──讀胡長松的台語詩集《棋盤街路的城市》

　　胡長松佇熱人的五月天，出版伊的頭一本台語詩集《棋盤街路的城市》（2008年5月，府城舊冊店出版）。集內有伊精心揀選的37首台語詩，成做一本成百頁，有熱帶港都氣味的青春詩篇。白底青字素面的冊皮，展現的毋那（m⁷-na⁷）是台語文學出版機制的隘（eh⁸）化，作家、詩人儉腸捏肚粒積銀兩出冊的省錢策略，同時嘛是對主流出版市場重封面五花十色，無的確注重內才的一種摳（khau）洗。

　　胡長松出身高雄內惟，自然的（tek）伊創作的營養分佮背景會聚焦佇伊的故鄉。Ui³華語長篇小說《柴山少年安魂曲》、《骷髏酒吧》、《烏鬼港》，一路寫到台語短篇小說集《燈塔下》、《槍聲》，無論是自然、寫實，抑是魔幻手路，胡長松的筆尖總是將高雄的「地誌書寫」深刻佇伊的文學座標，毋捌離開。

《棋盤街路的城市》這本透濫海洋氣味的青春詩篇，雖罔將書寫的座標hun³闊，ui³高雄擴展到規個台灣。不而過，無論書寫親情、描寫時代，基本上猶是離袂開ui³高雄出發的心志。方耀乾為《棋盤街路的城市》所寫的序文〈伊的高雄、親情kah時代〉指出這本詩集的在地意象：「胡長松的詩充滿著南台灣在地的意象，詩中充滿南方的色彩kah聲音，伊是用詩咧畫風景，咧奏音樂的。胡長松的詩毋是以激造語言為本的，是以真情kah思想深度建構起來的。其中有大時代的縮影，親情的牽挽，土地的思戀。」

佮詩集仝名的〈棋盤街路的城市〉，就是一首書寫「土地的思戀」的真情詩作。作者佇家己心肝內描畫一張城市的地圖，這張地圖內面有其他所在仝款有的「菜市仔、西藥房、文具行、學校、郵局……」，嘛有別位罕得有的「運河、港口」。總是，佇62畷（tsua⁷）詩行內面，胡長松並無寫kah一字半句明確的高雄景點，親像「西仔灣、柴山、愛河……」等。安呢，顛倒會當予規首詩跳脫景點描寫的「浮光掠影」，將時間佮空間扭（giu²）遠。伊透過佮第二人稱「你」對話的方式，以小說描寫的筆法，逗逗仔ka⁷伊四箍輦（lian²）轉的故事講出來。「你」其實是胡長松本身，「你」同時嘛是讀〈棋盤街路的城市〉的每一位讀者。「你」的阿媽「位燒霧ｅ路ｅ對面行過來/身軀晃咧晃咧/手裡摜一支銀色ｅ茶壺」，這款形象化的書寫，佇胡長松的詩集裡，逐不時攏相拄會著，這是伊成做小說家寫詩的才情。

宋澤萊認為，親像胡長松這款寫實的詩，無需要用著「比喻」，它需要的是真拄真的「描寫」功夫，若無寫實功力的人，根本寫無路來。筆者佇詩集的序文指出：「伊用小說家ｅ筆路彩畫詩篇，歸本詩集讀透透，咱會發現這是一本透濫小說氣味ｅ五彩詩篇。」

　　講著「五彩詩篇」，咱先來讀這首〈入眠〉：「踏過燈火閃熠ｅ城市暗暝，/遠遠ｅ山行入我ｅ房內。//戴一頂溼氣霧重ｅ青翠葉影　合/天頂秋沁ｅ藍寶石天星所織ｅ夜雲之帽，/頷仔頸箍一條銀色溪水ｅ絲仔領巾。//山埔ｅ夜鷺嘛綴入來，/伊翅仔尾拖著長長道卜消失ｅ/黃昏七色ｅ彩帶。//值山ｅ後壁，海湧褫開夢ｅ螺扇，/恬恬坐店我ｅ床邊。//今仔日，明仔載，後日，/寂靜中一欉時間之樹吐芛，//幾個囝仔行過我ｅ身邊，/拍phok仔，唸歌，箍詩仔，/我倒值樹腳沉沉入眠……」。

　　關係胡長松的〈入眠〉，宋澤萊捌寫過一篇評論。伊指出這首詩內面的意象非常豐富，包含「燈火閃熠e城市」、「遠遠e山」、「藍寶石天星」、「銀色溪水e絲仔領巾」、「七色e彩帶」等，「都附帶了顏色和狀態的形容詞，使本詩的意象異常的鮮活，本來夜晚應該是沒有顏色的，現在居然有那麼豐富的顏色。」

　　〈值五福橋頂〉，胡長松以講故事的方式，寫出73畷的長詩。伊心悶愛河佮愛河邊的五福橋，以及佇橋的四箍輦轉所發生的故事。無論是青年男女佇橋頂kiss的浪漫，抑是點灼紅色電火球仔的低厝間裡查某人的滄桑，甚至由五福橋假扮電影「八百壯士」裡的蘇州橋這種譀（ham³）古，攏是伊少年時代無法度放袂記的深刻記智。胡長松有幾落年的時間，離開故鄉高雄出外讀冊，「阿小酒館ｅ音樂聲/道化做我e鄉愁/我時常會值夢中ｅ五福橋頂/看見海鳥ｅ身軀貼近五彩ｅ愛河/翅鼓振動/一直飛深入去」。

　　囝仔時的記智，深深牢（tiau⁵）佇胡長松的腦海裡，遮的畫面毋是白洴（tsiann²）無味的素描，是一幅一幅童年的彩色圖像。大漢了後，伊將記智的底片剪接成詩，tshua⁷咱倒轉去三十冬前看會著田蛤仔、芋仔園、菱角田的故鄉。小學一年彼個薄霧的早起，綠色光線照著媽媽用來pue²目屎，霜凍pit sun⁵ ｅ手婆。下課時間，學校的紅牆仔邊，看著媽媽包頭巾，佇新舖的點仔膠路耙粟仔，「日光蒸起來/遐　一壟一壟ｅ/金黃色ｅ粟仔/親像流動ｅ熱湧　滾絞」（〈下課時間〉）。胡長松透過詩筆重現囝仔時的場景，將伊對媽媽的愛，一幕一幕深深刻劃出來。

胡長松參天下間所有做人老爸的查甫人仝款，惜子疼子，為怹（in）寫出九首「予囝仔ｅ情歌」。以超音波所翕（hip）的第一張大頭相，伊看著囝仔「恬恬值媽媽ｅ腹肚內底/有肥軟膨皮ｅ嘴phoe²，/目睭瞌瞌/嘴唇褫開親像底笑」(〈第一張大頭相〉)。〈有時爸爸值夢中〉嘛是伊對寶貝仔子的深情疼愛之作，「有時爸爸值夢中/會聽見你親像風鈴仔ｅ笑聲/掛在秋陽ｅ窗邊/爸爸雙手將你夯懸/你柔軟ｅ頭毛/道值旋轉ｅ風中飄動」、「有時爸爸值夢中/耳孔貼著你勻勻仔ｅ心跳/彼時你猶值媽媽ｅ腹肚裡/阿天使，歇在銀河ｅ岸邊/伊ｅ翅鼓/擱(khoe³)在熠熠ｅ天星之間」。

　　《棋盤街路的城市》最後一輯「港口之歌」，確實有海洋城市的青春氣味。〈港口日出〉、〈風甲雨來到港口〉、〈愛情碼頭ｅ一粒流星〉，胡長松功夫盡展，以台語詩壇罕得有的技巧，充分展現海波浪的意象、海港的故事佮五彩的色緻。

　　其實，敖講故事、盡展詩藝的胡長松，是一位有宗教信仰的基督徒。佇文學創作的路裡，減采信仰會當予伊喟（khui³）力，繼續行這條坎坎坷坷的台語文學路。咱最後來讀這首有厚厚宗教味的序詩〈我有一個夢〉：「值夢中，我ｅ心肝未閣為著不義驚嚇/因為我知影，上帝會賜我有夠ｅ力量//賜我勇氣講出我ｅ心內話/未有暗嵌，嘛未有虛華ｅ膨風//予我ｅ心充滿色緻親像花蕾/Sak開肉體ｅ軟弱合烏暗ｅ數想//予我瞭解我ｅ過錯/而且我ｅ過錯，會予我暗中傷害ｅ人所瞭解//安呢，我才有機會/向望殷ｅ原諒//予我有淡薄仔智慧去發見人性ｅ良知合美麗/存在值萬物之中ｅ氣力，生命ｅ秘密//時常會使帶著微笑ｅ面容/行值故鄉ｅ小路」。

──2008.6.2寫佇赤嵌米街

    2008.12《海翁台語文教學季刊》第二期