唔知而家先記返十一遊記會唔會遲左d呢?^^””無辦法la.大家都知道台長有几懶.

話說今次係我第一次組織咁多人既旅行.搞過先知真係好麻煩(終于明白暑假華娃心情).又要定人數又要訂酒店又要定行程.車程時間費用乜都要計得妥妥當當.最慘係十一去旅行乜都要預先book好.即係話咩都要提早俾錢買定.回想起一次過匯晒我副2000蚊身家去訂酒店.終于試過有几日銀包真係真空(少于10蚊)既感覺=.=當然今次要好多謝健仔拔刀相助出住成千蚊既車錢.仲有就係榮偉夫婦提早到步幫我地搵到青年旅舍(超捧!!)旅程總算順順利利.呵.多謝大家配合^^

我地今次既目的地睇題目就好清楚la.唔係去斷腳.係去黃山啊!係去黃山整斷隻腳啊!

由10月3日下午一點半汽車到達屯溪.下午5點半到達.該晚入住青年旅舍.

到左屯溪.先知原來杭州真係算大城市.好明顯呢度完全係靠個黃山旅遊搵食既.仲有好似文房四寶之類都好出名.當然我對呢d係無興趣既.本身都無預到可以住d咩地方.求求其其几十蚊一晚就得la.點知呢度間青年旅舍比想像中正!

我旅行少.之前未住過青年旅舍.但其實全世界好多地方都會有呢d旅舍.聽聞係國際民間組織黎既.係車站仲俾d hard sell自己民宿既阿叔話咩青年旅舍好多外國人又多愛滋病.甚麼?愛滋?甚麼跟甚麼啊?簡直亂咁吹.

車站200米距離就到左旅舍.大佬.間野好明顯掂過隔離個d好多la.起碼無咁鄉村泥土味.係櫃台既招待員先生又好鬼好笑容同禮貎.完全無呢度d大陸佬既味道.簡直就係另一個世界咁(我好似誇張左少少=.=)當中最吸引我既就係相片中近住門口既牆壁.我可以講我可能會因為呢面牆既感覺而愛上旅行.旅舍入面既感覺太流浪la.好鬼似我暑假睇個套龜梨和也既sp日劇咁.身在異鄉都有呢種安定既感覺.身邊流動著無數個流浪者既興奮同喜悅.你會頓時覺得為自己是一個背包旅行者而自豪.

樓下係一個餐廳式布置.仲有一張有點殘舊既波台.仲記得明明第二日要淩晨5點起身搭車去黃山.而且仲係要保留體力去行山既.但係邪惡既事終于發生左la.竟然有人11點几提意玩killer!!而且發起人竟然係呆下呆下既阿婷!!呢一刻我係見到佢奸笑緊架.玩過先知原來我捉killer都算有天份.但一做killer就俾思恒發現我奇怪既笑容而洩露身份=.=好可悲.睇黎要加緊練習.終于玩到2點.

5-2=3.呢個睡眠時間証明左一樣野.就係我地輕視左黃山......

淩晨5點半車準時係屯溪出發到黃山.經過一個鐘到達.估唔到係黃山站仲要塔多程車上去山腳.好彩車費都係10蚊咁上下者.真正到達黃山門口的就係第一張相既位置.

因為第二日行程係夜晚住山頂既酒店.所以上山大家都几乎要揹晒大部分既行李.而且據說山上飲食又貴又差.所以大家都好醒目咁帶備干糧.每人基本都兩支水以上.但估唔到咁樣種下惡果.

一上山踏入第一級樓梯.就有d好好心既藍衣人員指路俾我地.根住好奇怪咁.几個藍衣人跟住我地行.原來佢地係專幫人帶行李上山既.事關佢見我地有d女仔帶左斜揹袋.又重又斜揹又行山確實係几辛苦.點知佢一件行李要200蚊(計重量的.忘了點計)咁梗係死都唔使la.點知行李俾預期中負擔重.山路又俾預期中辛苦.走左几百米就要停一停休息.個班藍衣人仲係尾隨後面.仲係度落井下石話呢度只係剛剛開始.後面有排辛苦啊咁.串到飛起啊!激死人!當然最後佢地都係奸計唔得逞.女生都好堅強啊.全程自己揹上山.

本身我地既行程預算係上埋天都峰.天都峰係黃山最險既峰.問過班藍衣人佢地話天都峰好鬼辛苦.基本山陡係75-90度.咩話?佢地几何差定係我耳仔有問題?90度?真係爬上去架?但係我地上山過程中.由山腳到山腰既途中已經見到有人開始用四肢上山=.=大家心知不妙.最後都係取消繞過天都峰既計劃.下面張相係天都峰最容易上去的一側.

到左呢個位置.再上一陣就係山腰la.唔係講笑.確實几辛苦.你地都可以話我平日無運動la.不過未試過每行300米就要停lo.事關d路真係好斜.辛苦度乘以10啊!不過好彩原來過左頭半路程之後既路普遍都好行左.不幸中之大幸啊.哈哈.

係相片位置多行20分鐘就到左玉屏樓.算係一個比較大既補給點都係一半路程既像征.呢度仲有一個收費既迎客松影相點.我地梗係旁邊偷影算數la.睇下時間.原來已經11點半.不知不覺已經行左將近4個鐘頭la.呵.係度停下食lunch先.生啃面包同零食=.=呢度d水既價格已經去到8蚊la...

12點半再次出發.途中經過一個地方叫”小心坡”.哥度d地形就係完全既山邊.即係一邊係山另一邊就真係可以跌落去個d.去到哥度我先發覺我真係有小小畏高.手腳都軟左d咁.但都唔夠嘉輝同candy利害.一個箭咁快跑左去.一個就死貼住山邊磅蟹式前進.哈哈~好好笑~基于驚佢以後嫁唔出既理由.佢出醜既照片係嚴禁外泄既.敬請原諒^_^不過哥度d風景真係超靚.可惜我地去哥几日陽光明媚.如果唔係就會見到黃山最出名既雲海啊!

一直行一直行.到達光明頂.距我地目的地還有四分之一路程la.光明頂呢個名都太有型la掛.唔知張無忌係唔係度.我只知道呢度d台灣腸10蚊3條.比起之前4蚊1條仲平左啊!之後人手一條.無計la.行左6個鐘咁泄先有少少肉落肚.話說呢個光明頂好似同金庸哥個無關係既.不過呢度係黃山里面第二高峰.有成18xx米高.最高峰因故被封了.而且呢度地方平台又夠大.係觀黃山日出既黃金地方.

因為之前我想激勵同伴既士氣.所以我專登呃佢地話要4點前趕到去酒店.若果唔係間房就會被取消.而家係下午2點鐘la.聽到佢地話:”死la.唔知趕唔趕得切”我心中偷笑.哈哈.

相中既地方叫做天海.地方好開闊好舒服.仲有d人爬出圍欄以外企係懸崖邊.真係睇見到都驚驚=.=中間既思恒成日叫我做爸爸.話要孝順我影張全家福.摸摸個頭.乖下~

經過既地方仲有出名既一線天.飛來峰等等.地勢都開始係下坡既多而趨向平坦.終于係5點.行左足足8個鐘到達目的地酒店.

山上起酒店唔簡單啊.所以雖然我地住既係4星級酒店.但環境都唔算太好.一間房4張碌架床.我地間房貴在有個獨立厠所.但因為山上物資短缺.尤其係淡水資源.所以連酒店供水都有分時段.夜晚6點到10點先可以沖涼.我地成房12人就出現輪流把握一分一秒沖涼既奇觀.

可能因為太過勞累既關係.我地沖完涼10點半就全房進入沈睡狀態.第二日朝早9點出發準備下山.

我地上山係行前山既路.而下山選擇左後山既路.路程相對短d又舒服d.我地分開左兩批人.一半途步行落山.一半就搭纜車.我份人懶嘛.哈哈.當然係搭纜車哥個.搭纜車落到山腳只需要十分鐘.但估唔到排對就排左成個鐘.搞到都只係比行落山個d早到半個鐘左右.11點半大家準時落到山腳車站.再經兩程車返到屯溪青年旅舍食個lunch.就返回杭州lo.完成3日2夜黃山行.

去完黃山發現左几件事:
1.45度既山路已經好鬼難行.60度既好鬼驚跌返落山=.=
2.原來自己既腳骨力還是可以既.哈哈
3.原來我真係有d畏高架>.<
4.一對adidas係可以捱完一程黃山崎嶇既山路而唔爛架
5....發現左無限能量既泉源...