到了十點鐘我就已經去旅行社拎左車票入去等車,不過架車11點先開要等一個鐘,入到火車站前都望一望長沙,停留左一日但呢一日無停過咁周圍去,好多地方我都好想入去玩但始終得一個人有好多事都好唔方便始終做唔到,所以有機會我會再返黎玩既,其實都唔係好遠丫!到夠鐘上火車希望佢係窗口位啦,夜晚雖然無風景睇但窗口位前有個位可以比我伏低訓下覺嘛,點知又係比走廊位我,唉......上到車出面開始落雨,望出去黑晒乜都睇唔到,但就勁易睇到閃電,只係見到個窗周不時係咁閃,雖然我好鐘意睇但我前一晚都係坐火車黎訓覺,之後又玩足一日都已經好累,所以我好快就昏迷左,但一路昏迷又要一路醒一醒睇下自己d錢,真係好煩!
印象中要搭5個鐘頭車先到張家界,所以我去到既時候已經半夜4點,一落車就見到有人舉起有我名既牌黎接我,覺得都幾威有人接~個人同我講仲有一個人,睇一睇係個女仔名,心諗又係單身黎玩唔知正唔正呢,之後見到佢原來係師奶一個,失望..........佢黎埋之後就一齊跑上去接我地既車,點解要跑?因為落緊狗屎,大家認為我會戴雨傘去旅客嗎?當然唔會啦~上到車就話接我地去酒店搵我地既導遊同休息一陣就出發,原來由市區入旅遊區要成粒鐘,唔洗講我都係繼續昏迷!到左之後以為咩酒店啦,同賓館無分別,但佢個名叫長城大酒店~入到去見到導遊,個導遊係一個又矮又肥既傻婆,唔係我賤格不過佢真係咁既款!上到房佢叫我休息一下7點起身,訓得果個幾鐘咋,都係大獲啦!