氣唔多好，不時有啲好密的細雨．．．

一早起身，酒店Check out就行去陶陶居飲茶，大家記住，除非好多人一齊去，如果唔係記住飲茶要喺12點前，因為12點後係飯市，但多人的話，點心都可以半打半打咁叫，一樣有得食！

呢度的點心，水準一樣咁好！

食飽咗就坐地鐵去番禺，不過我地係喺大石站落車，起初一出地鐵，就見到有好幾架電單車，同埋一片荒蕪．．．有一種捉蟲的感覺，我地去咗地鐵另一邊出口，呢一度就似樣少少，多少少車，但係都係有好多電單車同埋仲有可供四個人坐的電動車，至於的士，真係唔多覺眼！電單車同電動車就係呢個小區比居民的交通工具（同的士作用一樣），當然都會有公車，不過喺啲小街就一定唔會有。我地因為一人一袋行李，所以坐電動車去酒店，價錢都係$７,又落緊雨，價都唔講了，上車！唔洗三分鐘，就到酒店門口。

跟住兩夜都會住喺大石呢間七天酒店，個服務員的態度真係要讚，用廣東話同你溝通之餘仲非常好禮貌！佢仲話我知，我之前將會員咭無開到（但係我的確係用過喎！），要做過張，俾$40，不過佢即刻打上公司，同我做咗一次入住$77一晚的會員首次優惠，即係就算$77+$40，都平過我一晚會員價的房價（會員房價$139)！yeah！

放低行李，我地都有啲猶豫，因為個天落住毛毛雨，但最後都決定出去「大夫山森林公園」。

落到街，原本都煩惱緊坐咩車，因為酒店門口無公車直到，但係好好彩，俾我地見到萬中無一的的士呀！二話不說上車！

終於嚟到第二屆廣州櫻花文化節！$40入場費，原本應該幾抵，但係我地剛剛過咗櫻花最靚的時間，有好多已經掉落，不過都仲有啲櫻花樹有好多花！

Jason用佢的50D不斷影！

而我就帶埋Anpanman去影寫真！

我地行咗公園一圈！其實個公園真係幾靚，如果個天藍啲，無毛毛雨，咁就更加好！下年如果時間夾到開花的時間，再嚟過！

影咗一個下午，又差不多時間去搵食，又係坐公車返大石站（即係酒店對面），再打算行去之前喺網上地圖睇到的四川菜館，旦係行呀行呀！都唔見有．．．問下附近店舖，嗰個人竟然話：呢度直行，一千米之內就到。

吓！聽到嚇呆咗，佢地的步行單位，係以百米計算，好可怕哦！我地再向前行，打算放棄之際，終於見到啦！超開心！見到呢間川菜館好多人食緊，亦都好放心！

打開個menu一睇，水煮魚$48，勁抵呀！除咗主打水煮魚，仲叫一個辣子雞，蒜香骨，同一碗麵。喜愛食辣的我食得津津有味，而唔食得辣的Jason亦都一邊叫辣一邊不停夾嚟食！

唔好見水煮魚好辣，其實辣子雞辣過佢，但係Jason食得多過我！因為辣得過癮！

不過由於盤水煮魚太大太多，盤入面有好多芽菜好正，仲有好多扯麵喺入面，不過真係食唔晒，好浪費！

下次真係要再嚟食，好好味！！！