2006-08-28 00:22:15wagi-sun
詩ｅ見證
──論林文平《時間的芳味》
詩人ｅ養成需要年久月深ｅ自我鍛煉佮社會栽培，特別是置戰後華語体制長成ｅ台語詩人。一般的來講，戰後第一代台語詩人多數置創作台語詩進前，已經踮華語文壇享有相當ｅ文名，顯例像林宗源、宋澤萊、林央敏、黃勁連、李勤岸等；戰後第二代多數攏是台語文學運動發展成十冬了後，因緣夯筆頭起先就以母語書寫詩篇，親像陳金順、林文平、陳正雄、方耀乾、周定邦等。論真講起來，第二代除了方耀乾少年時受過西洋文學ｅ長期訓練，一出手就維持一定ｅ詩質以外；其他幾人，無論風格相對多變ｅ陳金順、周定邦，抑是手路卡定著ｅ林文平、陳正雄，攏經過相當ｅ時間，才逗逗仔掠著寫詩ｅ鋩角。
林文平自1996年踏入台語文壇，到旦(2006)拄好十年，攏總出兩本詩集：《黑松汽水》(2001.9百合文化出版)、《時間的芳味》(2006.10百合文化出版)，誠拄好兩本詩集攏收錄32首台語詩。佮仝沿ｅ詩人比起來，你袂凍嫌林文平懶尸吐詩，減采是伊做人顧謙惜墨水，若無就是詩思囥踮腦中，等甲發酵才欲出泉。借一句評論者施俊州定定掛置嘴邊ｅ話：「文學史是殘酷ｅ！」詩行ｅ長短、詩量ｅ濟少，未必然成做評判一位詩人成績佮地位ｅ標準。若安呢，咱就愛直接讀林文平ｅ文本，了解伊寫詩ｅ才情佮詩風特質。
「林文平ｅ詩風樸實，恬恬為時代ｅ變遷作有力ｅ見證。」以上是《台語詩新人選》(2003.2金安出版)編者為林文平所做ｅ紹介。另外，林央敏為仝本冊寫ｅ話頭認為林文平ｅ特色「寫實帶諷刺」。若用即兩段話來檢驗林文平近期出版ｅ第二本詩集《時間的芳味》，猶原會凍看出濟濟詩篇適用。咱先來讀＜卡拉OK之戀＞(原刊《海翁台語文學》第36期)：
變色的文字/共多情的節奏牽咧/chua7阮離開這個疲勞厭sian7的都市
阮用嚨喉佮mai3-kuh4談情/用喙唇和酒杯說愛/酒 一杯一杯/心頭愈lim愈 定/mai3-kuh4 一句一句/愈唱愈旺聲/沉佇酒杯內的歌聲/予熱情噗仔聲/溢 出酒杯外/殘殘將這個月的業績/佮頭家的面漚面臭/揳出去包廂的門跤口
盈暗東倒西歪的酒矸仔/扑敗歸街仔路的空虛/mai3-kuh4戰贏全都市的虛微
結數了後/阮以勝利者的架勢/將身影留佇包廂/繼續逍遙/身軀仝款去迎接明 仔再/排山倒海的/沉重
即首詩描寫一位失意業務員，下班了後去卡拉OK店買醉，暫時將日時ｅ失志「揳出去包廂的門跤口」，歸首詩寫實帶諷刺，其實筆者認為詩人透過摳洗ｅ手法，表達伊對中下階層為生活走闖、萬般無奈ｅ同情。這種對勞動者ｅ同情，集內猶有＜動－計程車－靜＞、＜燈下人生＞兩首，分別關照運將先生佮夜市仔攤販ｅ心酸、苦楚。特別是＜動－計程車－靜＞(原刊2002.12.31《島鄉台語文學》第29號)，雖罔詩內最後三句形容運將「用四個輪仔托一世人的/孤/單」，有同情、虛微意味，筆者特別欣賞頭一段「發動一個城市」ｅ正面寫法。即首詩分別入選《台語詩新人選》、《台語詩一世紀》(2006.3前衛出版)，絕對有它特出ｅ所在，全詩如下：
一支鎖匙/發動一個城市/車窗起起落落/控制城市的音量/速度將街仔路行一條/流動的黃
過客千千萬萬/用一秒鐘的因緣/佇路邊堅凍/靜/千斤萬斤/予警廣的路況扑破
？/是車窗外閃熾的青紅燈/抑是/車內跳無停的meta表/塊安慰/用四個輪仔托一世人的/孤/單
囥置參詩集仝名「卷一 時間的芳味」內底ｅ頭一首詩＜西仔灣＞(原刊《海翁台語文學》第18期)，是歸本詩集內底，上會凍映證「恬恬為時代ｅ變遷作有力ｅ見證。」即句話ｅ詩篇。特別是對「兩百外冬前的海湧∕滾絞英國人、日本人佮滿清的跤跡」ｅ感嘆，有歷史ｅ滄桑氣味。筆者欣賞尾段「柑仔色的海風∕有一陣一陣歷史的芳味」，將色緻佮氣味透濫，描寫西仔灣黃昏ｅ特殊筆法，個人認為是神來之筆。若欲鼻出「時間的芳味」，必須愛歸首詩自頭到尾加讀幾遍，体會坐踮紅毛城頂飲咖啡，欣賞西仔灣落日ｅ自然美景，互歲月ｅ滄桑「流浪到21世紀」：
歸高雄的繁榮攏坐佇貨船頂∕恬恬將時間徙位∕海湧有情無情∕扑佇柴山的跤頭窩∕遠遠看去∕毋管是仁者∕抑是智者∕海誓山盟是上好的證明
兩百外冬前的海湧∕滾絞英國人、日本人佮滿清的跤跡∕佇搖搖晃晃的年代∕浮浮沉沉∕紅毛城的滄桑∕佮旗后燈塔遙遙對相∕兩條歲月的平行線∕做伙流浪到21世紀
黃昏∕柑仔色的海風∕有一陣一陣歷史的芳味∕將日頭迷倒佇天邊∕天地用見笑轉受氣的色緻∕將西仔灣的一工熔去
卷一頭尾兩首攏是傑作，押後ｅ＜正月22迄暝＞減少時間ｅ滄桑感，卻是擴大空間ｅ範圍，將夜空、宇宙無邊ｅ意象，囥踮詩行中間，透過隱喻(「繡一粒寒星/證明夜空是一個/無寸尺的液晶螢幕」、「微微的月光是一枝煎匙」、「月光是線」、「相思是風吹」)ｅ修辭技巧，營造出浪漫ｅ詩意美學。假使相思是風吹，「毋知佗一個戇直的讀冊人∕想卜共這隻風吹揹咧∕行一世人」，咱作夥來觀賞「無寸尺的液晶螢幕」：
繡一粒寒星/證明夜空是一個/無寸尺的液晶螢幕
只是/微微的月光是一枝煎匙/定定摻酸酸的暗風/佇眠床頂共我反來反 去/結果煎出一盤/比夜空擱卡大的相思
原來/月光是線/相思是風吹/無始劫以來/早著佇宇宙中漂浪
毋知佗一個戇直的讀冊人/想卜共這隻風吹揹咧/行一世人
長詩、短詩攏有可能寫出好詩。施俊州捌舉一個意象鮮明ｅ例：『「彼條白色的布條/摧死一個時代」二行台語詩拄一tolaku華語詩閣有找』(寂寞，或是鬧熱的花園：《菅芒花》詩刊的文學實踐kah內涵試論)，就是指方耀乾寫ｅ＜五妃廟落日＞四畷短詩ｅ挽句。過去林央敏編ｅ《茄苳》捌辦過「挽詩花」ｅ活動，可惜無形成風氣。
林文平前後兩本詩集，筆者給定義作短詩集，64首詩內面，干單兩首勉強跨過30畷，偆ｅ多數攏是一、二十畷ｅ短詩。《時間的芳味》有六首組詩，內面每葩攏無超過十畷，我給號作短節詩(類似小說ｅ「極短篇」)，前看後看選出兩葩詩花互逐家鼻芳：「秋風真粗殘/一暝著共汝舞甲遮臭老」(「荖濃溪短句」＜菅芒＞)、「用溫溫仔火∕焄一鼎夕陽」(「時間組曲」＜消失＞)。
自古以來，情詩佔所有詩篇ｅ大宗，它ｅ地位重要，而且產生袂少流傳千古、藝術性誠懸ｅ作品。戰後台語情詩發展ｅ跤步有卡慢，林央敏置＜古今台語情詩的類型分析＞即篇論文內底指出：「戰後台語情詩稀少的原因，主要在於具台灣意識並有語言覺醒而開始台語寫作的詩人都已『【老過】彼段男歡女愛、鴛鴦蝴蝶的歲頭矣，而且關懷的重點會囥置【救台灣】，也就是反抗外來政權對台灣的種種凌治，因此台語的情愛詩才會特別少。』」1996年27歲夯筆創作台語詩ｅ林文平，創作年齡比多數台語詩人猶卡早，嘸過，前到旦干單看著收錄置本冊ｅ兩首情詩，其中原因ｅ探討嘸是本文主要ｅ任務，留待以後有趣味ｅ研究者去深掘。
拍開＜情批＞，無看著「啥麼海誓山盟」，只有淡薄仔甜甜酸酸ｅ滋味，減采是即種少年初戀ｅ滋味，使作者置數學被老師當掉ｅ苦澀下底，猶會凍發揮詩思，透過夸飾ｅ修辭法產生第二段「所有的方程式攏是甜的」等詩句，讀者明明知影言過其實，嘸過會心甘情願沈迷其中，這是作者高明ｅ所在。咱作夥逗逗仔來啖即首情詩ｅ氣味：
扑開這張情批/糖甘蜜甜/汝無寫啥麼海誓山盟/只不過是阮迄個可惡的數學老師/共我的數學當掉/汝寫批共我安慰/擱答應卜陪我重修
迄年歇熱/數學會生蚼蟻/所有的方程式攏是甜的/微積分是甜的/熱天是甜的/甜佇阮馬西馬西的心肝底
今 十外冬都過去矣/數學我嘛修過矣/汝煞共我的愛情當掉/到今攏無人陪我重修
扑開這張情批/我的鼻頭是酸的/ 目油是鹹的/酸酸鹹鹹變成一種懷念
＜蓮池潭＞是林文平1990年ｅ華文原作，16冬後伊詩藝漸漸成熟，並且轉換台語修改定稿。詩人運用隱喻(「池水是電視」)、轉化(「情話會藏水bi7」、「連半屏山嘛溶佇水面」)等修辭法，並且透過「電視、日頭雨傘、熱門歌曲、火爐、遙控器、蓮花」等意象，營造出對過往愛情ｅ想像佮現實場景ｅ交替，位熱戀到悲戀ｅ心理過程。歸首詩ｅ藝術美感在＜情批＞之上，咱鬥陣來去蓮池潭一遊：
我唯池邊行過/池水是電視 一幕/少年時的甜蜜/攏錄佇池中
迄下晡/咱兩人宓佇日頭雨傘下跤/鯽仔魚共汝印佇水面的/笑容 唚一下
青春煞變成一首熱門歌曲/歸個蓮池潭攏綴塊 搖搖擺擺/情話會藏水bi7/佇水底佮鯽仔魚 迮來迮去/意愛的火爐/予溫度嗆峘/連半屏山嘛溶佇水面
雄雄 毋知啥人/共遙控器chih8一下/一蕊蓮花 微微仔笑/池水當塊坐禪
頭前有講林文平寫詩ｅ手路定著，若將兩本詩集掀開，一首啊一首讀落來，其實會發現伊詩藝進步ｅ痕跡。位《黑松汽水》到《時間的芳味》，題材雖罔多元，寫親情、鄉情、愛情、環保、社會批判、弱勢關懷等，嘸過，筆者認為林文平猶未形成個人特殊ｅ風格。台語詩人普遍攏置時間被嚴重分割ｅ閬縫寫詩，十冬ｅ時間欲培養一位成熟詩人，老實講無啥可能，除非伊是天才，若無就愛有實腹ｅ文學底蒂，可惜即款人世間無濟。咱閣互林文平五冬、十冬鍛煉詩筆，只要伊綿爛讀詩、掘詩、吐詩，成做台語詩壇ｅ一枝大柱，只是時間早慢ｅ問題。
雖罔長詩、短詩攏有可能寫出好詩。嘸過，筆者置茲映望林文平參伊仝沿ｅ詩人朋友，愛有曠闊ｅ企圖心，詩ｅ版圖畫互卡闊咧，認真鍛煉詩藝，加強長詩ｅ塑造能力，泛勢未來有可能創作出新ｅ台灣史詩。
最後，咱來＜讀山＞(原刊《菅芒花詩刊》革新號第4期)，即首詩是歸本詩集內底，筆者上偏愛ｅ佳作：
種一款堅定/等風/等雲/等鄉愁
暗時偷吞冷冷的月/日時照起工吐出炎炎的日頭/佇吞吞吐吐之間/掩坎真濟歲月的故事
三不五時仔/辿兩條清泉/試五臟六腑的深度/發幾欉仔古松/佮無名無姓的草花/做喙鬚/佇風來的時 搖頭/佇雲來的時 藏尾/講出盤古開天以來的/靜
偆的/著讓予玉山去/皂烏漆白
──2006.8.27寫置埔姜頭
2006.10《台文戰線》第4號
詩人ｅ養成需要年久月深ｅ自我鍛煉佮社會栽培，特別是置戰後華語体制長成ｅ台語詩人。一般的來講，戰後第一代台語詩人多數置創作台語詩進前，已經踮華語文壇享有相當ｅ文名，顯例像林宗源、宋澤萊、林央敏、黃勁連、李勤岸等；戰後第二代多數攏是台語文學運動發展成十冬了後，因緣夯筆頭起先就以母語書寫詩篇，親像陳金順、林文平、陳正雄、方耀乾、周定邦等。論真講起來，第二代除了方耀乾少年時受過西洋文學ｅ長期訓練，一出手就維持一定ｅ詩質以外；其他幾人，無論風格相對多變ｅ陳金順、周定邦，抑是手路卡定著ｅ林文平、陳正雄，攏經過相當ｅ時間，才逗逗仔掠著寫詩ｅ鋩角。
林文平自1996年踏入台語文壇，到旦(2006)拄好十年，攏總出兩本詩集：《黑松汽水》(2001.9百合文化出版)、《時間的芳味》(2006.10百合文化出版)，誠拄好兩本詩集攏收錄32首台語詩。佮仝沿ｅ詩人比起來，你袂凍嫌林文平懶尸吐詩，減采是伊做人顧謙惜墨水，若無就是詩思囥踮腦中，等甲發酵才欲出泉。借一句評論者施俊州定定掛置嘴邊ｅ話：「文學史是殘酷ｅ！」詩行ｅ長短、詩量ｅ濟少，未必然成做評判一位詩人成績佮地位ｅ標準。若安呢，咱就愛直接讀林文平ｅ文本，了解伊寫詩ｅ才情佮詩風特質。
「林文平ｅ詩風樸實，恬恬為時代ｅ變遷作有力ｅ見證。」以上是《台語詩新人選》(2003.2金安出版)編者為林文平所做ｅ紹介。另外，林央敏為仝本冊寫ｅ話頭認為林文平ｅ特色「寫實帶諷刺」。若用即兩段話來檢驗林文平近期出版ｅ第二本詩集《時間的芳味》，猶原會凍看出濟濟詩篇適用。咱先來讀＜卡拉OK之戀＞(原刊《海翁台語文學》第36期)：
變色的文字/共多情的節奏牽咧/chua7阮離開這個疲勞厭sian7的都市
阮用嚨喉佮mai3-kuh4談情/用喙唇和酒杯說愛/酒 一杯一杯/心頭愈lim愈 定/mai3-kuh4 一句一句/愈唱愈旺聲/沉佇酒杯內的歌聲/予熱情噗仔聲/溢 出酒杯外/殘殘將這個月的業績/佮頭家的面漚面臭/揳出去包廂的門跤口
盈暗東倒西歪的酒矸仔/扑敗歸街仔路的空虛/mai3-kuh4戰贏全都市的虛微
結數了後/阮以勝利者的架勢/將身影留佇包廂/繼續逍遙/身軀仝款去迎接明 仔再/排山倒海的/沉重
即首詩描寫一位失意業務員，下班了後去卡拉OK店買醉，暫時將日時ｅ失志「揳出去包廂的門跤口」，歸首詩寫實帶諷刺，其實筆者認為詩人透過摳洗ｅ手法，表達伊對中下階層為生活走闖、萬般無奈ｅ同情。這種對勞動者ｅ同情，集內猶有＜動－計程車－靜＞、＜燈下人生＞兩首，分別關照運將先生佮夜市仔攤販ｅ心酸、苦楚。特別是＜動－計程車－靜＞(原刊2002.12.31《島鄉台語文學》第29號)，雖罔詩內最後三句形容運將「用四個輪仔托一世人的/孤/單」，有同情、虛微意味，筆者特別欣賞頭一段「發動一個城市」ｅ正面寫法。即首詩分別入選《台語詩新人選》、《台語詩一世紀》(2006.3前衛出版)，絕對有它特出ｅ所在，全詩如下：
一支鎖匙/發動一個城市/車窗起起落落/控制城市的音量/速度將街仔路行一條/流動的黃
過客千千萬萬/用一秒鐘的因緣/佇路邊堅凍/靜/千斤萬斤/予警廣的路況扑破
？/是車窗外閃熾的青紅燈/抑是/車內跳無停的meta表/塊安慰/用四個輪仔托一世人的/孤/單
囥置參詩集仝名「卷一 時間的芳味」內底ｅ頭一首詩＜西仔灣＞(原刊《海翁台語文學》第18期)，是歸本詩集內底，上會凍映證「恬恬為時代ｅ變遷作有力ｅ見證。」即句話ｅ詩篇。特別是對「兩百外冬前的海湧∕滾絞英國人、日本人佮滿清的跤跡」ｅ感嘆，有歷史ｅ滄桑氣味。筆者欣賞尾段「柑仔色的海風∕有一陣一陣歷史的芳味」，將色緻佮氣味透濫，描寫西仔灣黃昏ｅ特殊筆法，個人認為是神來之筆。若欲鼻出「時間的芳味」，必須愛歸首詩自頭到尾加讀幾遍，体會坐踮紅毛城頂飲咖啡，欣賞西仔灣落日ｅ自然美景，互歲月ｅ滄桑「流浪到21世紀」：
歸高雄的繁榮攏坐佇貨船頂∕恬恬將時間徙位∕海湧有情無情∕扑佇柴山的跤頭窩∕遠遠看去∕毋管是仁者∕抑是智者∕海誓山盟是上好的證明
兩百外冬前的海湧∕滾絞英國人、日本人佮滿清的跤跡∕佇搖搖晃晃的年代∕浮浮沉沉∕紅毛城的滄桑∕佮旗后燈塔遙遙對相∕兩條歲月的平行線∕做伙流浪到21世紀
黃昏∕柑仔色的海風∕有一陣一陣歷史的芳味∕將日頭迷倒佇天邊∕天地用見笑轉受氣的色緻∕將西仔灣的一工熔去
卷一頭尾兩首攏是傑作，押後ｅ＜正月22迄暝＞減少時間ｅ滄桑感，卻是擴大空間ｅ範圍，將夜空、宇宙無邊ｅ意象，囥踮詩行中間，透過隱喻(「繡一粒寒星/證明夜空是一個/無寸尺的液晶螢幕」、「微微的月光是一枝煎匙」、「月光是線」、「相思是風吹」)ｅ修辭技巧，營造出浪漫ｅ詩意美學。假使相思是風吹，「毋知佗一個戇直的讀冊人∕想卜共這隻風吹揹咧∕行一世人」，咱作夥來觀賞「無寸尺的液晶螢幕」：
繡一粒寒星/證明夜空是一個/無寸尺的液晶螢幕
只是/微微的月光是一枝煎匙/定定摻酸酸的暗風/佇眠床頂共我反來反 去/結果煎出一盤/比夜空擱卡大的相思
原來/月光是線/相思是風吹/無始劫以來/早著佇宇宙中漂浪
毋知佗一個戇直的讀冊人/想卜共這隻風吹揹咧/行一世人
長詩、短詩攏有可能寫出好詩。施俊州捌舉一個意象鮮明ｅ例：『「彼條白色的布條/摧死一個時代」二行台語詩拄一tolaku華語詩閣有找』(寂寞，或是鬧熱的花園：《菅芒花》詩刊的文學實踐kah內涵試論)，就是指方耀乾寫ｅ＜五妃廟落日＞四畷短詩ｅ挽句。過去林央敏編ｅ《茄苳》捌辦過「挽詩花」ｅ活動，可惜無形成風氣。
林文平前後兩本詩集，筆者給定義作短詩集，64首詩內面，干單兩首勉強跨過30畷，偆ｅ多數攏是一、二十畷ｅ短詩。《時間的芳味》有六首組詩，內面每葩攏無超過十畷，我給號作短節詩(類似小說ｅ「極短篇」)，前看後看選出兩葩詩花互逐家鼻芳：「秋風真粗殘/一暝著共汝舞甲遮臭老」(「荖濃溪短句」＜菅芒＞)、「用溫溫仔火∕焄一鼎夕陽」(「時間組曲」＜消失＞)。
自古以來，情詩佔所有詩篇ｅ大宗，它ｅ地位重要，而且產生袂少流傳千古、藝術性誠懸ｅ作品。戰後台語情詩發展ｅ跤步有卡慢，林央敏置＜古今台語情詩的類型分析＞即篇論文內底指出：「戰後台語情詩稀少的原因，主要在於具台灣意識並有語言覺醒而開始台語寫作的詩人都已『【老過】彼段男歡女愛、鴛鴦蝴蝶的歲頭矣，而且關懷的重點會囥置【救台灣】，也就是反抗外來政權對台灣的種種凌治，因此台語的情愛詩才會特別少。』」1996年27歲夯筆創作台語詩ｅ林文平，創作年齡比多數台語詩人猶卡早，嘸過，前到旦干單看著收錄置本冊ｅ兩首情詩，其中原因ｅ探討嘸是本文主要ｅ任務，留待以後有趣味ｅ研究者去深掘。
拍開＜情批＞，無看著「啥麼海誓山盟」，只有淡薄仔甜甜酸酸ｅ滋味，減采是即種少年初戀ｅ滋味，使作者置數學被老師當掉ｅ苦澀下底，猶會凍發揮詩思，透過夸飾ｅ修辭法產生第二段「所有的方程式攏是甜的」等詩句，讀者明明知影言過其實，嘸過會心甘情願沈迷其中，這是作者高明ｅ所在。咱作夥逗逗仔來啖即首情詩ｅ氣味：
扑開這張情批/糖甘蜜甜/汝無寫啥麼海誓山盟/只不過是阮迄個可惡的數學老師/共我的數學當掉/汝寫批共我安慰/擱答應卜陪我重修
迄年歇熱/數學會生蚼蟻/所有的方程式攏是甜的/微積分是甜的/熱天是甜的/甜佇阮馬西馬西的心肝底
今 十外冬都過去矣/數學我嘛修過矣/汝煞共我的愛情當掉/到今攏無人陪我重修
扑開這張情批/我的鼻頭是酸的/ 目油是鹹的/酸酸鹹鹹變成一種懷念
＜蓮池潭＞是林文平1990年ｅ華文原作，16冬後伊詩藝漸漸成熟，並且轉換台語修改定稿。詩人運用隱喻(「池水是電視」)、轉化(「情話會藏水bi7」、「連半屏山嘛溶佇水面」)等修辭法，並且透過「電視、日頭雨傘、熱門歌曲、火爐、遙控器、蓮花」等意象，營造出對過往愛情ｅ想像佮現實場景ｅ交替，位熱戀到悲戀ｅ心理過程。歸首詩ｅ藝術美感在＜情批＞之上，咱鬥陣來去蓮池潭一遊：
我唯池邊行過/池水是電視 一幕/少年時的甜蜜/攏錄佇池中
迄下晡/咱兩人宓佇日頭雨傘下跤/鯽仔魚共汝印佇水面的/笑容 唚一下
青春煞變成一首熱門歌曲/歸個蓮池潭攏綴塊 搖搖擺擺/情話會藏水bi7/佇水底佮鯽仔魚 迮來迮去/意愛的火爐/予溫度嗆峘/連半屏山嘛溶佇水面
雄雄 毋知啥人/共遙控器chih8一下/一蕊蓮花 微微仔笑/池水當塊坐禪
頭前有講林文平寫詩ｅ手路定著，若將兩本詩集掀開，一首啊一首讀落來，其實會發現伊詩藝進步ｅ痕跡。位《黑松汽水》到《時間的芳味》，題材雖罔多元，寫親情、鄉情、愛情、環保、社會批判、弱勢關懷等，嘸過，筆者認為林文平猶未形成個人特殊ｅ風格。台語詩人普遍攏置時間被嚴重分割ｅ閬縫寫詩，十冬ｅ時間欲培養一位成熟詩人，老實講無啥可能，除非伊是天才，若無就愛有實腹ｅ文學底蒂，可惜即款人世間無濟。咱閣互林文平五冬、十冬鍛煉詩筆，只要伊綿爛讀詩、掘詩、吐詩，成做台語詩壇ｅ一枝大柱，只是時間早慢ｅ問題。
雖罔長詩、短詩攏有可能寫出好詩。嘸過，筆者置茲映望林文平參伊仝沿ｅ詩人朋友，愛有曠闊ｅ企圖心，詩ｅ版圖畫互卡闊咧，認真鍛煉詩藝，加強長詩ｅ塑造能力，泛勢未來有可能創作出新ｅ台灣史詩。
最後，咱來＜讀山＞(原刊《菅芒花詩刊》革新號第4期)，即首詩是歸本詩集內底，筆者上偏愛ｅ佳作：
種一款堅定/等風/等雲/等鄉愁
暗時偷吞冷冷的月/日時照起工吐出炎炎的日頭/佇吞吞吐吐之間/掩坎真濟歲月的故事
三不五時仔/辿兩條清泉/試五臟六腑的深度/發幾欉仔古松/佮無名無姓的草花/做喙鬚/佇風來的時 搖頭/佇雲來的時 藏尾/講出盤古開天以來的/靜
偆的/著讓予玉山去/皂烏漆白
──2006.8.27寫置埔姜頭
2006.10《台文戰線》第4號