〈心內的七弦琴〉

詩：陳潔民2001.初春
攝影：李梧



[有情]

佇愛情氣氛的包圍下死去
真是糖甘蜜甜
若是柔和靜美的海濱
佇沙灘彼頭延伸的時
淺淺深深的腳印
就親像無形的琴箏，彈奏不時
晶瑩的聲韻，海湧彼一款
鑽越了宿世的心靈
黎明佮暗暝相對
大海的聲音
傳來春天的消息

[往昔]

伊的往昔，未曾斷裂
天的彼一邊
有星月菩提佇飛
即款悠悠渺渺的心緒
內底有汝的腳步
緩緩仔行來，緩緩仔行去
遙遠的日本時代
南洋的砲彈
四界閃避佇烽火中的生命
咁有聽著伊十指搗月的水聲？
咁會聽著寒冷的清溪
佇破曉的燈影之下
向著開放的大地輕輕吐喟
琴聲泠泠？

[長眠]

伊的目屎是一種委婉的言語
等待已經袂閣是伊窗仔門外
彼欉蒼鬱繁茂的花樹
仲夏暝的清夢
將會沉沉安睏
令人煩惱的怨懟不再釋出
無值確伊即世人唯一的向望
只是想欲長眠
長眠佇蓮花盛開的水波之間
佇盈盈的肢體伸展的時陣
彼個水底
將有伊的靈魂翩翩
靜靜長眠

[離騷]

是誰人佇溪邊低聲吟唱？
遠遠的所在
彼粒金色的日頭，強強欲沉落西
水底的金砂
恬靜敲響心內的七弦琴
叫醒伊隱藏多年的心曲
重重的鬱悶，沉沉的冤屈
知音難解
天地蒼茫猶然和諧
一曲離騷一碗茶
其中真味復何言
不必星斗，毋免月娘
天頂閃爍著純淨溫暖的光
就互日光給琴韻
傳轉去天堂

[無愧]

伊的思想佇伊的十指中間飛舞
跳躍成一首歌詩
感傷是咖啡杯內底的影跡
無盡的憂鬱
轉旋作奶油一漣一漣的花式
飲落去！無酒亦好
飲落去！無常亦真
天圓地方是七弦琴的形相
十指佇天地的縮影上
來來去去
面對地，面對天
拼力彈出生命的心聲
佮大化隱隱交融，伊
心內無愧

後記：
1.〈心內的七弦琴〉是台語詩，投入台語創作了後，我一直希望會當提昇佮擴大台語詩的題材佮境界，即首詩是寫一個女子由時代、歷史的悲劇中，慢慢昇華的心路歷程。

2.所附相片是朋友李梧攝的，經他授權使用，真多謝。