2017-02-16 16:55:33森源
夕陽無限好…
對於華人社會都幾好架！耐唔耐就有節慶可以放假，每當過時過節都總會玩玩食食，不亦樂乎～對於大家嚟講上年年尾的做冬、聖誕開始，已經一直抱住一種放假心情…而且仲可以高興埋元宵加情人節！…所謂嘅holiday mood都應該告一段落，又再要調整吓個身森。香港地已經算好好，因為中西方的節日大致上都有得慶祝，據他方的親友講，澳洲嗰邊就冇乜節日可言，我哋聖誕的時候，佢就背心熱褲…真係乜氣氛都冇啦！我初時仲以為有乜土著節、樹熊袋鼠節之類…連呢類都冇～港人真係要好好珍惜嘞！
既然講開日子，記得今個月初有日傍晚，抬頭望天空之際，發覺久違了好耐的雲彩又出現，真係好耐都冇見過咁靚的雲彩，橙橙的雲彩夾雜著靛藍色的晴空真的相當吸引，平時魯魯粗粗兼且目不識丁的森伯，忽然心裡響起一首詩，當時的意境真係好配合呢首詩：夕陽無限好；只是近黃昏…爭啲要斟定菊花酒，拎定把大紙扇吟詩作對…哈哈哈！最後都用手機拍下最美的一刻！記得嗰日的晚霞電視都有介紹過！呢排都有好幾日天晴，傍晚都會見到個好靚的鹹蛋黃，但就唔係好見到晚霞，只是擬似煙霞…
至於詩意都唔需要森伯多講啦！係人都知美好的東西往往稍縱即逝，寓意要好好把握當下的美境～～
想知你鄉下有乜新年🈲忌？
屋企當啤牌係玩具幾時玩（唔玩錢）都得。窮到燶，有錢都去買零食啦！細細個試過新年同屋企人賭啤牌，輸咗喊到好慘，當時我感覺好似冇咗幅身家，首次體驗窮途末路嘅滋味，承受人生第一次巨大挫敗同壓力，不過，嚇到佢哋畀番啲錢我至收聲，有呢個教訓畀我上咗寶貴嘅一課，知道自己唔輸得起，都好少賭博。😁
版主回應
森伯真正的鄉下禁忌就唔知，只是一些港式禁忌，例如初一唔可以洗頭，唔可以掃地，仲有放全盒的桌上不能放利器（呢條最嚴！可能有時會用刀切糕，一放得耐就畀長輩省到立立令）～～平時我哋好少玩啤牌，一到過年就會玩下，唔玩錢都得，不過為求刺激就會玩細細地，小時候都不外乎玩幾角至幾元…不過就好少輸$$你細個玩啤牌都幾好笑，細細個咁鬼奸賴！贏就笑騎騎，輸就喊…不過你啲屋企人好溫情，寧願你唔喊就畀返啲錢你…學會唔好賭咪幾好，有啲人貪勝不知輸沉迷賭海咪重大劑… 2017-02-22 10:38:10
好想睇睇吟诗作对緊嘅森伯是甚麽模樣，畫個圖來看看吧！哈哈哈…：P
版主回應
森伯吟詩作對的模樣肯定老老土土啦！都落唔到手畫～XXD你嗰邊仲未留到言，期待你盡快開番… 2017-02-21 08:55:15
森伯一句“期待你儘快開番”，我一時間真的無言以對，怎能令森伯一個“老人家”失望呢？？KakaKa……
但，現階段不設留言的寫博形式我又覺得不錯喎！：D(况且又可以懒惰一點，只寫幾隻字或者只upload 一些歌曲也得，而且也不需要理會博友理解博文與否。)
不過…最重要一點是新工作還在適應中…
而且現在每天放工後又忙於找”周公子”約會…
哈哈哈……
其實寫Blog都係隨心出發，鍾意以什麼形式去寫都得，好似在PChome這裡，Blog友流量的確冇咁多，而我可以悠閒去覆Blog友…而且仲可以幫森伯篩選一些認真想來探森伯的Blog友～～唔會有其他純為呃like的網友…同森伯做人態度配合～務求貴精不貴多…當然KaKa喺認真的其中一個啦！！
返新工唔好有太大壓力，順其自然就會慢慢適應～
點敢打撓你同周公約會，話晒返新工個樣點都要醒神啲啦～ 2017-02-23 10:56:38