2005年2月4日 星期五

今日唔洗上FM堂,原本諗住上完FPP,3:30pm就走得,點之,Miss唔肯放人,攪到差唔多成4:30pm先走得,返到屋企都成差唔多7:00pm,但今晚麥子約o在7:30pm起大埔火車站等,之後入去燒烤王到去BBQ,我見趕唔切咪自己入去囉!!但因為一D溝通上的誤會,再加上自己唔記得帶銀包,要折返返屋企拎,攪到好遲先入到去,唉...其實我都唔多想去BBQ啦!但俾o在錢,唔去又好煩啦!!所以,最終都去o在啦!!

去到我真係燒野食囉!因為自己心情都唔太好,都無乜點出到聲,我D組員見我唔多出聲,個樣又呆呆地,所以以為我好累啦!!其實又唔關累唔累事啦!!只係我唔多想講野O者!我一心情唔好就會係咁,不過好多人都睇唔出我係唔開心,而唔係累啦!!知我者又有幾多個呢?

燒燒下,思惠姐姐o黎o在,之後有機會同佢坐埋一齊,傾下計,好似好耐都無同思惠組姐傾過計啦!!佢問我慣返麥子未啦!我誠實地答佢我仲未投入到麥子的生活啦!!我唔係因為喜歡麥子而返,而係為責任而返啦!!我認為我應該要返麥子而返麥子(這也是第一型性格的特徵,在我地角度裡,事非黑白會分得好清楚,責任心好重的人,認為係責任的事,即使自己唔喜歡,都會去做)當自己同佢講到,我用o在4年的時間好不容易起微沙先建立到一班朋友,當呢段友誼想再進深時,我就要離開o個度,去到一個新的地方,面對一班新的人,再要重新去適應,建立,呢種感覺十分的難受啦!!當自己講到呢到時,都眼濕濕啦!思惠姐姐都有同我講,有時一D好的野,都會影響我地前進啦!!所要要"忘記背後,努力面前",佢又講到主動的問題,有時主動不是一定係自己有問題,自己去搵人先係一種主動,當別人去搵你時,你有否主動去open自己,俾人去了解你,佢問我時,我都唔識答佢,不過佢呢番的說話,令我值得再去深思