我可能像小妹講的，真「蠻皮」；腹肚疼兩個外月矣，猶無想欲去揣（tshuē，找）醫生。

橫直無影響生活，一日六七遍、八九遍小小仔疼一下爾爾。

後來有淡薄仔驚起來，毋知腹肚內是毋是咧進行啥物破壞的大工程，才決心去病院。佇網路掛號，看著一个醫生攏掛滿矣，人氣遮爾（tsiah-nī這麼）好，一定是較厲害的，就按呢掛伊的號；加等兩禮拜也無要緊。

醫生四十外歲，伊的問診誠詳細，腹肚疼是毋是固定的位？偌久疼一擺？疼幾分鐘，幾秒鐘？是幽幽仔疼？抽疼？抑是像針刺一下彼款疼？攏毋是，我袂曉形容；我看伊嘛無新的形容詞矣。紲落（suà--lo̍h，接下來），伊問我和我的家族病史，生活習慣，我的背景等等。聽講我是報紙編輯退休的，竟然問，「佗一間報社？」我啊一聲，「問甲遮爾工夫？」

伊講小等會共我講為啥物伊問問題較頂真。

問診了後，聽診，揤（按）腹肚，伊講無看出有啥問題。

然後，伊講，「看會出你較『焦慮』。」伊大部份講台語，『焦慮』，講華語。

因為『焦慮』，才有這種不明原因的疼？

伊講有可能。「你會『焦慮』，因為你退休，失去舞台矣。」

舞台？我毋是愛鬧熱、愛徛（khiā，站）佇台頂的人，而且，我已經退休十外年，無上班的生活，早就慣勢矣。人生的舞台嘛毋是kan-na（只）佇工作的場所，會曉過日子的人，大大細細的「舞台」一四界。

我心內足不服，講，「照你這種講法，我猶有舞台；我一直咧寫作，發表文章。寫文章毋免退休。」

伊淡薄仔意外，講，「你拄才（剛才）無講起你寫作。」

「你無問啊。」我哪有可能無代無誌共人講家己是攑筆/拍電腦的？

伊講伊問較詳細，因為伊專門的是老人醫學。老人較寂寞，心事囥（khǹg，放）佇心肝內；所以醫生愛特別有耐性，聽in（他們）講話，敨（tháu，紓解 ）in的鬰氣？伊的眼內，我就是彼款老人？伊人氣好，凡勢就是因為人親切，肯聽老大人有的無的直直講；無管有問抑是無問。

一方面好奇，一方面表示認同伊的觀察，我講，「我確實時常會慒心（tso-sim，焦躁憂慮）。你是按怎看出來的？」

伊講我敲兩回門，探頭入來。

無錯，第一回是看面頂出現的是我的號矣，等有一觸久仔，護士無出來叫，才去敲門；護士講無看著我報到。原來愛先去電梯邊護理台量血壓、體重等基本資料；共單仔投入去，伊才知影患者來矣。

等我去量好血壓，提單仔轉來的時，原本佇我後壁彼號的人猶未看好；經過差不多二十分鐘，患者出來矣，護士卻tshuā（帶）伊去啥所在辦代誌！過真久，護士轉來矣，猶無趕緊叫我入去，我才會第二遍去敲門。已經超過十二點，我是最後的患者，實在是等甲心狂火著矣。

我共醫生解說，「我幾若年無來過病院，掠做（lia̍h-tsò，以為）網路掛號好勢，照面頂寫的時間來恬恬仔等就好。我明明有行過來兩三遍，竟然無看著門頂一張條仔講看診前愛先去量血壓；想著就氣，氣家己敢若毋bat（識）字的，白白加等欲半點鐘。」

候診室人濟，閣不時有咳嗽聲；所以，一早起，我佇走廊一个人安安靜靜看冊。

我繼續講，「我早早就來，一本《動物農莊》都看半本矣，猶無輪著我，當然會慒心！」

我的心內本來就有壓力，恐驚醫生對我腹肚疼的判斷無好，愛繼續做各種檢查，甚至開刀。

好佳哉，基本的判斷是無問題，也免做侵入性的檢查，照電光（X光）就會當看清楚。

過一禮拜，去看檢查結果，醫生比電光相片詳細解說，講無啥問題，眼前也無做大腸鏡檢查的必要。「龍骨有小可彎，這無要緊，有年歲就會按呢，除非活倒轉去，變少年。」

然後，伊講，「以後若有問題才來揣我；若無掛著號，共護士sai-nai（撒嬌）一下，就會使。不過，我無希望佇遮閣再看著你。」

「我也無愛閣再看著你，雖然你真緣投。」

我毋是講假的，這个醫生確實生做真「將才」。知影伊猶是獨身仔的時，我甚至隨去想著，毋知有機會共伊紹介予一个好朋友的查某囝無？

。原載2018.7月號《文訊》雜誌。