7點鐘就起身洗面出門口集合,落到去發現除左我同個領隊外,其他人都訓緊,你話有無攪錯,之後等埋佢地落到黎都8點鐘,食埋個早餐已經9點,心諗一早起身攪咁耐先出發真係麻煩,同團既團友係山西人,初頭覺得佢地好煩好多問題,慢慢熟左又唔係!第一站就車左我黎一間道教既地方,可惜我一d興趣都無,之後就進入張家界其中一個區域,進入之前要買門票,張票好似好先進咁用指紋黎進入,最重要既係收票果位姐姐好靚女!!!!入到去之後要搭攬車上山,當然你可以行上去不過幾個鐘先行到囉,上到去好凍好凍,而且非常大霧,前面10米既野都可以睇唔到,去到山邊睇山既時候要睇下好唔好彩,要等下有時有風會吹開d霧先睇到野...........就係咁一路行一路睇之後用左幾個鐘時間落山,落到山已經有d腳震震,食一食野仲要行一條溪,就係咁行到天黑食飯,食飯既時候班山西人好鐘意飲酒,係中國果d烈酒,雖然我都有興趣,但佢地不停要我飲,我唔掂話唔飲既時候佢地就話比個面啦香港黎既小兄弟,終於由飲一杯變左飲3杯,最後返到酒店我就嘔到死死下之後訓鬼左!