的偉大病史，大姊竟然講，「你家己做醫生喔？你有提著醫生執照無？」

原載2016.7.26《中華日報》副刋