威呢樣其實真係好乞人憎，當你威緊既時候，其實就係同時貶低緊其他人，將自己同其他人既層次分開，踩底人地從而令自己高人一等。
簡單例子如咩個LV出黎好威，戴隻金撈出黎又好威，有d野我有你無所以我威過你，最乞人憎既，就係我有你無之餘仲要擺出果幅臭咀臉。

前文講過，威滅呢隻牌子既殺蟲劑，個名真係改得衰。既然都要滅你啦，仲要威住黎滅，臨終前望住你果幅臭相，被滅果個一定咬牙切齒含恨而終，化作厲鬼，有仇報仇有怨報怨。

於是，我又諗下自己有冇做呢d自己咁不屑既事。
的確曾經有，不過自從三年前一役，戾氣全消之後，我開始意識到他朝君體也相同呢個道理。又的確，感謝上天，比我有好多呢d人無我有既機會，但係近年黎，我都盡量將呢種劣根性壓得就壓，我唔想傷害人。
但係體內卻有一種不能揭止與人分享既欲望，但又唔想傷害人，即係點？

每日我都會追明報問到底專欄(leechardasks.blogspot.com)，近黎有一篇提到，人除左食色二慾，原來仲有溝通慾。食色二欲屬於外在慾望，而溝通慾就屬於內在慾望。要有求知同分享既慾望，人類既思維網絡先得以成立。我諗，我呢種內在慾望相當強烈，所以我選擇成為設計師，我享受求知同分享。
哦，原來就係佢！

好喇，咁威同sharing又點分好？幾時係乞人憎地曬命，幾時係善意地分享？
其實可以係同一樣野，我認為係視乎個人心態。
當你有意威(亦即貶低人)既時候，你果幅臭咀臉，其實已經靜靜咁話左比人知你曬緊命，但係只有你自己一個仍然飄飄然於優越感之中，全世界只有你自己一個唔知道果一刻既你係幾咁難睇。
Sharing反而係一種奉獻，將你得到既分比其他人，無論係物質或經歷都好，都分比一d無呢樣野既人。但係我好多時都handle唔到sharing時所持既神情、態度，因為我好怕我會踐踏到其他人。

就上面先講，曬命同分享既分別，係視乎個人心態，果「個人」，除左分享者之外，仲可以係接受者。先唔講有心要威既先，就當你一心想分享，接受著既心態如果係自卑底或者善妒底既話，係果個人心見中，你既咀臉都係臭咀臉。

有時真係唔可以為左避呢種人而扼殺自己既溝通欲，所以做好自己先係最緊要。


--
Case Study
某天我與朋友聚會，席間提到唔知大陸A貨，於是我就講出我係大陸行街經歷如下：
於大陸某商場行街時，售貨員小姐見到我個袋，問我邊度買洗唔洗四百，我已經避而不答，到最後佢窮追猛打既情況下我只好答出正貨價錢，果刻，我同佢都尷尬，但係我更尷尬…

當我講出呢單經歷既時候，我只係覺得係有趣事，但席間顯得鴉雀無聲既情況下，我越講臉越紅、聲越細…氣氛一度陷入尷尬…


拿，我就係呢度handle唔到喇，到底係咪我present得唔好呢？
席間無聲係咪因為我當時唔小心用左曬命tone呢？
既然我係一心sharing咁我係咪應該要比多d自信呢？
既然係一件趣事我係咪應該帶動笑既氣氛呢？但係我又怕變左做取笑人地…

話時話，呢單case都真係幾kick手…