那五冬放出血屎
伊猶原微微笑
早起對鏡梳頭
金耳鉤串耳空
不管醫生說啥麼
長了壞東西要開刀喔
黑白講，伊說
這款症頭從做小姐就有了
在菜市仔找草藥
到廟口拿贈品聽講座
寶島旅遊走透透

我陪老母練拳散步
為伊調理吃食
早頓吃和好
加糖果汁尚豐富
中晝吃和飽
清蒸海魚尚介好
暗頓仔吃和少
半冥仔睡眠好
伊真挑 濟多菜不食
天廚妙供十八變
灶跤濟多套菜單

每日給伊老母拭身軀
從肩頭 胸崁 腹肚 到跤頭窩
沒有高山 沒有深谷
茫茫的月世界
平埔面 皺褶縱橫
親像鯨面紋
幼秀皮膚生霉疹
是風乾的茭白筍
飼我的木瓜桃仔褪水了
在頂面飄的
是幾縷參差落來的白雲

每日拭著伊的身軀
一扭著長的跤手
有半個月娘圓的翹跤倉
挑食的牛性情
絕症原來在給我明瞭
我對老母來
即滿伊變成阮查姥囝
我變成伊的老母
伊親像囝仔
放屎放尿
萬事萬項著要靠我

汝卻比不上我喔，伊說
在日本那時陣
風篩天嘛著要去海墘
去外社 做漁塭
在會社 析甘蔗
偷甘蔗葉 跑給警察追
甘苦歸日無啥趁
哪親像汝
睏到日頭曝跤倉
寫詩作文嘛趁唔
牲生，汝哪一點親像我