2006-08-17 23:32:31wagi-sun
《燈塔下》ｅ光景
──試介胡長松ｅ頭一本台語小說集
公元2000年進前，胡長松嘸捌寫過台語文學作品；伊早前已經有五年華語小說ｅ創作經驗佮訓練，捌分別置1997年佮2000年由「草根出版公司」出版兩本華語長篇小說集《柴山少年安魂曲》佮《骷髏酒吧》(另外一本長篇小說《烏鬼港》猶未出版)；因為胡長松是高雄在地人，自細漢踮港都長大成人，所致即兩本小說攏以伊上熟似ｅ高雄作背景；《柴山少年安魂曲》大約十萬字，寫一位少年家仔行歹路ｅ故事，歸篇運用鄉土寫實ｅ技巧；到甲《骷髏酒吧》即部小說，篇幅作一下扭長到二十萬字，運用的技巧加誠複雜，大體上是拉丁美洲魔幻寫實小說ｅ技巧；胡長松表現特出，是戰後第四代優秀ｅ鄉土小說家，所致前輩作家宋澤萊以＜看好胡長松＞為題，為《骷髏酒吧》寫一篇推介序文，節錄如下：
剛寫《柴山少年安魂曲》時，胡長松只能限定在一個人物上來完成小說，但到了第二篇的《骷髏酒吧》時，他已經能一下子書寫十個以上的人物，並且每個人物的把握皆十分具體準確，他的進步是如此神速！
※ ※ ※
他繼承了整個台灣文學書寫被壓迫者之痛苦的傳統，他對弱小者高度的憐憫及對廣大女性的同情，和賴和以降的台灣作家是一脈相傳的，這才是胡長松最大的才情和最可貴的潛能。
因為胡長松粒積幾十萬字小說創作ｅ經驗，加上天生ｅ才情佮後天勤學，伊置2000年9月初佮一陣友志組織「台灣新本土社」了後，隨就置10月寫出頭一篇台語小說＜死ｅ聲嗽＞(發表置2001.1《台灣ｅ文藝》創刊號)，即篇小說大約3500字，採取魔幻寫實ｅ技巧，即種技巧置台語小說內面罕得看著，初寫台語小說ｅ胡長松大膽出手，位茲會凍看出伊挑戰家己ｅ氣魄；宋澤萊呵咾即篇小說不只仔讚，伊認為「她的技法浸染了世界先鋒文學的色彩，堪足引人注目」。試引一段互讀者鼻芳，證明筆者無講白賊：
即瞬，我才感覺著我ｅ頭殼額仔，有一絲仔ｅ熱流滲落來。
我看著伊對烏夜中消失ｅ時，我ｅ手嘛消失去，偃頭看，我ｅ腳嘛消失，續落，是我ｅ胸崁……
我才想起著伊入門晉前彼陣煙硝味。我感覺恐怖。
一切攏消失去，閣來，除了烏色ｅ空虛，我啥物攏看未著，干擔聽著伊咯咯ｅ腳步聲，輕輕渺渺，愈來愈遠……
＜死ｅ聲嗽＞了後，短短兩冬(2000-2002)內，胡長松閣創作真濟篇台語小說，伊將其中九篇集作《燈塔下》(2005.8前衛出版)；內面大部分是自然寫實ｅ技巧，攏總七篇，有：＜燈塔下＞、＜偷＞、＜茄仔色ｅ金龜＞、＜一條手巾仔ｅ故事＞、＜一滴值錢ｅ目屎＞、＜筆錄＞、＜矮仔吳文政＞等；其中，＜茄仔色ｅ金龜＞(發表置2000.12.31《島鄉台語文學》第21號)寫兩個囡仔時ｅ蹉跎伴，為著相搶一隻罕有ｅ金龜仔，落尾舞到變面互相無來去，故事雖罔簡單，總是透過兩個囡仔ｅ行為，互咱看著世間強欺弱ｅ生態，宛然目睭前發生ｅ故事，試引一段如下：
我給金龜ｅ兩塊茄仔色ｅ殼挽落來，合伊ｅ翅仔，閣來，是伊ｅ頭；彼粒金龜仔頭值挽落來晉前，猶phiak咧phiak咧，叩叩叩底叫。落尾，我給伊軟sim3 sim3 ｅ腹肚撣值土腳。
即時陣，『兩齒ｅ』踞值樹腳，已經哮加足大聲。
「好啊！你莫閣哮，戲搬煞啊！」我用腳給彼隻金龜存落來ｅ腹肚joe5 joe5咧，行過卜給『兩齒ｅ』牽：「行，咱入去看電視。」
伊遂嘸予我牽，目屎擦咧，家己徛起來。
「啥人稀罕你ｅ電視！」伊目睭圓貢貢，手給我指咧嚷：「你是變態！大變態！」
斡咧伊走轉去殷厝。
自安呢，兩齒章仔無閣參我講過一句話。
仝款用囡仔作主角ｅ小說猶有＜一條手巾仔ｅ故事＞(發表置2001.9.30《島鄉台語文學》第24號)，即篇小說ｅ背景是高雄ｅ旗後半島，主角是咧讀幼稚園大班ｅ阿玲，伊為著一條米老鼠ｅ手巾仔，佮阿姊冤家，連老母嘛去掃著風颱尾，伊想講媽媽卡疼阿姊無疼伊，落尾媽媽提一條米老鼠ｅ手巾仔予伊，阿玲才拭掉目屎展笑容，歸篇透濫囡仔味，給囡仔人歹款ｅ樣相寫到活靈靈，引掣咱作夥轉去彼個天真ｅ童年：
媽媽講遂，行夠衫弓靴，位皮包仔內面提一條全新ｅ手巾仔過來：「妳看，即隻嘸是妳ｅ米老鼠？妳看，遮──大隻。」
阿玲ｅ目睭睇加大大蕾，一支嘴開加離腮腮。
媽媽將手巾仔提予她：「妳咁卜提米老鼠給妳ｅ鼻擦擦咧？」
「嘸要！」
阿玲無閣哭，顛倒笑出來。
工商業社會愈發達，離開鄉里到都市討趁ｅ少年人愈濟，特別是即幾冬來電子科技日日大進步，袂少電子新貴，追求高薪佮股票分紅，一時歸個社會大流行；＜一滴值錢ｅ目屎＞(發表置2001.3.30《島鄉台語文學》第22號)內底，「猴仔」歸心咧追求名利富貴，袂得早日回鄉里，所致交往誠濟冬、留置南部ｅ愛人仔阿純嫁別人作某，世間事有一好就無兩好；透過雨幕，「我」勻勻仔講出「猴仔」佮濟濟現代人ｅ無奈：
過一分鐘，伊講：「對啦，你咁有聽講阿純ｅ代誌？阿純……」
「我知影。她結婚啊，我有去予請。」
即時陣，伊歸個人縮值椅仔裡，吐大氣。
「伊講我要轉去南部。我給講會，我早慢會轉去，我給講過！」
我無閣出聲。
霓虹燈ｅ七彩燈火仝款值雨水裡流動。一台車駛過，車燈又閣給玻璃窗照加金起來；值玻璃窗ｅ反光之中，我看著伊ｅ目尾，有一滴目屎嘛綴咧金起來，過一秒，閣暗去。
「即馬我感覺我已經無法度轉去啊。」伊安呢講。
社會風氣一日嫫過一日，宰人放火無所不至；＜偷＞(發表置2001.12.15《台灣ｅ文藝》第4期)車賊阿忠佮烏龍，位屏東水底寮駛一台「跑天下」ｅ銅管仔車欲去萬丹，將車賣予專門收賊仔貨ｅ楊老闆，兩人沿路講沿路笑，暗爽在心內，想袂到遂互楊老闆設計去，怹袂堪咧氣，就給賊仔車撣置路邊，「走」若飛；蹉跎仔ｅ面腔活跳跳，袂輸咧目睭前：
「卜安怎？漏兄弟來啊，卜安怎？殷爸若無給伊修理一下，殷爸道嘸是烏龍！」
烏龍閣開始卜敲電話。
「等一下！啊即張車咧？」
「當然嘛摒咧！唔，無卜等電仔來掠喔？」
阿忠將車停值路邊一欉茄冬樹下腳。即兩個少年家仔位車裡出來，先是好禮仔行，行差不多一百公尺以後，道開始走起來。透中白晝ｅ日頭真炎。阿忠閣一擺夯頭看正爿太武山ｅ方向，太武山遠遠ｅ山尾溜，有一緣白霧。阿忠斡頭轉來。殷愈走愈緊，歸身軀汗。殷ｅ影，縮做腳底ｅ兩個跳動ｅ烏點，最後，值路尾蒸起來ｅ熱氣之中，融化。
軍中代暗密密，只有做過兵ｅ人才知影其中ｅ鹹酸苦澀；台語文學寫即爿面ｅ人少到若早起ｅ天星，進前干單看過陳金順ｅ散文＜楊梅山頂冷風寒＞(發表置1996.12《台灣文藝》第158期)以及陳雷ｅ小說＜大頭兵黃明良＞(發表置1992.12《台灣文藝》創新版14號)佮＜失樂園＞(發表置2002.6.30《台灣ｅ文藝》第5期)；胡長松捌做過預官輔導長，一旦伊欲寫軍中小說，自然的用這作題材落筆，2002年他一下手發表兩篇，分別是＜筆錄＞(發表置2002.3.30《島鄉台語文學》第26號)佮＜矮仔吳文政＞(發表置2002.6.30《台灣ｅ文藝》第5期)；位即兩篇小說內底，咱聽好看出軍中ｅ烏暗代，嘸過這只是一塊仔爾，期待閣卡濟作家用文學ｅ筆將真象展現置大眾ｅ面頭前。
＜筆錄＞內底，透過旁觀者「我」(新ｅ菜鳥仔輔導長)，看著一部軍中小丑仔齣；營輔ｅ使弄一兵王德義替伊買檳榔，好死嘸死互營長摠著，營輔ｅ推甲離離，害王德義互營長罰關禁閉三十工，王德義氣撲撲給營輔ｅ嗆聲，落尾遂一百八十度踅輪轉，互人嘸知欲哭抑欲笑：
我值路裡提彼份筆錄起來看。
彼份筆錄大約講王德義偷買檳榔入來吃，感覺真後悔，希望上級會使原諒伊一擺。
筆錄頂懸，王德義ｅ手印宕加滿滿，不過，完全無提起營輔ｅｅ代誌。
※ ※ ※
想想咧嘛真趣味，王德義最後竟然無入去關30工禁閉。
營長干擔罰伊禁假一工。嘸那安呢爾，伊禁假彼工，仝款值遍地檨仔花芳味ｅ營區，我繼續第二個月ｅ留守，阿伊，竟然予營長合營輔ｅ載出去。
聽阿兵哥講，彼工，殷是做伙去屏東王德義殷老爸開ｅ酒店Happy。
「咁講是烏齒ｅ殷爸Sa-bi-su ｅ？」
「無喏，輔ｅ。聽講彼條是營輔ｅ開ｅ呢！」
仝款徛在第一人稱輔導長角色講話ｅ＜矮仔吳文政＞，牽涉軍中管教佮逃兵ｅ問題；即篇小說大約是＜筆錄＞ｅ兩倍長，對人物故事佮心理狀態ｅ描寫，加誠幼路；吳文政做兵前是一個嘸成囡仔，置軍中因為人矮互做兵仔伴欺負，嘸過因為有「老大ｅ」劉武雄挺伊，伊遂變到囂俳氅鬚；有一日，怹兩人偷辿出去營外卡拉OK店樂暢，為著相爭「麗娜」遂來撦倒醋桶，吳文政互劉武雄電到金爍爍，了後，伊敲電話給頂司申訴，即聲袂直，劉武雄夆送管訓，吳文政嘛夆關禁閉；自安呢吳文政置兵營內眾人怨，落尾伊歇假無回營，造成第二擺夆關禁閉ｅ運命，置禁閉室內底，伊試過幾仔款方法自殺無成，因為輔ｅ耐心給伊款勸，終其尾伊展現難得ｅ笑容：
劉武雄用手指吳文政ｅ鼻仔。
「哈！哥仔！」吳文政笑笑仔給劉武雄講：「值即囉所在啊，莫認真啦！嫷姑娘仔一四界攏嘛有，對否？」吳文政徛起來。
劉武雄講：「殷娘咧！矮仔材！我叫你坐予好你無聽著？」伊閣給麗娜講：「咁講妳甘願合即個矮仔材跳舞，嘸要合我坐？」
劉武雄順手位吳文政ｅ肩胛頭貼落。
可能是酒醉無節力，嘛可能是刁故意，劉武雄貼彼下未細下，吳文政退一步，跋落值土腳。伊喝一聲：「X！你叫誰矮仔材？」伊咬牙切齒，爬起來道位劉武雄ｅ腹肚cheng落……
※ ※ ※
吳文政值悔過書頂懸，將伊入伍晉前ｅ生活交代加真清楚，包括伊安怎合查某囡仔阿如熟識，安怎夆放捨，安怎夆退學，安怎蹉跎，安怎會吸安……等等等等。我若無閒，伊道恬恬家己寫，我若有閒，伊道合我開講。甚至伊坦白給我講吸安ｅ各種方法，用燒瓶抑是插兩枝吸管ｅ鋁箔包，攏講加真清楚。這前後有差不多個外月，我位伊靴瞭解未少物件。上重要ｅ是，伊開始有笑容。
佮小說集仝名ｅ＜燈塔下＞(發表置2002.2《海翁台語文學》第7期)，原作華文，發表置1996年《台灣新文學》秋季號，落尾，捌夆翻譯作英文登置《Taiwan News》頂懸，宋澤萊認為「若非這篇小說有過人之處，編者豈有這麼做的道理。」
＜燈塔下＞描寫高雄旗津「燈塔腳仔」彼箍圍仔ｅ景致，猶閣有少年人出外趁食，放捨孤單老人生死隨命ｅ普遍的問題，故事雖罔簡單，嘸過意義極深無比，值得逐家重視：
老大人話講旗後山過去是港市柴山ｅ伸手，為著開墾港口，才將伊位腰身打斷，形成即馬即座徛值海墘，干那是笑看風塵ｅ孤岩。久年來，台灣海峽ｅ波浪打值山ｅ岩壁，予伊向海ｅ一面更加崎峭(khia7 chhiau3)；雖然山勢無懸，卻是予人畏嚇ｅ絕崖。崖頂是一座百年歷史ｅ白色燈塔，夜暗暝，慢慢旋轉ｅ光線照值曠闊烏藍ｅ大海，嘛照值旗後山腳一抱雜亂猶有老古珊瑚建築ｅ房厝。遮，合外面繁華ｅ市街無仝，正是旗津老聚落ｅ所在之地。
旗津人叫遮「燈塔腳仔」。
※ ※ ※
兩個月後，值燈塔下，天色猶未齊光ｅ透早時，白幡發引，歐巴桑來福嬸仔ｅ棺木予人扛起來。
阿貴仔抱著母親ｅ神主牌，一步一哭，行過彼條前一暝猶是上鬧熱ｅ大街路。
頂頭七篇是親像莫泊桑敖寫ｅ自然寫實派ｅ風格，無論寫景抑是寫情，行文自然如流水，剪裁工夫拄拄好，一點仔都無勉強；胡長松佮莫泊桑上大ｅ無仝是：莫泊桑置幾仔百篇小說內面，絕大多數寫ｅ攏是貴族佮社會頂階層ｅ生活，運用技巧雖罔像桌頂抳柑，落筆好比神助，嘸過美中不足ｅ是，缺欠對社會下階層ｅ觀照；胡長松置即七篇小說內面，無論寫囡仔、蹉跎人抑是阿兵哥，筆尾沐著厚厚ｅ同情心，對弱勢者關懷ｅ情展現置紙頭紙尾；這嘛是一位寫實小說家上需要ｅ才情。
最後，咱作夥來探看台語文學內面罕得看著ｅ寓言小說＜貓語、烏布合貓ｅ民族＞(發表置2001.5.15《台灣ｅ文藝》第2期)，即篇大約5000字ｅ小說，「宛如童話，不小心看，還以為是翻譯的伊索寓言。」(宋澤萊語)
即篇寓言描寫媒體對一隻會曉講人話、嵌一塊神秘烏布ｅ貓仔膨風宣傳，使致眾人趕狂學講貓仔話，續落閣給其他動物宰了了，終其尾造成生物ｅ劫數；其實這是咧摳洗台灣人一甲子以來，夆壓迫學外來語，認賊做父遂無致覺，將母語袂記了了ｅ悲慘過程：
值伊喵喵叫ｅ貓語內底，有時陣憤慨激動，充滿著生物本能ｅ野性；有時陣無比溫柔，親像溪水輕聲細說流過溪埔ｅ歌詩；有時，閣笑頭笑尾，親像卜給過去ｅ歡喜、驕傲完全展示出來；伊歡喜，聽ｅ人就綴伊歡喜，伊受氣，聽ｅ人就綴伊受氣，遂一下手鑽入你ｅ耳孔，位靴，卜給你歸身軀ｅ神經線齊揪作伙。
※ ※ ※
關貓ｅ鐵籠仔，真緊就徙來值動物園彼塊上闊ｅ空埕。風吹過，嵌值烏布內底面ｅ鐵枝仔道一壟一壟浮刻出來，日頭金爍爍ｅ光線打值頂頭，反照著赤目ｅ烏金。隨著光線強弱合角度ｅ變化，有當時，咱會使值某一個方向ｅ布嵌頂懸，發現親像是貓影ｅ浮動，若有閣若無。
※ ※ ※
愈來愈濟人抗議殷ｅ聲帶因為學講貓語，受著破壞，遂無法度恢復；工廠ｅ頭家怨嘆工仔一日到暗相嚷、操譙，嘸知空課；上嚴重ｅ，是卡早學貓語ｅ父母，發現家己無法度教囡仔講人話，嘸知卜安怎。十外萬人又閣向動物園出發，即擺，殷打算無論如何，攏卜給彼塊烏布掀起來，向彼隻貓問予清楚。
《燈塔下》ｅ光景若夢若詩、多姿多彩。「九篇短篇小說，九個人間悲喜的小故事，九次台語文學與現代文學的實驗對話，交織著前衛與傳統、魔幻與寫實的多樣風格，在詩意如行板的節奏中帶領讀者進入生命情感的底韻。」
對胡長松來講，台語文學即條路才拄好欲起行。
──2005.9.29台譯，原作華文。
2006.3《海翁台語文學》第51期
公元2000年進前，胡長松嘸捌寫過台語文學作品；伊早前已經有五年華語小說ｅ創作經驗佮訓練，捌分別置1997年佮2000年由「草根出版公司」出版兩本華語長篇小說集《柴山少年安魂曲》佮《骷髏酒吧》(另外一本長篇小說《烏鬼港》猶未出版)；因為胡長松是高雄在地人，自細漢踮港都長大成人，所致即兩本小說攏以伊上熟似ｅ高雄作背景；《柴山少年安魂曲》大約十萬字，寫一位少年家仔行歹路ｅ故事，歸篇運用鄉土寫實ｅ技巧；到甲《骷髏酒吧》即部小說，篇幅作一下扭長到二十萬字，運用的技巧加誠複雜，大體上是拉丁美洲魔幻寫實小說ｅ技巧；胡長松表現特出，是戰後第四代優秀ｅ鄉土小說家，所致前輩作家宋澤萊以＜看好胡長松＞為題，為《骷髏酒吧》寫一篇推介序文，節錄如下：
剛寫《柴山少年安魂曲》時，胡長松只能限定在一個人物上來完成小說，但到了第二篇的《骷髏酒吧》時，他已經能一下子書寫十個以上的人物，並且每個人物的把握皆十分具體準確，他的進步是如此神速！
※ ※ ※
他繼承了整個台灣文學書寫被壓迫者之痛苦的傳統，他對弱小者高度的憐憫及對廣大女性的同情，和賴和以降的台灣作家是一脈相傳的，這才是胡長松最大的才情和最可貴的潛能。
因為胡長松粒積幾十萬字小說創作ｅ經驗，加上天生ｅ才情佮後天勤學，伊置2000年9月初佮一陣友志組織「台灣新本土社」了後，隨就置10月寫出頭一篇台語小說＜死ｅ聲嗽＞(發表置2001.1《台灣ｅ文藝》創刊號)，即篇小說大約3500字，採取魔幻寫實ｅ技巧，即種技巧置台語小說內面罕得看著，初寫台語小說ｅ胡長松大膽出手，位茲會凍看出伊挑戰家己ｅ氣魄；宋澤萊呵咾即篇小說不只仔讚，伊認為「她的技法浸染了世界先鋒文學的色彩，堪足引人注目」。試引一段互讀者鼻芳，證明筆者無講白賊：
即瞬，我才感覺著我ｅ頭殼額仔，有一絲仔ｅ熱流滲落來。
我看著伊對烏夜中消失ｅ時，我ｅ手嘛消失去，偃頭看，我ｅ腳嘛消失，續落，是我ｅ胸崁……
我才想起著伊入門晉前彼陣煙硝味。我感覺恐怖。
一切攏消失去，閣來，除了烏色ｅ空虛，我啥物攏看未著，干擔聽著伊咯咯ｅ腳步聲，輕輕渺渺，愈來愈遠……
＜死ｅ聲嗽＞了後，短短兩冬(2000-2002)內，胡長松閣創作真濟篇台語小說，伊將其中九篇集作《燈塔下》(2005.8前衛出版)；內面大部分是自然寫實ｅ技巧，攏總七篇，有：＜燈塔下＞、＜偷＞、＜茄仔色ｅ金龜＞、＜一條手巾仔ｅ故事＞、＜一滴值錢ｅ目屎＞、＜筆錄＞、＜矮仔吳文政＞等；其中，＜茄仔色ｅ金龜＞(發表置2000.12.31《島鄉台語文學》第21號)寫兩個囡仔時ｅ蹉跎伴，為著相搶一隻罕有ｅ金龜仔，落尾舞到變面互相無來去，故事雖罔簡單，總是透過兩個囡仔ｅ行為，互咱看著世間強欺弱ｅ生態，宛然目睭前發生ｅ故事，試引一段如下：
我給金龜ｅ兩塊茄仔色ｅ殼挽落來，合伊ｅ翅仔，閣來，是伊ｅ頭；彼粒金龜仔頭值挽落來晉前，猶phiak咧phiak咧，叩叩叩底叫。落尾，我給伊軟sim3 sim3 ｅ腹肚撣值土腳。
即時陣，『兩齒ｅ』踞值樹腳，已經哮加足大聲。
「好啊！你莫閣哮，戲搬煞啊！」我用腳給彼隻金龜存落來ｅ腹肚joe5 joe5咧，行過卜給『兩齒ｅ』牽：「行，咱入去看電視。」
伊遂嘸予我牽，目屎擦咧，家己徛起來。
「啥人稀罕你ｅ電視！」伊目睭圓貢貢，手給我指咧嚷：「你是變態！大變態！」
斡咧伊走轉去殷厝。
自安呢，兩齒章仔無閣參我講過一句話。
仝款用囡仔作主角ｅ小說猶有＜一條手巾仔ｅ故事＞(發表置2001.9.30《島鄉台語文學》第24號)，即篇小說ｅ背景是高雄ｅ旗後半島，主角是咧讀幼稚園大班ｅ阿玲，伊為著一條米老鼠ｅ手巾仔，佮阿姊冤家，連老母嘛去掃著風颱尾，伊想講媽媽卡疼阿姊無疼伊，落尾媽媽提一條米老鼠ｅ手巾仔予伊，阿玲才拭掉目屎展笑容，歸篇透濫囡仔味，給囡仔人歹款ｅ樣相寫到活靈靈，引掣咱作夥轉去彼個天真ｅ童年：
媽媽講遂，行夠衫弓靴，位皮包仔內面提一條全新ｅ手巾仔過來：「妳看，即隻嘸是妳ｅ米老鼠？妳看，遮──大隻。」
阿玲ｅ目睭睇加大大蕾，一支嘴開加離腮腮。
媽媽將手巾仔提予她：「妳咁卜提米老鼠給妳ｅ鼻擦擦咧？」
「嘸要！」
阿玲無閣哭，顛倒笑出來。
工商業社會愈發達，離開鄉里到都市討趁ｅ少年人愈濟，特別是即幾冬來電子科技日日大進步，袂少電子新貴，追求高薪佮股票分紅，一時歸個社會大流行；＜一滴值錢ｅ目屎＞(發表置2001.3.30《島鄉台語文學》第22號)內底，「猴仔」歸心咧追求名利富貴，袂得早日回鄉里，所致交往誠濟冬、留置南部ｅ愛人仔阿純嫁別人作某，世間事有一好就無兩好；透過雨幕，「我」勻勻仔講出「猴仔」佮濟濟現代人ｅ無奈：
過一分鐘，伊講：「對啦，你咁有聽講阿純ｅ代誌？阿純……」
「我知影。她結婚啊，我有去予請。」
即時陣，伊歸個人縮值椅仔裡，吐大氣。
「伊講我要轉去南部。我給講會，我早慢會轉去，我給講過！」
我無閣出聲。
霓虹燈ｅ七彩燈火仝款值雨水裡流動。一台車駛過，車燈又閣給玻璃窗照加金起來；值玻璃窗ｅ反光之中，我看著伊ｅ目尾，有一滴目屎嘛綴咧金起來，過一秒，閣暗去。
「即馬我感覺我已經無法度轉去啊。」伊安呢講。
社會風氣一日嫫過一日，宰人放火無所不至；＜偷＞(發表置2001.12.15《台灣ｅ文藝》第4期)車賊阿忠佮烏龍，位屏東水底寮駛一台「跑天下」ｅ銅管仔車欲去萬丹，將車賣予專門收賊仔貨ｅ楊老闆，兩人沿路講沿路笑，暗爽在心內，想袂到遂互楊老闆設計去，怹袂堪咧氣，就給賊仔車撣置路邊，「走」若飛；蹉跎仔ｅ面腔活跳跳，袂輸咧目睭前：
「卜安怎？漏兄弟來啊，卜安怎？殷爸若無給伊修理一下，殷爸道嘸是烏龍！」
烏龍閣開始卜敲電話。
「等一下！啊即張車咧？」
「當然嘛摒咧！唔，無卜等電仔來掠喔？」
阿忠將車停值路邊一欉茄冬樹下腳。即兩個少年家仔位車裡出來，先是好禮仔行，行差不多一百公尺以後，道開始走起來。透中白晝ｅ日頭真炎。阿忠閣一擺夯頭看正爿太武山ｅ方向，太武山遠遠ｅ山尾溜，有一緣白霧。阿忠斡頭轉來。殷愈走愈緊，歸身軀汗。殷ｅ影，縮做腳底ｅ兩個跳動ｅ烏點，最後，值路尾蒸起來ｅ熱氣之中，融化。
軍中代暗密密，只有做過兵ｅ人才知影其中ｅ鹹酸苦澀；台語文學寫即爿面ｅ人少到若早起ｅ天星，進前干單看過陳金順ｅ散文＜楊梅山頂冷風寒＞(發表置1996.12《台灣文藝》第158期)以及陳雷ｅ小說＜大頭兵黃明良＞(發表置1992.12《台灣文藝》創新版14號)佮＜失樂園＞(發表置2002.6.30《台灣ｅ文藝》第5期)；胡長松捌做過預官輔導長，一旦伊欲寫軍中小說，自然的用這作題材落筆，2002年他一下手發表兩篇，分別是＜筆錄＞(發表置2002.3.30《島鄉台語文學》第26號)佮＜矮仔吳文政＞(發表置2002.6.30《台灣ｅ文藝》第5期)；位即兩篇小說內底，咱聽好看出軍中ｅ烏暗代，嘸過這只是一塊仔爾，期待閣卡濟作家用文學ｅ筆將真象展現置大眾ｅ面頭前。
＜筆錄＞內底，透過旁觀者「我」(新ｅ菜鳥仔輔導長)，看著一部軍中小丑仔齣；營輔ｅ使弄一兵王德義替伊買檳榔，好死嘸死互營長摠著，營輔ｅ推甲離離，害王德義互營長罰關禁閉三十工，王德義氣撲撲給營輔ｅ嗆聲，落尾遂一百八十度踅輪轉，互人嘸知欲哭抑欲笑：
我值路裡提彼份筆錄起來看。
彼份筆錄大約講王德義偷買檳榔入來吃，感覺真後悔，希望上級會使原諒伊一擺。
筆錄頂懸，王德義ｅ手印宕加滿滿，不過，完全無提起營輔ｅｅ代誌。
※ ※ ※
想想咧嘛真趣味，王德義最後竟然無入去關30工禁閉。
營長干擔罰伊禁假一工。嘸那安呢爾，伊禁假彼工，仝款值遍地檨仔花芳味ｅ營區，我繼續第二個月ｅ留守，阿伊，竟然予營長合營輔ｅ載出去。
聽阿兵哥講，彼工，殷是做伙去屏東王德義殷老爸開ｅ酒店Happy。
「咁講是烏齒ｅ殷爸Sa-bi-su ｅ？」
「無喏，輔ｅ。聽講彼條是營輔ｅ開ｅ呢！」
仝款徛在第一人稱輔導長角色講話ｅ＜矮仔吳文政＞，牽涉軍中管教佮逃兵ｅ問題；即篇小說大約是＜筆錄＞ｅ兩倍長，對人物故事佮心理狀態ｅ描寫，加誠幼路；吳文政做兵前是一個嘸成囡仔，置軍中因為人矮互做兵仔伴欺負，嘸過因為有「老大ｅ」劉武雄挺伊，伊遂變到囂俳氅鬚；有一日，怹兩人偷辿出去營外卡拉OK店樂暢，為著相爭「麗娜」遂來撦倒醋桶，吳文政互劉武雄電到金爍爍，了後，伊敲電話給頂司申訴，即聲袂直，劉武雄夆送管訓，吳文政嘛夆關禁閉；自安呢吳文政置兵營內眾人怨，落尾伊歇假無回營，造成第二擺夆關禁閉ｅ運命，置禁閉室內底，伊試過幾仔款方法自殺無成，因為輔ｅ耐心給伊款勸，終其尾伊展現難得ｅ笑容：
劉武雄用手指吳文政ｅ鼻仔。
「哈！哥仔！」吳文政笑笑仔給劉武雄講：「值即囉所在啊，莫認真啦！嫷姑娘仔一四界攏嘛有，對否？」吳文政徛起來。
劉武雄講：「殷娘咧！矮仔材！我叫你坐予好你無聽著？」伊閣給麗娜講：「咁講妳甘願合即個矮仔材跳舞，嘸要合我坐？」
劉武雄順手位吳文政ｅ肩胛頭貼落。
可能是酒醉無節力，嘛可能是刁故意，劉武雄貼彼下未細下，吳文政退一步，跋落值土腳。伊喝一聲：「X！你叫誰矮仔材？」伊咬牙切齒，爬起來道位劉武雄ｅ腹肚cheng落……
※ ※ ※
吳文政值悔過書頂懸，將伊入伍晉前ｅ生活交代加真清楚，包括伊安怎合查某囡仔阿如熟識，安怎夆放捨，安怎夆退學，安怎蹉跎，安怎會吸安……等等等等。我若無閒，伊道恬恬家己寫，我若有閒，伊道合我開講。甚至伊坦白給我講吸安ｅ各種方法，用燒瓶抑是插兩枝吸管ｅ鋁箔包，攏講加真清楚。這前後有差不多個外月，我位伊靴瞭解未少物件。上重要ｅ是，伊開始有笑容。
佮小說集仝名ｅ＜燈塔下＞(發表置2002.2《海翁台語文學》第7期)，原作華文，發表置1996年《台灣新文學》秋季號，落尾，捌夆翻譯作英文登置《Taiwan News》頂懸，宋澤萊認為「若非這篇小說有過人之處，編者豈有這麼做的道理。」
＜燈塔下＞描寫高雄旗津「燈塔腳仔」彼箍圍仔ｅ景致，猶閣有少年人出外趁食，放捨孤單老人生死隨命ｅ普遍的問題，故事雖罔簡單，嘸過意義極深無比，值得逐家重視：
老大人話講旗後山過去是港市柴山ｅ伸手，為著開墾港口，才將伊位腰身打斷，形成即馬即座徛值海墘，干那是笑看風塵ｅ孤岩。久年來，台灣海峽ｅ波浪打值山ｅ岩壁，予伊向海ｅ一面更加崎峭(khia7 chhiau3)；雖然山勢無懸，卻是予人畏嚇ｅ絕崖。崖頂是一座百年歷史ｅ白色燈塔，夜暗暝，慢慢旋轉ｅ光線照值曠闊烏藍ｅ大海，嘛照值旗後山腳一抱雜亂猶有老古珊瑚建築ｅ房厝。遮，合外面繁華ｅ市街無仝，正是旗津老聚落ｅ所在之地。
旗津人叫遮「燈塔腳仔」。
※ ※ ※
兩個月後，值燈塔下，天色猶未齊光ｅ透早時，白幡發引，歐巴桑來福嬸仔ｅ棺木予人扛起來。
阿貴仔抱著母親ｅ神主牌，一步一哭，行過彼條前一暝猶是上鬧熱ｅ大街路。
頂頭七篇是親像莫泊桑敖寫ｅ自然寫實派ｅ風格，無論寫景抑是寫情，行文自然如流水，剪裁工夫拄拄好，一點仔都無勉強；胡長松佮莫泊桑上大ｅ無仝是：莫泊桑置幾仔百篇小說內面，絕大多數寫ｅ攏是貴族佮社會頂階層ｅ生活，運用技巧雖罔像桌頂抳柑，落筆好比神助，嘸過美中不足ｅ是，缺欠對社會下階層ｅ觀照；胡長松置即七篇小說內面，無論寫囡仔、蹉跎人抑是阿兵哥，筆尾沐著厚厚ｅ同情心，對弱勢者關懷ｅ情展現置紙頭紙尾；這嘛是一位寫實小說家上需要ｅ才情。
最後，咱作夥來探看台語文學內面罕得看著ｅ寓言小說＜貓語、烏布合貓ｅ民族＞(發表置2001.5.15《台灣ｅ文藝》第2期)，即篇大約5000字ｅ小說，「宛如童話，不小心看，還以為是翻譯的伊索寓言。」(宋澤萊語)
即篇寓言描寫媒體對一隻會曉講人話、嵌一塊神秘烏布ｅ貓仔膨風宣傳，使致眾人趕狂學講貓仔話，續落閣給其他動物宰了了，終其尾造成生物ｅ劫數；其實這是咧摳洗台灣人一甲子以來，夆壓迫學外來語，認賊做父遂無致覺，將母語袂記了了ｅ悲慘過程：
值伊喵喵叫ｅ貓語內底，有時陣憤慨激動，充滿著生物本能ｅ野性；有時陣無比溫柔，親像溪水輕聲細說流過溪埔ｅ歌詩；有時，閣笑頭笑尾，親像卜給過去ｅ歡喜、驕傲完全展示出來；伊歡喜，聽ｅ人就綴伊歡喜，伊受氣，聽ｅ人就綴伊受氣，遂一下手鑽入你ｅ耳孔，位靴，卜給你歸身軀ｅ神經線齊揪作伙。
※ ※ ※
關貓ｅ鐵籠仔，真緊就徙來值動物園彼塊上闊ｅ空埕。風吹過，嵌值烏布內底面ｅ鐵枝仔道一壟一壟浮刻出來，日頭金爍爍ｅ光線打值頂頭，反照著赤目ｅ烏金。隨著光線強弱合角度ｅ變化，有當時，咱會使值某一個方向ｅ布嵌頂懸，發現親像是貓影ｅ浮動，若有閣若無。
※ ※ ※
愈來愈濟人抗議殷ｅ聲帶因為學講貓語，受著破壞，遂無法度恢復；工廠ｅ頭家怨嘆工仔一日到暗相嚷、操譙，嘸知空課；上嚴重ｅ，是卡早學貓語ｅ父母，發現家己無法度教囡仔講人話，嘸知卜安怎。十外萬人又閣向動物園出發，即擺，殷打算無論如何，攏卜給彼塊烏布掀起來，向彼隻貓問予清楚。
《燈塔下》ｅ光景若夢若詩、多姿多彩。「九篇短篇小說，九個人間悲喜的小故事，九次台語文學與現代文學的實驗對話，交織著前衛與傳統、魔幻與寫實的多樣風格，在詩意如行板的節奏中帶領讀者進入生命情感的底韻。」
對胡長松來講，台語文學即條路才拄好欲起行。
──2005.9.29台譯，原作華文。
2006.3《海翁台語文學》第51期