〈佮厝鳥仔同居〉(台語散文)／陳潔民1999/6/5初稿，6/8完稿

【抾著厝鳥仔】

　　彼一工，我置厝裡的後壁尾咧披衫，聽著鳥仔咧叫的聲。我循聲揣去，嘸閣，攏揣無半隻鳥仔影。歸早起，我佮阮阿母攏有聽著。阿母講伊咧想，可能是鳥仔子置咧學飛摔落來，愛給(ga3)伊揣出來，才袂互夭死。阮兩個母仔囝，著開始置後壁尾四界翻，翻甲路尾，我阿母置一個倒蓋(come3)的面桶腳揣著即隻鳥仔囝。
　　茲是即隻厝鳥仔，真細隻，猶無我手掌心的一半，翅鼓嘛猶未硬，毛嘛猶未發育完全，看即咧板勢，伊未竟學會曉飛，著摔落來阮兜。阿母決定欲給伊飼甲翅鼓硬，會當家己飛為止，卡未變作附近赫仔貓仔點心。
　　代先，阿母揣一個紙箱仔，甲鳥仔安置內底；我是去揣一個水盒仔，內底底一寡仔清水；煞落去，阿母閣用另外一個清氣箍仔，放一寡仔苜蓿籽，互伊做飼料。給鳥仔放入去的時陣，一時無注意，遂互伊走去，是講佳哉走無偌遠，一時仔著互阿母抓轉來。為著勿愛互鳥仔閣走出來，阮著置箱仔頂頭蓋(come2)一個網狀的塑膠括(gwa3)。安呢，總算給伊安置好勢，互伊有一個暫時安居的所在。

*抾著：撿到。
*代先：首先。
*清氣箍仔：乾淨的盒子。
*塑膠括(gwa3)：塑膠蓋子。

【慝相揣】

　　阮查某孫仔小羽是一個真好奇(hen3)的三歲囡仔，伊當然嘛對即隻新來的人客真好奇，拄安置好厝鳥仔無五分鐘，伊著去給括掀起來看，厝鳥仔著趁隙(pam4)飛出來矣，一時仔著無看見鳥仔影，嘸知慝去佗位。
　　阮阿母佮我，也閣查某孫仔，三個人置厝內四界揣，強欲給厝殼著翻過來，總算看著鳥仔慝置桌腳，阿母腳手誠蔑(mei2)，三兩下著抓著鳥仔囉！逐家總算會當安心去做家己的代誌。
　　我繼續去坐置電腦頭前拍論文，阿母佮小羽兩個坐置客廳看電視。我提出一塊互作「美妙的山中鳥鳴」的CD放落去聽，想未到，阮兜即個人客，遂對我即塊CD放送出來的鳥仔聲叫，一唱一和，怹媽孫仔嘛聽著鳥仔置咧對CD叫的聲，逐家相看對笑，不止仔趣味。
　　嘸閣，我嘛小可仔替伊悲哀，伊可能覺是伊的鳥仔伴來揣伊，所以才叫甲赫呢歡喜，可惜不是。暗時，阮歸家伙仔入夢鄉囉！無放送CD的鳥仔聲，鳥仔嘛安靜睏去囉！歸間厝恬戚戚……。
　　隔轉工，鳥仔猶原置箱仔內，我驚伊無清氣水倘飲，著動手掀括提出水盒仔，想未到即隻鳥仔有夠巧，竟然趁即個時陣，洶洶著飛出來。我目一下睨，又閣無看見鳥仔影囉！我趕緊給阿母講，兩個人又閣置厝內底四界揣，攏總揣無。阿母著叫我放彼塊鳥仔聲的CD，看伊會聽著CD，對咧叫無？我聽阿母的話，放CD落去，嘸閣，嘛無聽著鳥仔對咧叫的聲音。
　　揣歸晡，一直攏揣無，阮兩個人按算欲放棄揣鳥仔囉，阿母帶著無奈的口氣講：「想欲給鳥仔飼甲翅鼓硬，才放伊去飛，想未到煞揣無著伊，嘛無法度啊！」著置即個時陣，我遂來聽著鳥仔的叫聲，伊一聲一聲對CD咧叫，阮循著叫聲看過去，即擺，伊竟然是徛置走廊頂爾爾(nia3 nia4 )！阿母佮我，用一個籠盛，著將鳥仔贓著囉！阿母又閣給鳥仔抓入去箱仔底。即一工，著安呢平靜來過去。

*慝相揣：捉迷藏。
*腳手誠蔑(mei2)：手腳很快。

【悲傷的結局】
　
　　半暝仔時，差不多是三、四點，我想著我的論文，又閣睏未去，著起來拍開電腦，又閣置咧思考我論文的問題。鳥仔蹛的箱仔，著放置我電腦的邊仔，彼當陣，我感覺鳥仔真安靜，攏無咧叫，我想講，伊可能宛若置睏的款，嘛無去給伊注意。
　　天光了後，我才走去睏，無偌久，遂聽著阿母的叫聲：「害啊，旦(dann)鳥仔哪會死去啦？」阿母的喝聲，互我洶洶精神，趕緊對樓頂走落來問互清楚：「媽！汝講啥？」我一下落來，著看著阿母頭殼纍纍，目眶紅紅，伊的手掌心內底，鳥仔的身軀屈作一個，互人看著真未忍心。
　　阿母用傷心的眼神看我，問講：「伊是夭死的啦！腹肚mo2 mo4，咁會是伊想欲自由，嘸閣伊若走去，著閣互咱給伊抓轉來，伊心凝，所以著絕食抗議？」我應：「咁會是伊無愛食苜蓿籽？」阿母講：「嘸閣我看昨仔的籽有卡減，我想講伊一定有食才對啊！」我看阿母茲呢艱苦，著給伊安慰：「咱已經盡力，嘛無想過欲害伊，出發點是善良的啦，阿母，汝嘜閣艱苦啊！」我想著古早時「我無殺伯仁，伯仁因我而死」的故事，心內感覺有一種講未出來的悲哀。　
　　阿母若(na)看鳥仔若(na)問我：「汝給鳥仔唸往生神咒，互伊往生好嘸？」我輕輕講一聲好，著開始唸：「南無阿彌多婆夜，哆他伽多夜……」阿母將鳥仔埋(dai)置花園內的樹蘭腳，我徛置樹蘭花的邊仔，恬恬替鳥仔默哀，唸佛給伊超渡，心內對伊講：「鳥仔兄，本來，阮是欲救汝啊！想未到，會變成即款悲傷的結局。希望汝會當往生西方極樂世界……。阿彌陀佛！」真誠合十，我心內突然間充滿著一種詳和的感覺，假若鳥仔兄又閣展開伊美妙的歌喉，咧唱歌互我聽共款……，嘸閣，即擺，伊可能是置天頂咧唱啦……。

*頭殼纍纍：低著頭。
*腹肚mo2 mo4：肚子扁扁的。
*心凝：內心苦悶。