一直都想d/l Podcast去部iPod, 但又好懶去update iTunes...

尋晚終於updated左個iTunes, 仲即時subscribed + d/l左以下節目：

１　兩個廣東話：一個林海峰節目, 一個民間電台節目
２　一個日文　：日本民間電台節目
３　兩個英文　：一個健康節目, 一個教普通話節目

今朝搭車時就聽左林海峰既是但o翁發花癲, 笑死我, 忍笑忍得好辛苦, 好驚坐我隔離個女人以為我係傻 ^^"

跟住放工就開始聽一個廣東話民間電台, 頂佢丫！ 一開始「嘭」一聲, 耳都爆, 嚇到成個人跳起, ｄ音量比平時高出成倍."/.即刻stop左佢, 校返細ｄ音量繼續聽啦...點知個節目原來係個主持人既last day, 佢做埋今集就唔做喇, 因為佢有大病, 所以要好好休養, 佢用做十多分鐘交代完, 跟住個節目就完喇 = ="

再跟住就到個日文節目, 我淨係識聽問候語 + 聽到佢數數目字 + Bye Bye, 其他都唔知up乜春 = ="

之後上到車就聽個英文健康節目, 我以為會講下食ｄ咩會健康ｄ啦, 點知成個節目都係得個鬼佬響度教冥想, 個背景音樂仲要好鬼魅, 不停重複叫你垂下頭, 放鬆, 吸氣, 跟住又點點點, 又再吸氣, 最後話下集教大家響巴士, 公共汽車上面冥想 = ="

聽到雞皮都起晒, 跟住就聽鬼佬教普通話, 今集係由基本教起, 教左I am, he is, she is, they are, we are, 每句重複三次, 教得幾清楚易明, 我估有心學普通話既外國人, 應該好易上手 ^^"

唉！d/l左五個節目, 先得一個岩聽...唔知點樣先可以搵到個岩自己聽既Podcast呢？ "f(-________-")