頂一站仔毋知按怎，雄雄去想著誠久無看歌仔戲矣，煞來買一張戲票，雖然講我有十外年無看歌仔戲矣，毋過我嘛是知影一寡有名的戲團，親像明華園、河洛、郭春美佮唐美雲，彼的時陣我佇兩廳院網站看著唐美雲無偌久就有公演，就來買一張票，劇名是「冥河狂想曲」。 

想袂到看煞了後，我竟然去迷著矣，這馬的歌仔戲哪會做甲遮呢仔好看呢？佈景袂輸西洋的舞台劇，有機關喔！打燈的手法嘛佮以早的歌仔戲無仝矣，有時陣會烏去，干焦留搬戲的人伊一个佇咧舞台頂，這款手法咧講故事是誠有意境，曲調嘛有加真濟新寫的，誠好聽呢！搬戲的人怹的身段嘛是仝款是真工夫，閣𠢕唱，查甫的扮相有緣投，查某的嘛真媠，上好的是，故事誠感動人，唐美雲確實是台灣這馬上蓋出名的小生之一，小咪佮許秀年嘛是寶刀未老，怹三个人共同合作講出一个真感動人的故事啊，少年的林芳儀嘛袂䆀，伊一个人一時仔演查甫的，一時仔閣演查某的，偌厲害呢，毋免驚無人傳承矣。

「冥河狂想曲」是共希臘羅馬神話的題材提來改做東方的故事，死亡之神千萬年來攏盡忠職守，無日無暝將死去的人𤆬去冥間，有一工伊感覺做𤺪矣，講伊欲辭頭路，冥后就講好，毋過伊愛先替冥后完成一項代誌，就是去揣人間的一位有名的音樂家替冥后寫歌，完成了後，伊就會使辭掉死亡之神的頭路，死神講好，伊就去人間欲完成這項任務，想袂到，這的決定竟然影響著伊的未來，這到底是怎樣咧？好啦，話都講到遮，有興趣的人會使閣等後一擺的公演喔。