我有一個好有趣o既家庭。

o係我心目中，佢比任何家庭都開放。細細個，講梗o既係我仲係十三、四歲o個陣，我o地o既合家歡電影可以係《本能》、《艷舞女郎》、《叛逆性騷擾》，電視上出現肉彈女郎，阿媽又會叫埋老豆一齊睇。

但係，我有時又會覺得呢個屋企比任何一個屋企都封閉、傳統。求學時期拍拖係屋企o既禁忌 (oh....by the way，早o係小學五年班我就已經犯咗呢條大忌)，就連講電話、出街、去戲院睇戲、唱k、偶像崇拜、貼poster、keep明星相等年輕人必有活動都一律禁止，攪到明明好正常o既事都通通地下化，竄出街玩都要攪到好似偷渡出境咁。

然後，屋企經過咗一個最家不成家o既一年，一家人齊齊整整後，又剛好遇上大佬要四出搵工同搵朋友鈙舊，我又因為實習關係，變咗兩個人都少咗o係屋企食飯。突然一日，我個二五仔表弟向我爆料，話老豆o係一個親戚飯局中表示因為佢兩個仔女唔返屋企食飯而有o的唔開心，加上一班好心做壞事o既親戚o係隔離加把口，我o地兩兄妹就無啦啦變咗因為掛住拍拖而唔理老豆老母o既忤逆仔女，飯局之後老豆條氣到依家都唔多順。

o個刻，我突然明白到，我老豆老母真係老喇。佢o地就算明知我o地遲早會離開屋企，聚埋一齊o既時間會越o黎越少，但係都好想o係呢o的日子o黎之前，我同大佬可以多o的留o係佢o地身邊。呢o的野佢o地老人家開口講會覺得無面，咪有時俾o的面色我睇，或者俾一、兩有骨o既說話我o地聽囉。雖然有時無啦啦俾人窒會唔開心，但諗深一層，做仔女o既點會唔知父母o既用心吖。

所以，痴家o的又有咩所謂吖？o係自己可以痴家o既時候痴家，有時都可以係一種褔分。