最近忙於研究 數碼相機 o既拍攝 , 好奈都冇寫日記 .
早排 大佬 o既朋友 小雙子 , 寄來四個台灣肯德基出 o既小叮噹玩具 . 我用數嗎相機拍攝小玩具總係矇查查 , 大佬有幫我請教佢係台灣 o既朋友拍攝技巧 , 但係我總係拍攝唔好 >”< 於是 , 我就買 o左本大陸出 o既【數碼照片攝影技巧】. 雖然本書係檢體字 , 但係我都睇得明 , 唔明 o既字我可以問大佬 . 依家仲係練習緊 , 越細 o既玩具越難拍攝得清楚 .

8月5日傍晚 , 大佬買 o左架新單車俾我 , 我架舊單車壞 o左冇得整 . 當晚我同大佬係 新屯門中心 龍門居海傍踩單車 , 有個老伯伯踩住個好舊 o既單車 , 特然從我 o地左手面小路轉出來 , 衝向大佬 . 大佬有停住架單車 , 但老伯伯架單車撞向路旁 , 眼見老伯伯就來跌得好傷 , 因為路邊有大石椿 . 大佬見到如此就用自己 o既身體趴 o左落石椿度 , 老伯伯跌係大佬身上冇受傷 , 老伯伯好感謝大佬 . 但係大佬右膝蓋俾石椿撞傷 , 流 o左D血 , 我睇到好心痛 . 返到屋企媽咪即刻同大佬消毒傷口包紮 , 媽咪眼紅紅 , 我知道媽咪忍住眼淚 , 大大佬見到大佬咁 , 都好緊張 . 原來大佬流血有傷口 , 係好難止血同埋口 o既 , 我依家先至知 .

琴日晏晝我見到大佬傷口 o既紗布 , 濕得好犀力 , 我好驚傷口有惡化 , 就夾硬拉住大佬去睇私家外科醫生 . 去到診所 , 醫生問 o左大佬一 D問題 , 希望最好有大佬 o既病例紀錄參考 , 我就飛車返屋企攞大佬 o既病例紀錄 . 醫生睇 o左 , 同大佬打 o左支破傷風針 , 係傷口上灑 o左 D葯粉 , 包紮好 . 然後開 o左 D消炎藥 , 同俾 o左幾包傷口 o既藥粉 , 吩咐每日沖完涼都要換藥 .

返到屋企前 , 大佬千吩咐萬吩咐 , 唔好俾媽咪同大大佬知傷口 o既事 . 我同大佬係海傍坐 o左好奈 , 我攬住大佬隻手臂好緊好緊 , 我好心痛大佬 .