前日下午三點幾 , 大佬自己沖咖啡 , 唔知大佬做乜 o野 , 將Ｄ熱水倒落自己　o既左手度 , 當其實唔知道痛 , 仲呆 o左望住好耐 . 等知道痛啦 , 竟然唔知道先治理燙傷 , 而係將隻手收埋驚俾我見到 , 真係俾佢激死 . 夜晚我發現 o左 , 燙傷處已經又紅又腫 . 大佬仲話 : “按落去有白印幾得意窩 . ”我即刻好惡咁啤住佢 , 佢即刻唔敢再講 o野 . 到 o左半夜燙傷處開始起水泡 , 心痛死我 , 又唔忍心再話佢 .

大佬係個好細佬仔 o既人 . 係出面 , 佢真係好成熟 , 頂天立地 , 值得信任依賴 o既人 . 但係返到屋企簡直就係個大細佬 , 百厭到死 , 唔聽話 , 扭計大王 , 唉 !

好似中秋咁 , 已經買 o左朱古力月餅俾佢 , 話 o左叫佢唔好食太多蛋黃月餅 , 我已經精 o左啦 , 只買一盒雙黃月餅 , 其他都冇黃 o既種類 . 但係呢個百厭大佬 , 竟然偷偷去買 o左盒五黃月餅 , 我真係俾佢激到爆 . 佢都知我嬲 o架 , 所以諗 o左好多藉口說服我 .
“一年先得一次中秋 . ”
“我又唔會一次食晒 . ”
“大哥 大嫂 雯雯都食 o架 . ”
“我唔會食好多 . ”
係佢講藉口時 , 我一直用殺死人 o既眼神啤住佢 .

想食月餅 o既時候 , 要經我呢關 , 佢又有好多藉口 .
“蛋黃唔可以擺太耐 . ”
“你睇蛋黃在叫我食佢 . ”
“放太耐 , 月餅會變壞 . ”
“月餅放入雪櫃 , 會變硬唔好食 . ”
“俾我食啦 , 我乜都應承你 , 好唔好 . ”
扭唔倒食 , 就唔死心 ( 為食到死 ) . 又唔知自己食太多蛋黃對身體唔好 , 自從有淋巴病 , 大佬有時食咸蛋黃會皮膚敏感 , 雖然只係輕微 , 只係手背上敏感 , 但係始終唔好 , 所以我唔俾佢多食 .

食芋頭仔也都係咁冇節制 , 芋頭仔食多 o左好濕熱 , 大佬又唔鐘意飲涼茶 .

大佬返到屋企就完全放鬆自己 , 成個大細佬咁 .
不過大佬咁 , 先至可愛 ^__*