又好耐冇打日記喇……
原因係……懶囉……
唔知係咪因為依家知道AD一有功課就勁多嘢做(仲要係包保做到死果隻)，所以一有機會呌吓就要把握機會瞓餐勁，於是其他嘢都懶得做。
所以話唔駛趕功課日子嘅生活已經可以當度緊假……即使冇實質做過D乜，但係對我黎講，有得stay喺屋企過吓日晨已經心滿意足喇~

其實今個學期一開始，AD就即刻派新功課——用三個禮拜時間設計一個放喺維多利亞港嘅observation deck……

(le件事留番下篇「日記」至講)依家應該講D比功課更重要嘅事先：
我終於收到上個學期嘅考試成績喇!!!
太好喇，三科筆試科目都合格。知道唔駛嘥500蚊補考(500蚊補考一科，如果再多幾科唔合格就double，甚至triple架喇，幾鬼貴呀!......都話學校係奸商架啦……)。
我喺BC(Building Construction)同EC(Environmental Control)都攞A-；BS(Building Structure)就攞A呀。
見到自己之前嘅努力(冇走堂、坐正老師前面第一排留心上堂、考試有盡力溫書)冇百費到真好!

基本上，我覺得今次成績，除左EC果科好surprise之外，其他兩科都好合理。因為我考試果陣已經知道自己BS果科一定好過BC——講真，BS份卷實在太易喇~題題都非常straight forward，根本唔駛點諗嘅，只要將書入面嘅內容copy落本答題簿就得喇。我可以肯定如果同學上堂有聽過阿sir講嘢，考試前又有溫過書一定識答哂堆問題!
之前阿Ben(我個faculty嘅阿頭)預先宣佈有幾多人唔合格果陣，問我哋點解咁多人le科成績咁差嘅時候，D同學就話份卷好難；之前功課有一題計數題阿sir唔出，搞到佢哋花左時間喺果題數又得個吉；阿sir D hard copy嘅slide好細張；阿sir好串、唔識教書、態度差……
計我話：阿sir的確係好串嘴，態度囂張左D，但查實佢教書OK吖(起碼我聽得明佢講乜)，所以班同學成績差同阿sir好似冇直接關係噃……不過又唔係，我見上堂果陣咁多人走堂(走剩半班)，據講原因就係阿sir人緣不佳，再加上班人覺得le一科好悶，所以佢哋寧願落樓下茶餐廳tea都唔上堂。
另外，班人話份卷冇出之前做功課果題數係阿sir唔啱，我就覺得佢哋係「XXXX賴地硬」囉……喂，大佬呀，一黎阿sir從來冇提過要出果題數；二黎佢之前講過正常黎講，做一題果D數要個半鐘，考試得果兩個鐘，佢出得le題就唔駛出其他嘢啦……

講到尾，我認為喺BS le科入面，可以好清楚睇到「種瓜得瓜，種豆得豆」le個道理：份卷咁易，堆問題直接成咁，再加上阿sir考試前講到明題目會同邊D課堂內容有關，直情講到明「我考試一定出le樣嘢，你哋一定要溫熟佢呀」，D人都可以話唔識答，咁即係佢哋冇溫書啦。
所以我覺得佢哋得出依家嘅成績應該自我反省吓，唔該諗吓自己平日有冇上堂；上堂有冇恰眼瞓；考試前有冇溫書；考試果陣有冇早走啦。我只會同情一D自問已經做得好足夠，但係考試撻Q嘅人。

另外，我話EC有A-嘅成績好surprise，因為我從來冇諗過會咁。
話說雖則我好喜歡教EC嘅MK，而上堂亦有興趣聽書，但係le科就好似Biology入面嘅ecology咁，要人analyze個題目，要首先消化完書入面嘅內容，然後分析完再答問題……一講到要用腦諗嘢嘅問題就憎……加上我個腦一向轉得慢，要我答le D問題真係受罪……
考試果陣就係咁喇，成堆case，要諗辦法點樣solve problem，諗到頭爆……
份卷咁鬼難，想合格都難，加上之前個test又死左(阿sir俾6版白紙我哋答問題，但係我答得一版半……)，點會諗到依家合格架?(阿Ben話le科有人唔合格，我幾驚有份呀!)