25/12聖誕日崇拜，因為要出敬拜隊，所以一早就要回教會，不過都係勁眼訓，崇拜完後，見到朋友們出現，竟然見到cathy華記，阿生阿den，還有其他以前的中學同學，嚇了一跳，原來是因為他們今日都有朋友洗禮，所以到場看他們洗禮。見到他們太開心，所以連相都沒有影，結果我今年就沒有同任何一個洗禮的朋友影相。可能人大了，對這些事都少了雀躍吧。

之後去了團契的歡送會，我懶死唔走咁多年，終於都要被送走了，不過星期六都要繼續返，因為要落葡萄園幫手，所以可說是一切照舊。

完了歡送會，就立刻飛奔到唐唐的家中開party，順手游游水。晚餐就由唐媽媽煮了一餐好豐富的食物，真的要多謝唐媽媽。不過唐唐家中的那個小朋友實在太活躍，去完唐家成個謝了。見到梁威同lolo玩得咁開心，我甚至懷疑lolo其實係佢個仔。

在唐家發生了小意外，因為有bb在家，所以廚房有個欄，入去就要跨欄，點知我一跨，就踢到了牆。最初覺得痛是正常，但痛了好耐，我覺得不對路，就除襪就見到腳指甲爆了，有血出，唔怪得咁痛啦。真的有排好番了。

26/12返完崇拜，對昨日的party有意猶未盡的感覺，就成班人上了我的家玩，都係游水+winning。不過成班人都勁食我家中的叮叮食物，當他們走後，打開冰箱，空了...好彩還有做晚餐的食物，否則實行餓死。腳指繼續痛。

27/12俾村長召喚去了禮品展，本來要同咪sir爭免費飛，但咪sir遲大到，張免費飛就落在我的手上了，哈哈哈。入到禮品展，發覺勁廢，東西沒有平到，同出面差不多，所以我們都係食了一個非常好食的菲律賓雪糕就走了。另一個得著就是見到村長媽媽，村長有免費飛是因為村媽在入面工作。原來村妹在工展會工作，我竟然沒有發覺邊個係，失機會了。咪sir有幸得見真人，我就冇了。行完見早，就大家去了食下午茶，吹了一陣，我要趕下場就走了。

約了唐唐他們買東西上德堅家打邊爐，其實都毫無頭緒買什麼，結果都係買d勁大路食物，丸呀，肉呀，菜呀等等。第一次可以食得晒d食物，可能因為人多了，而且買少了食物，所以就可以食埋德堅家中的食物。

不過都發生了一些小插曲，唐唐超級怕狗，但德堅家有狗，所以就為了隻狗的安排令大家唔開心。做了個和事佬，應該沒事吧，大家都不是咁小氣的人。不過他們自己要講番件事先得，外人插手都做不到太多。

臨走前玩uno，我玩玩下唔知做乜，本來想叫"cut"，點知叫了"碰"，全場大笑，連我自己講完都打了個突，點解會講碰的。真係俾人笑到面黃，可能真的游得太多水了。下次玩uno前都要暫時唔游水先，費事慣了口叫"碰"呀。

28/12婆婆生日，我同媽媽一齊找她飲茶，見到她行得走得太好了。還說明天要食蛇宴，嘩，我都想食呀。做老人家咁多節目都幾好呀，有得玩﹐證明還有健康。如果我老了都係咁，幾好，有健康喎。

之後行了花園街想買袋，但太自由行，所以都沒有買到。乘118回家，太倦，所以就決定到小西灣先買食物打邊爐，不是我醒記得藍灣有百x廣場，而是我太眼訓想訓多一陣，所以提議到小西灣先買。今日凍了很多，實在令人想睡覺呀~~