被告保險公司的律師共原告律師講雙方上好是和解，伊的當事人會使付五萬美金；必要ê時，會當提懸（高）到七萬五。

法官轉來了後，被告律師講伊嘛欲去便所一下。

伊離開後，法官對原告律師講，「對方可能會要求和解。」

「伊已經開出和解金矣。」

「開偌濟？」

「五萬，嘛會當提懸到七萬五。」

「這个數目袂bái。」

兩个人根本是咧做戲，輪流無佇現場，較好講話，嘛無犯規的問題。

另外一齣戲，私家偵探去病院查資料，櫃檯職員明明揣出病歷矣，卻假仙講伊袂使漏洩病人的隱私：過兩秒鐘，伊講，「我來去斟一杯咖啡。」

偵探知影伊的意思，趁伊離開的時陣，探頭「偷看」著伊需要的物件。

看著這款劇情，我攏會想著兩个畫圖課的老師。

其中一个誠重視智慧財產權，現場示範的圖，阮袂使翕（hip，照相）。毋過，一半擺，老師會假無事人，行出去踅一下，逐家就趕緊倚去「偷翕」；翕甲真緊張，因為老師予阮的時間短短仔；時間siunn冗剩（liōng-siōng，太寬裕）就違反伊堅持的智財權主張啦。

另外一个老師畫好，就行去後面，講笑，「畫好，愛遠遠看，才看會出胎位正抑是無正。」

胎位正，無需要閣改，就予逐家翕。

就按呢，十外个同學排做一列，輪流翕。我pîn-tuānn（懶惰）排隊，kan-na（只）徛佇邊仔出大力欣賞，心內讚嘆，「水彩的流動特質表現甲遮爾媠！」越頭（轉頭）看逐家提著相機抑是手機佇畫架前等候的場面，竟然予我想著一張漫畫：一大片只有一欉大樹的荒埔仔，一二十隻狗仔規規矩矩排做一列，等欲放尿。

按呢想無消遣同學的意思，畫面的聯想攏是自然來的啊。

原載2016.7.8《人間福報》副刋