「透早天袂光／伊著趕出門／拍拼為著啥／妻兒佮三頓……」這是我即世儂寫兮頭一首台語詩，量其約仔共阿爸兮性命史刻佇我兮文學創作路頂懸兮一塊起行牌仔，伊會永遠徛佇遐。

阮老爸伊是佇菜市仔咧賣豬肉兮生意儂，會記兮伊定定共阮講一句話：「恁爸較早若毋是因為厝內無錢通互我讀嶺東，即嘛我無定著是貿易公司的董事長！」我逐擺若聽著即句話了後，心肝頭攏會溢出一陣酸酸兮無奈出來。伊是初中畢業了後考著私立嶺東會計專科學校，後來因為厝內散赤無法度共伊納遐爾濟兮冊費，落尾也成放棄著第一志願，改讀冊費較省兮大甲高農。我知影伊定定共阮三兮兄弟仔提起即段無奈兮過去，上主要是欲互阮知影佇這快活兮環境內底，著愛更加拍拼，跤步踏進前。

佇我細漢兮時陣，我定定宓佇燒hut-hut兮棉zioh被內底看著阿爸佮阿母毋驚霜凍來吭骨，透早兩三點天抑閣是紫藍色兮時陣，怹著相載去豬戶共豬爿載轉來菜市仔，了後阿爸著開始剝骨，煞落來著無閒規工囉。怹著開始招呼儂客，一直等仔夠欲晝仔儂客較少兮時陣，則敢越頭食一喙盈早起位厝內紮來兮飯丸，食無了儂客又閣來啊！嘛是因為按呢阿爸即二十規年來，胃則會定定咧無爽快。

為著欲互阮即三兮兄弟仔過著誠好兮生活環境，阿爸已經艱苦規落十年啊，已經有夠啊！阿爸──重擔會使沓沓仔放予囡仔家己去擔當，也汝家己薰嘛食較少咧。
2003.4.9．初稿
◎像片是2003年兮2月23日我佮老爸佇蘇比克灣兮夜婆園翕兮──