「不」文明…

‧香港本身又話好客之都，近排的「驅蝗行動」感覺好唔文明…香港人與內地遊客在大街互相對罵，畀傳媒播到外國，都映得香港人好小家…查實呢個行動唔係冇因由，大致想反映國內的自由行越放越多，感覺相當之擾民…稍為同意的，確實內地人多了很多，無論香港邊一處都好多人，唔好話假期，就算平時閒日度度都迫滿人（親身體驗何謂人患…），之不過呢種反映不滿的行為又未免太失大體，或者用返少少文明的做法會比較好！！中港矛盾都時有發生，亦睇得出有部份港人不屑內地自由行，其實老套講句，本是同根生嘛…一切以和為貴唔好咩？！！

「不」如意…

‧時時都聽到做人要「惜福」！好多時指的福氣都係好的方面～但其實人生遇到唔好的都係一種「福」！畀你成長的機會～近排睇到幾單新聞，後生人一唔如意就要生要死，動輒就去輕生！或者所謂的後生人，人生成長的經歷又有幾多，又捱過幾多苦呢？！一有唔如意就冇勇氣去面對，記得曾經有位作家講過…通常迂迴曲折的路好少發生意外，反而一條直路就會發生意外，駛直路時司機無顧忌容易恰眼訓，而曲折的路，司機會打醒十二分精神去駕駛，避免有彎位或突如其來有東西衝出來…人生都係一樣，太一帆風順就會經不起挫敗，反而有過波折，人就容易受得起考驗～老人家常話：人生不如意事，十常八九！！可能新一代，已經唔明白呢個道理了！！

「不」低頭…

‧我又唔知呢個算唔算香港的奇景之一，無論身在香港何處，都見到好多低頭族，車廂內的人咁樣，望過對面巴士的又係咁樣，差唔多個個都望住部智能手機，心想自以為潮流興的…當大眾一齊去做就會變為老土，今早聽新聞就話facebook會收購whatsapp，或者對有些人來講呢個聯繫好有用，但知道身邊的人們玩呢個whatsapp大都無無謂…到現在我仍冇智能機，與其話森伯老土，不如話森伯「脫俗」會唔會好聽啲咁呢～上到車，不如恰一恰養吓神（當然綁好安全帶啦！哈哈）亦都可以睇睇窗外的景物，成日話在營役中忽略身邊的一事一物，梗係啦！！成日望住手機，前面有燈柱都睇唔到...你有冇留意馬路旁的木棉樹呢？！！有冇望到有霧就知春天已經來到呢？！！…唉～～

（唔覺唔覺…打打吓打咗咁多字，發覺森伯真係幾長氣……唔怪得暫時都冇老人院肯收森伯…> <）