以家d病真係唔講得笑!!!

因為阿JAY無返既關係,我就臨時俾契媽叫o左我企counter,於是我就白白吹風吹o左3個字...到夜晚就立即發病,最慘就係個身開始發滾,但係個人就不停發冷打冷震,仲要食咩嘔咩,但係又餓到唔食又唔得,最終都係要九點前急急腳睇醫生...由於太辛苦既關係,一早打定電話請病假,等自己可以好好抖下,不過呢個如意算盤係打唔響,因為假就有得放,但係個人係滾到訓唔到,而且來來回回去廁所嘔,唉...好彩挨到今朝d藥終於有少少用,可以迷迷糊糊咁俾我休息下,不過個口苦到都係咩都唔想食,聽日仲要學校旅行吹一日風,都唔知點算...

仲諗住星期日開開心心去行山,似乎希望又要落空呢...

有時有d o野唔到我地控制,不過身為局外人既話就要明白唔可以理咁多...可能我講得唔o岩聽,但係好老實一句,環境造就一齊,如果當初大家都唔縱佢,就唔會令佢唔識諗o野...我地屋企既家訓(傳統)就係只要你唔好麻煩到人,你鍾意做咩都得,再市儈d既講法就係你只要定時俾家用屋企,唔好伸大手板問屋企拎錢,你鍾意做咩工買到成屋o野兼日日出街食都得!既然佢已經決定o左,無人可以改變到佢既話,倒不如同佢講少一句,但係俾佢認清現實仲好!起碼俾佢知道以家份工根本唔可以support佢既使費,想要享受就要付上代價,唔係你想做咩就做咩!

咁樣做先可以令佢長大,但係唔代表你唔錫佢...即係好似我阿妹咁,佢想讀大學無問題,但係使費佢要自己賺,佢想玩、食o野兼買o野就要努力,所以當個個大學生去蒲,我阿妹就星期六、日跑四份補習遊勻成個屯門!!!佢想買咩唔等使o野都要靠自己儲錢,但係撞o岩佢想買o野係實用我地就會買俾佢,咁既方式起碼令佢識得好好為自己打算,唔使我地為佢操心呀...

我地成日都話教一個小朋友,唔係買o野俾佢食,而係要佢學識點樣去搵o野食,咁樣先係愛佢呀...