01-10-05

公眾假期返工有個好處，就係office冇人，可以隨時上網check住盤小生意。

尋日好順利咁完成0左一單交收，晌office下面個商場買入，放0左上網級引客人，再高少少價晌屋企樓下交收，車費：$0，所以，係凈賺。

今日又有交收，晌網上面有人收購，我記得前幾日同小晴晌街見過，於是同買家接洽，傾好晒價錢，先知原來佢住晌我屋企附近，交收又係唔駛車費，又凈賺。

賺幾多？唔講啦，好濕碎，馬會一個鐘0既人工都冇，但係成功感好緊要，証明自己0既眼光都未差得晒。

揀女朋友，仲叻，因為揀到小晴，哈哈~~(晒命中)

寶嫲嫲叫我不如當正常生意咁做，我又冇諗過呀，因為網上面太多專業賣家，我未必有佢0地咁叻；而且當真咁做，會有壓力同風險，如果入0左貨冇人要，責住d錢唔在講，仲要搵地方放呀！新院長關生話，佢同屋企兩個女講：「我0地間屋一呎成三千幾蚊，冇可能擺晒妳0地d幾十蚊0既玩具0架！」藉此教導兩個女要勤力執屋。好彩明媽冇咁同我計，唔係？我死梗！

而家咁，幾好0丫，有買家先入貨，販賣所得不扣除成本，全數撥入「晴明儲蓄基金」。幾乎零風險，又變相儲0左錢，所以小晴都開始有心機聽我0既銷售策略同行程(雖然佢話聽0左都唔明我講咩)，兩個人之間0既共同話題，又多0左dd，yeah~~~