28-06-07

吸收咗上一次旅行嘅經驗，我好早就plan定今次旅行嘅行程。點知，都係人算不如天算……

早幾日，文員姐姐Sara(其實佢仲細個我，不過因為佢係負責claim外出公幹嘅車費，所以成team人都叫佢一聲文員姐姐，包括我^^)已經講明天文台話今個星期會落雨，個心已經沉咗一沉，希望今日唔好落雨。點知祇求晴天嘅行動都係失敗。一朝早都幾好天嘅，但係上咗車無耐個天開始落雨，仲要搞到屯門公路塞車，晌車上面訓醒，都仲未到美孚，惟有一落車就跑去搭地鐵。好彩趕得切打卡，冇遲到。

點知返到中心，天文台發出咗黃色暴雨警告訊號。咁就大鑊啦，因為紅色黑色都可以唔出發吖，但係黃色就有啲尷尬，結果商量改去其他地方，但係久久未有定論。雖然想去沙田新城市廣場，但係地方太大好易走散；想去Mega Box，又唔知果度有冇地方上落車、又唔知有咩睇。結果搞咗好耐，都係去返原本地點──文化博物館。但係，出發時間已經比原定遲咗成個鐘。

其實去到都有唔少新展館睇，例如古蜀國文明──金沙遺址同四川廣漢三星堆遺址。點知聽到同事大大聲同參加者講：「呢個館冇嘢好睇嘅，黑媽媽……走啦走啦去睇第二啲啦！」真係搞到我有啲火大。個館咁黑係要襯托返呢兩個遺址嘅神秘感，而且我問過有唔少參加者都話入面好多嘢睇，唔該唔識就唔好9UP，仲要係晌參加者面前……

去到酒樓食lunch，又係一個失算。因為冇諗過會落雨，所以上落車嘅地方都冇瓦遮頭，要逐架逐架車落客，結果三架車落晒人，已經係1:45PM，比原定1:00PM遲咗好多，當然上車又係遲啦。最慘席間諗住玩抽圍獎，點知同事冇整到抽獎用嘅紙仔，結果個個晌度食飯嘅時候，我要晌度整紙仔……

終於都走得啦，同事又話唔見咗輪椅，擾攘一大輪，終於都係虛驚一場，但係我已經開始虛脫，惟一好彩就係所有參加者都安全，冇人跌親，亦都好滿意餐午膳。但係我已經冇晒力啦，因為夜晚仲要開職員大會，惟有向主任請一個鐘OT leave，離開中心去呼吸一下帶有尼古丁嘅空氣……

返到中心睇返日曆：「日值歲破，大事不宜。」唔怪得之今日咁唔順利。不過上次旅行就打風，今次就落雨，係唔係上天示警，叫我唔好再搞旅行呢？= =