都係是"行"的標題呵...... 但無論如何, 都要講句 - 恭喜發財! 禮多人不怪嘛 :P

唔, 年初一, 都係去嗰兩個地方做例行公事...... 噢不, 是拜年......

一點幾出門口, 我哋先返東頭村(唔係九龍嗰邊嗰個, 係近元朗西鐵站附近嗰啲圍村)去叔婆屋企拜年.
搭670, 再轉輕鐵坐多一個站, 就落車. 當我哋打算由西鐵站過馬路到對面, 我驚見一個貌似秋姐嘅人, 亦聽到佢把聲, 不過佢嗰陣時無戴眼鏡. 基於某種原因, 我無再望多佢幾眼去confirm是秋姐與否...... (弊, 點解我會變成咁嘅?)之後見到佢同佢家人去追嗰架269B. 我就繼續一直走, 入圍村.
...... 係個菲傭開門, "恭喜發財!". 跟住喺度坐坐坐, 食食食, 吽吽吽, 同埋...... 練習剝紅瓜子(汗...)(好無用呀我......)
直至三點幾, 老豆睇完波(有線體育台), 就走了.

跟住媽先返屋企"收拾行裝", 我同老豆先去天水圍食啲嘢等佢...
再搭77去天端, 係呀, 去返學......
懷疑我哋坐緊嗰架77嘅司機好想快啲收工. 駛到去鄧佩瓊附近, 個司機問, "朗屏有冇落呀?", 無. 個司機直駛入天水圍. 但係嗰陣時架車係得三個乘客咁大把 =口= 相信個司機係個替工, 如果唔係嘅話佢無論如何都會入朗屏兜一轉. 剩咁多位, 想幫公司蝕本呀?! 另一方面, 架車仲有位, 個司機都應該要咁樣做, 唔應該飛站, 我覺得呢樣係做司機最基本嘅職業道德.
落車, 直踩去M記食(我X自X餐平時仲食唔夠呀......). 叫咗嗰個麥樂魚柳餐. 原來麥當勞真係可以refill奶茶...
媽都嚟到. 好, 上伯娘屋企, 瑞林樓.

"恭喜發財!", 都係好多人...... 喺四方枱上.
新年上伯娘屋企, 梗係有伯娘整的蘿蔔糕食 :)
食食食, 玩玩玩(玩手機......), 坐坐坐......
喔, 今次仲有相睇, 主要係Shirley姐同Ken哥結婚嘅相, 有六本...... 令我有最深刻印象嘅相, 係(應該係新郎去新娘屋企迎接佢嘅時候)新郎攞住張紙尿片, 上面放咗啲沾有黃色(似屎色 :P)調味醬嘅豬腸粉, 喺度食嘅相 XD 啲伴郎都要食, 不過係用筷子食 :P
遲啲, 伯娘仲有啲仔女要結婚, 呵.
...... 到差唔多六點, 又走人囉.

二零零四甲申年之年初一, 就這樣過去了.

吖仲有, 小弟聽日返大陸, 預計本月廿五號先返出嚟. 有特別事之後再補上......

再次祝各位心想事成, 萬事如意, 隨心所欲(<= 咪一樣 :P)!