月頭既時候，之前我做DHL個阿頭(阿源)打電話俾我，問我可唔可以返去做一個星期part-time，傾左陣，我話晏d覆佢，因為我要問下老公，怕佢唔俾我返工，點知，佢叫我自己諗自己決定，因為一個星期唔係長時間，咁又係，做左先算啦﹗咁耐冇做過野，我都唔知自己做唔做得黎，試下先知家嘛﹗之後到左夜晚，我就打返俾阿源應承佢啦﹗哈~點知佢突然話，其實係想問我返一個月得唔得架喎﹗一個月...我就呆一呆，因為諗緊，諗下諗下，好...照做左先，搵下錢都好。

10號，第一日再返去工作，嗯...感覺幾好，只係有少少覺得俾人搵笨，原來星期一，二，三，part我既同事(阿傑)係唔o係度架﹗好彩既係，坐我隔離果個同事識得入機，可以幫下我，但星期一係特別多單入家嘛﹗我做到夜晚8點半都未做完d野呀﹗做左十一個半鐘喇﹗最後都係留返第二朝早d返去做。第二日，我都要做十個半鐘，今次好d，我可以做晒d野，唔洗留到下一朝先做。第三日，原來晏晝阿傑就返黎架喇﹗咁都好d，我可以早d收工喇﹗其實做左幾日，唔係個人攰，係精神好攰，直到依家，我每次返工，都一定會中眼訓，一路入機一路中，呢排都已經早訓左好多，因為訓少左，眼訓嘛﹗其實咁樣俾我返工都幾好，鍾意返就返，唔返就唔返，計時薪，依家咁樣俾我搵下錢都幾好，不過都係一個月姐﹗

我返工，照舊會買d野食擺o係度，呢期成筒細粒版既珍寶珠、旺旺小小酥同欣欣杯。