我都唔想再登入呢個新聞台.
不過我今晚又真係瞓唔著. 我好討厭好想瞓, 但又瞓唔著既感覺.
好攰, 所以唔想睇戲. 於是, 我去左睇新聞台. 唔係呢個, 係你戈個.

好似好陌生. 唔係文字陌生, 因為之前成日睇, 睇到都差唔多識背.
陌生既係你成個人. 原來你係會咁, 你有一面, 我永遠都睇唔到.
原來你字典入面都有個愛字. 原來你有時思想都幾似個正常人.
其實寧願相信, 陌生, 係因為你大個左, 成長左, 所以變左.
你變左, 唔係我唔認識而家既你, 只係我唔認識先前既你.

其實我知道成件事並非我揣測中咁差. 只不過, 又無我幻想中咁美好.
其實我好清醒, 我知道最後會發生咩事, 我知有咩事永遠都唔會發生.
我知我煩. 但係最多咪煩多幾個月, 之後想煩, 都唔知點可以煩到你.
之後, 之後無得再見你, 無得再掂你, 無得再搵任何藉口去搵你.
其實呢一日, 唔係好遠.

因為呢一日唔遠, 所以我真係唔介意人地講乜.
就算係我自己送上門, 我都送得好開心, 咁得唔得.

幾個月之後, 我地就唔會再有交集.
發生過乜, 都唔會再有人提起.
即使提起, 都唔會有殺傷力.

不過, 發生過既, 我自己會記得.
所以再樣衰再樣衰, 但係我自己之後會開心, 咁有咩好怕.
但係假如介意人地亂講戈個係你, 咁我仲有自制能力叫自己停.

其實你知唔知, 我唔知你諗緊乜. 成日係到估, 但又成日估錯.
我唔知你想點, 又唔知你唔想點. 有d野, 我以為你都想. 原來係得我想.

你無意中講話好多人想同你坐飛機. 即係, 原來, 我只係其中一個.
我亦係其中一個無得同你一齊坐飛機既人. 所以, 無野值得唔開心.

你成日都話唔知發生左咩事.
原來發生係你同我之間既事, 真係咁無相幹架咩.

食完飯瞓左一陣, 我竟然夢見你向我道歉, 係MSN到.
瞓醒我竟然又見到你on MSN, 不過無講一句野, 你就off左lu.

我知你呢幾日一定好攰.
又時差啦, 又番學啦, add堂又亂啦.
你一定好煩, 但係又唔知可以做乜幫你.
我唔敢打俾你, 連SMS都唔敢send俾你.
我驚同你加個油, 你都會覺得我煩, 覺得我無聊.
同埋我知道, 你心情唔好, 我做咩都唔會令你變好.
所以, 最好係收聲.

我唔知你仲有冇睇呢個新聞台, 不過唔睇可能仲好.
俾你知我諗緊乜, 有時我會覺得自己好白痴妹.
不過如果你有睇, 咁我想同你講句加油啦.

09/22/2010 02:26