檀板響真係震到入心，南音學人唱下就獻醜在各人，有望各位諒解畀我地種種教訓，
因為盲人教學都係以口傳音，若果唱來唔合解兼唔合韻，但願各人聽到原諒我開眼盲人

恭祝各人從此行好運，港九兩地好景長新，江海到處流通無阻困，出產各物各到處通行

提綱幾句就唔再噚，等我略談錯日女嬌嫃，佢名叫瑞蘭係王氏既女，皆因走難失卻親人

兵荒馬亂狂風雨，佢躲入林中哭叫娘親，正好有位秀才世隆係蔣氏，亦在途中失散親妹衩裙

佢個妹叫故瑞蓮，咁就沿路叫，點想瑞蘭小姐又聽唔真，以為係佢親娘將佢搵，就出樹頭攬住個男人

狂風大雨芳心亂，誰知世隆打傘又要抽身，話賊兵到處週圍險，要趁天黑將妹尋

瑞蘭呢陣就心膽震，饑寒交迫淚沾襟，眼前書生似係人可靠，咁就拉住世隆希望帶佢同行

但係世隆自幼知書禮，話孤男寡女授受不親，而且關津渡口多盤問，至怕皇皇國法話佢拐帶良民

瑞蘭話可以認作同胞妹架，世隆話相貌不同兼唔同鄉音，瑞蘭心想佢人係正真，開口答話認作你夫人

世隆見佢孤身堪憐憫，料想我妹沿途亦係落難身，將心比心就將佢救，咁就同行上路批親尋

登山涉水又將佳人背，點想經霜歷凍世隆又被病魔侵，在客店醫療瑞蘭把湯藥煎，患難相扶就作情人

旅店到老問人厚道，主持佢兩人就結婚，後來瑞蘭老父回處將佢搵，在客店相逢見佢兩人。

老人唔念個女係世隆救，怪佢兩人私訂親，要佢將世隆來丟下，逼女上車回家行

返到家中要佢重婚配，瑞蘭小姐極怨深，怨父欺貧兼重富，話佢尚書千金不配賽貧

隨戶轉，暗消魂，春衫重整淚暗吞，料必我郎在旅店多怨恨，我閨中難免暗傷神

唉姻緣簿內錯點鴛鴦譜，故此和諧未續兩相分，自古、夫妻、難免有別，但係點會臨危丟下有病人

回憶個日店房同君別，重叫莫要憔悴莫咁愁深，我愈想愈思喉咽哽，想住生不同歡死也同墳

聲聲埋怨父情薄，爹呀你逼我回家要我另結鴛盟

細我詩禮之家豈有重婚婦，點把官門清舉敗壞犧牲。我思想起來心更苦呀，爹呀不存天理只欺貧，

當日若我離你為不孝，今日拋夫從父就是負義忘恩，想來孝行相全恩義短，枉我當日許願今日化泥塵

記得在店房公子有病，個陣我心寒膽震要日奉君，請醫調藥係奴手遞，望佢藥到回春佢可以漸精神

雖係典盡釵環都係我本願，只望佢病痊我就安心，未到雞聲我就早起。催轉早餐湯藥係各奉陳

寸步都不敢離君左右，每日三時五點就會手汗微沁，個陣君子病眼相看關住我，話我地係天生鸞鳳一雙人

佢重話可鑑人麗華張氏女，絳仙吳氏都無咁銷魂

我聽佢言辭就規勸佢，叫佢有病有身就要保重為真，佢話係年少夫妻認本份，靜中無事講下趣緻時聞

想起抱病相看還恩愛，唉今日天涯人隔兩相分，君呀縱死縱生尚有誰人采問呀，渴思難得可對誰人？

君呀孤單遠別離憤恨呀，若係思前想後怕你保命唔能

心切苦，淚悲淒，叫句君呀你今日有誰攜，我悲情慘痛在內底，適遇佢親娘在廳底，聽聞心肝女哭聲啼

好啦暫且入房中來一睇，夫人個陣移步入裏低，入房問句我地乖女呀，你為乜何事哭起生黎？

自係你父女重歸故里，鏡台花粉你又總唔施？自係途中失散娘和女，為娘終日淚悲啼

今日幸得相逢以為安樂哂，做乜你反為苦痛更加悲，我亦知父逼女另結姻緣個件事，你好對娘剖白你父點逼你返黎

女呀你私通定約有個詳和細，你重頭著二講過我知，自有為娘替你擔千紀，共你爭返啖氣，斷無任得你父無道理，你快快將因由講出黎

嬌下跪，訴情衷，幸得蒼天今日使母女兩重逢，皆因走難遇兵湧，家人失散各西東，我形單影隻愁萬種，確料煙塵四起路起雄

我腳細心荒難走動，出於無奈隱林中，以為賊兵去後娘尋到，誰料秀才喚女個名與我一個字同

我錯應了幾聲君子尋到，邂逅相逢事化空，隨後強徒蜂咁湧，佢為尋親妹要別女嬌容

一再哀求請帶我同上路，時令我寸心撩亂淚眼矇籠，我設身此地唔知如何好？我就求君子帶我亦尋蹤

君子重屢屢相推話離與共，佢話孤男寡女路上難同

佢又催問我如何是好 ，至怕賊人臨到慘過葉隨風，無奈我再求與君共，認作兄妹但係鄉音不同

我見得佢為人係為人厚重，提議認為夫妻把關衝，佢見我梨花帶雨似飄零燕，你話怎能教人忍話不相從

登山涉水徒勞佢，暫投旅店把身容，幸得店主娘佢情意重。重把我夫妻一對憐憫店房中

其中事情不講娘心曉，君係蔣姓鴻門表字世隆，誰料經霜歷雨君成病，正在調劑表寸衷

病在店房病未痊，偶遇爹爹來見話我係私通，立即逼我拆散鸞與鳳，使我心傷痛，愁萬種，我念君情如山重，我生不同衾死願穴同

聞女語，叫罷乖女瑞蘭，不須如此慘到咁交關，從此你放開肝與膽，無須為此減容顏

自古君當有過臣應諫，今日你爹無道娘要把佢阻攔，此段良緣係天同你揀，唔會將姻緣另外拆返，

呢段姻緣一定唔會散，為娘擔保破鏡重還，明日派人去店房探，話過蔣郎知道叫佢莫心煩

請個醫生來將佢病減，勸佢莫為你廢寢忘餐，女呀你自此就要添茶飯，免令女呀你損容顏

約佢花燭有期寬病限，安排花發待春還，水覆尚教能滿盞，自然就會合浦珠還，儒生遲早消災難，通吉誕

然後與乖女再得奠雁，個陣琴音再續，乖女呀你慢慢再談