06-07-07

籌備經年，護老者工作小組第一次大型活動──「心繫護老」話劇比賽今日正式舉行，我同另一間中心嘅同事Idy擔當司儀。我做司儀嘅原因，主要係因為司儀當日唔會有好多嘢做，只要事前做好司儀稿，再加上臨場嘅反應、識執生就ok。點知我計漏咗一件事，就係7月頭要交季度報告 = = 結果到比賽前一晚，我都仲要努力做稿，搞到凌晨四點先有得訓。

諗住第二日上車訓多陣啦，點知就算我去到總站之後第一個站，都係冇位，由屯門企到出美孚，真係「越窮越見鬼」。

比賽開始之前就梗係唔食得嘢，呢個係晌台上面嘅必然守則，唔係胃氣湧出，講講吓嘢「嗝~~」就大件事。雖然我都早有準備帶埋「葡萄X」去，但作用都係唔大。

比賽規則有註明，如果參賽話劇超時太多，台上個幕會拉埋，套劇亦要結束，有三間學校都超時，但係佢哋嘅阿Sir走去投訴。有一間學校話搞到啲學生有唔好嘅經驗，咁係寫劇本果個人嘅問題啦，講明係得13分鐘，你要編套史詩式巨著我都吹你唔漲，但係等拉幕囉；有兩間學校話計過係夠時間，言下之意好似講到我哋計時有問題咁，但係其中一間學校嘅學生話仲有三幕未做，咁都夠時間，除非我哋有半個鐘俾你做啦；另一間學校嘅學生自己晌後台都搖搖頭，即係自己都知衰。本來都唔係好關我事嘅，弊在佢哋去評判到投訴，搞到評判計分耐咗，我同Idy要向台上面拖好耐~~好耐~~

比賽終於順利完咗，大家嘅感受都係：下次都係搞口號創作比賽好啦……