26-10-08(日)10:00聯合崇拜，崇拜後同家緩講開，我係海洋公園爭一間鬼屋「廣昌隆謀殺案」未去，佢話呢間最唔好玩，只係坐係到聽鬼古，跟住會熄燈同有鬼出來。原來呢間唔好玩，所以冇去到都冇所謂。

    跟住同阿賢去藏食lunch，d set lunch四五十蚊都幾抵，跟住重叫左個刺身，但d刺身又唔係想像中咁好食，唔抵。

    之後入迪士尼，因為阿賢有免費飛可以入去，所以又抵番。

    迪士尼o既主題係「黑色世界」，只係多左三間鬼屋，係space mountain內有d鬼樣、南瓜樣彈下出來，同埋「夜光鬼魅巡遊」。

    我地排隊等玩「馳車天地」時，見到林曉鋒、康子妮同佢兩個仔，後來玩完呢個機動遊戲，跟住離開時，又見到佢地係到玩緊，於是攞相機影低佢地。

跟住睇到巡遊只睇到臨尾幾架車，然後睇尼迪仔。

然後去「小小世界」，上次o黎迪士尼時，呢到都未開，係「小小世界」入面有過百個代表不同種族及玩具木偶，d公仔都好得意，配合埋9個不同語言版本合唱而成的《世界真細小》，好有童話世界feel。

    之後去左搵迪士尼公仔影相，今日都唔算太多人，排左都唔係好耐，同唐老鴨影相最搞笑，我一行到佢身邊時，佢就用手指篤我件衫上o既貝殼。

    跟住去左「詭異酒店」，本身話要排over10分鐘o既長籠，結果排10分鐘就入到去了。呢間酒店d鬼同海洋公園o既相比下就遜色得多了。。

跟住去坐船仔探險「森林河流之旅」，呢個活動都ok，令我有d真係去了森林探險o既feel，不過如果真係去熱帶雨林探險，就肯定會刺激萬倍，不過呢d咁艱辛o既旅程，我諗我未必會鐘意，因為我好怕d蜘蛛同埋d昆蟲。

7:00去睇埋「夜光鬼魅巡遊」，之後玩埋「泰山樹屋」，然後再入鬼屋「森魔詭域」。行呢間鬼屋會驚d，因為前面無人，通常一大班人行時，行前面d人被鬼嚇完後，咁我就會知個到有鬼了，不會驚被嚇。由於前面無人，所以行得極慢，極小心，去到有左右兩邊都企有石像公仔時，就更加唔行，因為明知裏面肯定有真人，準備嚇人，到d石像等得唔耐煩時，其中一個人就揮手叫我地行過去，知道邊個係真人後，於是就拿拿林咁行過去了，行到去一個黑色房而貼有螢光貼紙的房中，當你以為你睇得清係冇人時，就一個著黑色衫o既人彈出來，真係被佢嚇到架!佢件黑色衫真係隱藏得好好。臨近出口時，又見到另一個隱藏人，於是指住佢搵我見到佢啦!個人被我地揭穿左，就當然唔會行出來啦!

 到最後一條行時，佈滿綠色植物，你估唔到個人扮草來捉你著腳，佢捉住我隻腳時，我就打佢個頭，叫佢放手，跟住自己又係到笑，隻鬼被我打，真係笑到我胃痛，離開間鬼屋時，我都重要禁住個胃等佢唔好痛。

睇埋煙花，再買埋d餅就走了，晚餐食小肥羊，原來旺角小肥羊，晚巿冇得任食，不抵。

去曬兩個主題公園了，海洋公園o既halloween明顯好玩d，因為真係好有halloween feel，有機會被嚇，而迪士尼只能用得意奇來形容d鬼怪。

最開心係我基本上都玩曬迪士尼內所有活動了(除左d旋轉木馬、旋轉杯、火車冇玩外)，上次冇玩過o既「森林河流之旅」、「泰山樹屋」、「馳車天地」同新開o既「小小世界」，今次都玩埋了。

PS我部相機影夜景好差，成日都影到矇矇矓矓，可能捕光有D問題。