夜雨新北投／陳潔民　2002.1.8一稿2002.4.14二稿4.15三稿

刊於台灣e文藝



冰冷的雨，趁著夜色
罩落來
佇新北投的天頂
　飛

天氣冷到若冰
哈出的氣
霧茫茫的
　白

一支雨傘
佇新北投的
街路
　散步

路兩爿
潽出嗆鼻的硫磺味
溫泉溪，純純
　流過心底

普濟寺頭前
一級一級爬
彎彎的石梯
像曲折的心
　幽暗不明

叨位來的芳味？
是涼亭跤
地藏王菩薩的香爐？
抑是暗時的山茶花
　恬恬仔開？

我想，是心內那欉金桂
伊的花魂，提醒咱
　深深的戀夢

行落石梯
越頭看去
路燈光輝清冷
樹林翠綠，石梯烏潽相映
　一款趣味佇眼前

一切咁會當佇遮停？
無常感為啥物
　惟心頭生？

牽手落山
沿路的硫磺氣
　猶然佇空氣中喘喟

汝伸手去試
山溝內流泉的溫度
猶然燒燒
　小雨猶然咧落

即擺的相見
假若beh將過去
毋捌有的經驗
　一擺補淀

石欄杆邊
咱和石頭共款
　不言不語

送我到門口
最後一眼看汝
毋知影明哪在
　咁會閣相見？

新北投的夜雨
親像消失的天星
　一時恬戚戚