日前去銀行,好多人.排隊排左足足一個鐘,我前面只係剩返一個人.呢個時候,一個婆婆突然殺出來,好大聲咁話:後生仔,其實我頭先排係你前面架,我只不過係行開左.
之後,佢就二話不說咁插入來.

我心諗:妳講野呀?由此至終,妳都冇出現過,分明想打尖.

不過,見佢係長者,米諗住讓下佢,反正都排左成粒鐘,唔差在多等佢一個.點知排我前面果個人就睇唔過眼,出聲話從來只有我排係佢後面,之後排係我後面d人就開始糟.婆婆無奈是理虧,自動消失......

當我轉身看看排我後面的人,他們幾乎淸一色是長者.
呢一瞬間,我領悟到一個道理.

試諗下,我後面d人個個都係長者,如果佢地個個都叫我讓俾佢地先,讓得一個又唔可以唔讓第二個,個個咁讓法既話,咁我去銀行把鬼?

日常生活,可能有d時候係須要我地去幫人,好似搭巴士讓座咁,但如果好似頭先既情況,就絕對唔可以姑息.可能大家會覺得好無情.但如果只係識得盲目咁去幫人,不分青紅皂白,只會造成社會的種種歪風.