除左感情問題，呢期都有好多朋友仔向我訴苦，期中考好辛苦呀、讀書唔知為咩呀、唔想做野呀．．．．．．其實有d野我都唔係好識回應，畢竟我唔清楚對方o既實際情況，但做朋友，無論如何都要幫下佢地，講d安慰或鼓勵等等o既說話，起碼盡力令朋友開心d啦。

　　但我又發覺，我平時好似都係做聽果個比較多，我好少係搵人講果個。話我唔識講野又唔係丫，有話題我就可以講好多野；話我唔鍾意講野咩，又唔係喎，我其實都好渴望成班朋友一齊攞哂d真心話出o黎講，我亦都唔係冇呢d機會，以前讀中學都好多次同d同學去旅行，夜晚例牌講鬼古或者吹通宵水。但每次講到心底話，我都冇將可以講o既野講到最盡，或者講左等於冇講，或者又係做聽果個．．．我懷疑我係缺乏安全感。

　　我覺得自己係一個好冇安全感o既人。例如，未得到手o既o野，就算幾肯定將會係我o既，但我都唔會相信，一定要等呢樣o野到左手，比我鎖到好埋好埋，我先感到呢樣o野真係我o既，我唔會失去佢喇。我習慣比自己需要o既預留得更多，例如，去買一件十蚊o既o野，我一定要銀包有三十蚊以上先肯去買。或者因為咁，我唔習慣同人講心事；我唔係怕比人出賣或者周圍唱，但我總係諗住要保留更多，所以一d可能無關痛癢芝麻綠豆o既小事，我都睇到對自己好重要，唔願意同人講。

　　缺乏安全感所以收埋收埋d野唔講，同咩都講哂出o黎迫人聽，邊樣好d？
　　應該問，邊樣對自己好d？

　　我應該改變呢個情況嗎？
　　或者問，我有機會改變呢個情況嗎？
　　（而家算唔算？）