08-10-05

而家返到院舍，通常都係嬉戲人間咁就過0左一日，因為而家唔駛跟咁多0野，亦冇咩特別0野好做，所以就成日同d公公婆婆玩，一時扮打功夫、一時扮超人、一時扮貓扮狗，d同事話我係唔係痴0左線，0車！食得玩得訓得有糧出，d公公婆婆又開心，扮0下傻仔，又有咩所謂。

放0左工同阿盈high tea，因為我同佢都要過香港島果邊，於是約晌銅鑼灣(CWB)等，原本諗住去睇0下模型，但係放0左工「咪0下麼0下」，又唔夠時間lu。四圍行0左一陣，就去0左Haagen-Dazs食雪糕，兩個人叫0左兩杯雙球雪糕，埋單要成$110。咁大個仔都未食過咁貴0既雪糕……值唔值見仁見智，但係阿盈對我杯雪糕0既評語係「咁細路仔0既？」

我都知我係長唔大0架啦……都唔駛咁直接0既……

同阿盈分道揚鑣後就去0左搵屋企人dinner(但係都已經遲大到，被「丙」)，席間少明0既白痴成份又發作，搞到成班屋企人笑到收唔到聲，小表弟更笑到狂流眼水……(之後仲要俾個無良表哥一臉嚴肅咁話：「乖，唔好喊啦~~」)

搭車返屋企0既時候狂訓，自己都feel到撞0左幾次落玻璃，起身0既時候詐傻咁話：「點解個頭好似咁痛咁0既？」小琳妹子話：「你個頭起碼不下十次撞0左落玻璃度，仲有三次係『鎊鎊』聲0既！」oh my god~~撞唔爛玻璃都算偷笑~~