高雄，自底離我真遠！彼年，為欲允一間在地報社ｅ頭路，位板橋坐半暝十二點ｅ慢車，khok到高雄拄好早起八點，袂輸上完大夜班行出車頭，高雄炎天赤日，日頭光投射出港都ｅ熱情。不而過，我感覺高雄實在真遠！

　　即馬，我感覺高雄離我真近！嘸是因為台南到高雄成點鐘ｅ地理距離，是熱情ｅ港都男兒，牽一條文學ｅ線將阮扭近。港都男兒胡長松，彼個二十出頭歲寫出《柴山少年安魂曲》、《骷髏酒吧》、《烏鬼港》三部華語長篇小說ｅ青年小說家，現此時全力投入台語文學陣營，成做一位夯旗拽風勢ｅ戰將。

　　以後，台語文學史欲安怎寫我嘸知影？至少，因為先行者宋澤萊ｅ鼓吹，胡長松自2000年以後，棄捨華語文壇ｅ名聲，360度轉向，改用父母話創作文學，即種氣魄，世間少人有。

　　數念彼段世紀之交ｅ緣會，南北二路聚集台灣新本土社ｅ心志，雖罔《台灣ｅ文藝》五期收煞；嘸過，咱真緊就伐出跤步連成一條台文戰線，《台文戰線》置長松手頭拄編煞第五期；咱茲ｅ戰友仝心肝，即擺嘸那出五期，至少愛做五年。

　　其實，長松已經出版兩本台語小說集《燈塔下》、《槍聲》。伊寫台語小說，同時嘛勤寫台語詩。就我所知，伊已經寫近百首ｅ台語詩，即陣，長松精選其中三十七首，成做頭一本台語詩集《棋盤街路ｅ城市》。伊用小說家ｅ筆路彩畫詩篇，歸本詩集讀透透，咱會發現這是一本透濫小說氣味ｅ五彩詩篇。

　　因為出外讀冊ｅ緣故，長松有幾落年離開故鄉高雄。「我時常會值夢中ｅ五福橋頂/看見海鳥ｅ身軀貼近五彩ｅ愛河/翅鼓振動/一直飛深入去」（＜值五福橋頂＞），五福橋佮愛河是長松少年到旦意愛ｅ所在，伊發現細漢看過ｅ電影「八百壯士」內面ｅ蘇州橋，其實就是五福橋，甚至捌想過五福橋因為安呢增加歲壽兩千冬，落尾伊知影蘇州橋頂，根本看袂著美麗ｅ海港佮海船，這是屬於港都高雄特出ｅ景緻。

　　棋盤街路ｅ城市，泛勢是台灣任何一個都市ｅ影射，即張地圖存在置咱逐個人徛居ｅ四箍輦轉。對長松來講，棋盤街路ｅ城市，嘸那是無數ｅ十字路口所連接ｅ版圖，閣卡是親情參友情所畫出來ｅ鄉情地圖。「棋盤街路ｅ城市/嘸八出聲表示意見/伊恬恬　坐值海墘/平常看待每一個日出合黃昏/接納眾生，將伊ｅ美麗化身無形」（＜棋盤街路ｅ城市＞）。

　　囝仔時ｅ記智，深深椆置長松ｅ腦海裡，茲ｅ畫面嘸是白洴無味ｅ素描，是一幅一幅童年ｅ彩色圖像。大漢了後，長松將記智ｅ底片剪接成詩，tshua7咱倒轉去三十冬前看會著芋園、菱角田ｅ故鄉內惟埤。小學一年彼個薄霧ｅ早起，綠色光線照著媽媽用來pue2目屎，霜凍pit sun5 ｅ手婆。下課時間，學校ｅ紅牆仔邊，看著媽媽包頭巾，置新舖ｅ點仔膠路耙粟仔，「日光蒸起來/遐　一壟一壟ｅ/金黃色ｅ粟仔/親像流動ｅ熱湧　滾絞」（＜下課時間＞）。我嘸知，當時細漢ｅ長松，心情是嘸是親像滾絞ｅ熱湧？我干單知影，長松透過詩筆重現場景，將伊對媽媽ｅ愛，一幕一幕深深刻劃出來。

　　長松娶某生子，有一位賢慧ｅ牽手佮一對古錐ｅ後生、查某子。伊參天下間所有做人老父ｅ查甫人仝款，惜子疼子，為怹寫出九首「予囝仔ｅ情歌」。以超音波所歙ｅ第一張大頭相，伊看著囝仔「恬恬值媽媽ｅ腹肚內底/有肥軟膨皮ｅ嘴phoe2，/目睭瞌瞌/嘴唇褫開親像底笑」(＜第一張大頭相＞)。因為空課ｅ緣故，長松定定愛置南北二路飛來飛去，禮拜日暗暝對囝仔講完故事冊上集，隔轉工透早隨愛坐飛鴒機去台北，愛等候拜四才會使講下集，置悲傷佮心悶之間，長松嘸知安怎回應囝仔ｅ問話？「只是思念ｅ目屎，你夢中ｅ面。」(＜禮拜日暗暝＞)。

　　長松寫詩予伊ｅ囝仔，同時嘛寫詩予伊徛起ｅ鄉土台灣。伊有誠深ｅ台灣意識，伊詩裡ｅ台灣嘸是烏托邦，有現實ｅ無完滿，嘛有值得一世人走揣ｅ價值。落尾，伊發現咱土地ｅ色緻，存在置咱跤踏過ｅ土佮咱所行過ｅ路頂面。長松捌置深暝聽蕭泰然ｅ音樂受感動，讚嘆伊是音樂ｅ詩人，「你ｅ目睭/是嘸是白雪ｅ異國之夜/彼粒　思念故鄉/ｅ星？」(＜夜深，聽蕭泰然＞)；捌看著八十外歲ｅ阿輝伯踮電視頂唱雨夜花受感動，呵咾「是你向神祈禱/ｅ歌聲」(＜我有聽見你唱雨夜花＞)。

　　我想，長松對台灣ｅ深情愛戀，會凍以下面即首詩代表：「夜雨ｅ暗暝，/阮輕聲仔向妳下願/台灣，阮選擇妳/嘸是為著過去ｅ傷悲、失去ｅ真理/是為著家厝草花ｅ芳味//為著阮合/阮ｅ兄弟、阮ｅ姊妹、阮ｅ朋友/攏值遮大漢。感謝妳，/賜阮一個有笑聲ｅ囝仔時/賜阮一寡美麗ｅ央望/　　一寡人情味/　　一寡愛情ｅ穗/閣有果籽鮮甜ｅ四季//道算嘸是永遠ｅ碧海藍天/有人威脅、有人侮辱、有人棄嫌/嘸過台灣，無要緊，阮選擇妳/嘸是因為受氣/嘸是因為堅定ｅ意志/只是阮　嘸願將阮爸母流過ｅ淚/閣送予　阮ｅ子兒//妳看覓咧，/殷ｅ笑容外呢古椎！/殷ｅ夢，是甜蜜ｅ夢//風雨打來ｅ時，/台灣，阮ｅ故鄉，阮選擇妳/感謝妳一路勇健ｅ腳步打拚/賜予阮選擇ｅ權利/阮未驚，阮已經徛起」(＜台灣，阮選擇妳＞)。

　　若講著透濫小說氣味ｅ五彩詩篇，袂用無讀詩集最後彼三首「港口之歌」。＜港口日出＞、＜風甲雨來到港口＞、＜愛情碼頭ｅ一粒流星＞，充滿海湧ｅ波浪、海港ｅ故事佮五彩ｅ色緻。置茲，我無欲tshua7逐家來去港口聽詩人講古，留予讀者家己買一本詩集轉去逗逗仔鼻芳。

　　我映望長松愛繼續寫出互人目睭金ｅ小說，嘛期待未來伊ｅ詩篇會凍愈寫愈有味。

──2007.2.25寫置埔姜頭